ەلوردادا «ەكسپو-2017» حالىقارالىق مامانداندىرىلعان كورمەسى كەزىندە ۇيىمداستىرىلعان ترياتلوننان Astana Asian Cup چەمپيوناتى مارەسىنە جەتتى. وسى ازيا كۋبوگىنىڭ شەڭبەرىندە وتكەن قازاقستاننىڭ اشىق بىرىنشىلىگىندە اۋەسقوي اتلەتتەر باق سىنادى.
ەسىل وزەنىنىڭ بويىندا ورنالاسقان ترياتلون پاركىندە سالتانات قۇرعان دۋماندى دودانى وتكىزۋگە قر مادەنيەت جانە سپورت مينيسترلىگى, استانا قالاسى دەنە شىنىقتىرۋ دانە سپورت باسقارماسى, قازاقستان ترياتلون فەدەراتسياسى, ازيا ترياتلون كونفەدەراتسياسى (ASTC) جانە حالىقارالىق ترياتلون وداعى (ITU) مۇرىندىق بولدى.
جارىستىڭ العاشقى كۇنىندە ITU رەيتىنگىندەگى ۇزدىك كاسىبي سپورتشىلار سىنعا ءتۇستى. ولار 750 شاقىرىمدى ءجۇزىپ, 20 شاقىرىمدى ۆەلوسيپەدپەن باعىندىرىپ, 5 شاقىرىمدى جۇگىرىپ ءوتتى.
سونىمەن, ايەلدەر اراسىندا ءۇشسايىستىڭ جالپى مەجەسىن 1:04:33 ۋاقىتتا ەڭسەرگەن ۆەنگريالىق جانەت برەگمايەر جۇزدەن جۇيرىك شىقتى. ال ەكىنشى ورىندى تاعى ءبىر ۆەنگريانىڭ سپورتشىسى دوروتەيا پەتروۋ 1:07:20 ناتيجەسىمەن يەلەندى. ءۇشىنشى ورىنعا تۇراقتاعان ۋكراينالىق اننا ابدۋلوۆانىڭ كورسەتكىشى – 1:08:05.
ال ەرلەردىڭ اراسىندا ۇزدىك بولعان اۆستراليالىق مارسەل ۆالكينگتون جالپى قاشىقتىقتى 0:55:43 ۋاقىتتا باعىندىردى. ەكىنشى ورىن 0:55:57 كورسەتكىشىمەن ۆەنگريالىق گەرگو شووشقا بۇيىردى. ءۇشىنشى ورىندى دا ۆەنگريالىق لازسلو تارناي الدى. ونىڭ ناتيجەسى – 0:56:39.
ترياتلونشىلار مۇنىمەن تارقاماي, كەلەسى كۇنى قازاقستاننىڭ اشىق چەمپيوناتىنا كىرىسىپ كەتتى. بۇل باسەكەدە كاسىبيلەر مەن اۋەسقويلار جەكە-جەكە سىنعا ءتۇستى. ولار سۋدا 1,9 شاقىرىم, ۆەلوسيپەدپەن 90 شاقىرىم, جۇگىرىپ 21 شاقىرىم مەجەنى ەڭسەردى.
جەڭىمپازداردى ماراپاتتاۋ راسىمىنە قر پرەمەر-ءمينيسترى باقىتجان ساعىنتاەۆ, ترياتلون فەدەراتسياسىنىڭ پرەزيدەنتى كارىم ءماسىموۆ, مادەنيەت جانە سپورت ءمينيسترى ارىستانبەك مۇحامەديۇلى جانە استانا قالاسىنىڭ اكىمى اسەت يسەكەشەۆ قاتىسىپ, جىلى لەبىزدەرىن ءبىلدىردى.
جۇلدەگەرلەردىڭ اراسىندا وليمپيادا چەمپيونى الەكساندر ۆينوكۋروۆ تا بار. ول 40-44 جاس ساناتىندا ەكىنشى بولىپ كەلدى. بۇل توپتا جەڭىمپاز سەرگەي ياكوۆلەۆ بولسا, ۇزدىك ۇشتىكتى مۇرات قاسىموۆ تۇيىندەدى. سونداي-اق, 45-47 جاس ساناتىندا «Bi-Group» كومپانياسى ديرەكتورلار كەڭەسىنىڭ توراعاسى ايدىن راحىمباەۆ كۇمىس جۇلدەگەر اتاندى. ءبىرىنشى ورىندى ودان 30 مينۋت بۇرىن كەلگەن اندرەي حانادەەۆ الدى. ءۇشىنشى ورىن داۋرەن ەرجىگىتوۆكە بۇيىردى.
باسقا ساناتتاعى جەڭىمپازداردىڭ رەتى مىناداي: 30-34 جاستا اسلان ءابدىرازىموۆ, شىڭعىس القانوۆ جانە ناريمان تۇرلىبەكوۆ; 25-29 جاستا ماكسيم لەششين, قۋانىش اۋباكىروۆ جانە ءمادي سۇلەيمەنوۆ; 35-39 جاستا گريگوريا ساۆۆا, ميحايل كۋۆشيننيكوۆ, نيكيتا كراسيلنيكوۆ; 18-24 جاستا الەكساندر تريبۋنسكي, ازات مامبەتاليەۆ, ەرداۋلەت ۇمبەتوۆ; 25-29 جاستا دينارا سادۋاقاسوۆا, گۇلنۇر تىلەنوۆا جانە يانا كاگالەي.قازاقستاننىڭ اشىق چەمپيوناتىندا جالپى 155 سپورتشى باق سىنادى.
ورىنبەك
وتەمۇرات
