ەلورداداعى «Fوrte Bank Kulanshi Art Space» گالەرەياسىندا «L’art de dialogue» حالىقارالىق جوباسىنىڭ شەڭبەرىندە «توسىن كوزقاراس» اتتى فوتوكورمە اشىلدى. وندا پولشا انتروپولوگى, ساياحاتشى, كاسىبي فوتوسۋرەتشى مارتا ۆيەچورەك پەن ءبىر توپ قازاقستاندىق تالانتتى فوتوسۋرەتشىلەردىڭ تۋىندىلارى توپتاستىرىلدى.
مارتا ۆيەچورەك وسى كۇندەرگە دەيىن 50-دەن استام ەلدى ارالاپ شىقتى. ەۆروپا مەن ازيادا, تاياۋ شىعىستا ءوزىن قىزىقتىرعان كورىنىستەردى فوتووبەكتيۆتىڭ نازارىنا ىلىكتىردى. اتالمىش كورمەگە ونىڭ بىرنەشە مەملەكەتتە تۇسىرىلگەن فوتوسۋرەتتەرى قويىلدى.
ال قازاقستاندىق فوتوسۋرەتشىلەردەن جاقسىلىق بايعازى, انەل قۇربانوۆا, انار مەرگەنباەۆا, ۆەرونيكا لەرنەر, دانيل پوتاپوۆ, داريا دەميدەنكو, ەكاتەرينا زاەچكوۆسكايا, ناتالي كارپۋشەنكو, ناتاليا بولگاروۆا, ءنازيرا قوجانوۆا جانە وسپان ءاليدىڭ تۋىندىلارى قاتار ورنالاستى.
وسىنىڭ ىشىندەگى وسپان ءاليدىڭ شىن ەسىمى – الىبەك يبراەۆ. ول – «100 جاڭا ەسىم» جوباسى ەكىنشى ماۋسىمى جەڭىمپازدارىنىڭ ءبىرى, براكونەرلەردىڭ قولىنان قازا تاپقان «وحوتزووپروم» مەكەمەسىنىڭ جانۋارلار دۇنيەسىن قورعاۋ جونىندەگى ينسپەكتورى ەرلان نۇرعاليەۆتىڭ فوتوسۋرەتىنىڭ اۆتورى.
بۇل سۋرەتتە ەرلان مارقۇم كيىكتىڭ قۇرالايىن اسقان مەيىرىممەن جوعارى كوتەرىپ تۇر. فوتوسۋرەتشى قورعالجىن مەملەكەتتىك قورىعىنا پرەسس-تۋرمەن بارعاندا ينسپەكتورمەن سويلەسىپ, وسى سۋرەتتى ءتۇسىرىپ العان.
«ەرلان نۇرعاليەۆ ەرلىگىنىڭ وسكەلەڭ ۇرپاققا بەرەرى كوپ. سول سەبەپتەن, اعامىزدىڭ ءمۇسىنى بوتانيكالىق باقتان ورىن تاپسا دەگەن ۇسىنىسىم بار» دەدى وسپان ءالي ونى سوزگە تارتقانىمىزدا.
