ەلورداداعى ۇلتتىق اكادەميالىق كىتاپحانادا ءمادي ءباپيۇلى جانە جۇسىپبەك ەلەبەكوۆ اتىنداعى رەسپۋبليكالىق ءان بايقاۋلارىنىڭ, «شابىت» حالىقارالىق فەستيۆالىنىڭ لاۋرەاتى ەرجان بازاربەكوۆتىڭ «تاۋ ىشىندە» اتتى ءۇنتاسپاسىنىڭ تانىستىرىلىمى ءوتتى.
ءۇنتاسپانىڭ «تاۋ ىشىندە» اتالۋى تەگىن ەمەس. وعان اقىن, جازۋشى, دراماتۋرگ, كورنەكتى مەملەكەت جانە قوعام قايراتكەرى ساكەن سەيفۋلليننىڭ وسى اتتاس تۋىندىسىمەن قاتار «ءبىزدىڭ جاقتا», «كوكشەتاۋ» اندەرى ەنگىزىلگەن. بيىل اردا ازاماتتىڭ تۋعانىنا 125 جىل تولىپ وتىر. اتالمىش شارا ونىڭ مەرەيتويى مەن كەزىندە ساكەن اتاۋىن ءوزى قويعان جاڭاارقا اۋدانىنىڭ 90 جىلدىعىنا ارنالدى.
ساكەن سەيفۋلليننىڭ تۋعان ءىنىسى ءماجيتتىڭ ۇرپاعى ساكەن ورىنبەكۇلىنىڭ دەمەۋشىلىگىمەن جارىق كورگەن ديسككە جالپى العاندا 17 تۋىندى ەنگىزىلدى. سونىڭ ىشىندە ءبىرجان سال, ۇكىلى ىبىراي سەكىلدى ارقا انشىلىك مەكتەبى ءىرى وكىلدەرىنىڭ اندەرىمەن قاتار يليا جاقانوۆ, مۇراتحان ەگىنباەۆ, مۇباراق سالىقوۆ سىندى بەلگىلى كومپوزيتورلاردىڭ, انشىلىگى ەلگە ايان بولا وتىرىپ, كومپوزيتورلىق قىرلارىن دا تانىتقان جانىبەك كارمەنوۆ پەن جاقسىگەلدى كەمالوۆتىڭ, ءسوز بەن ساز ونەرىن تەڭ ۇستاعان قويلىباي اسانوۆ, ەرلان تولەۋتاي, امانجول ءالتاي سياقتى رۋحانيات ساربازدارىنىڭ شىعارمالارى ەنگىزىلدى.
قازاقستاننىڭ حالىق ءارتىسى, ءان ءدۇلدۇلى, ۇستاز قايرات بايبوسىنوۆ كەزىندە جۇسىپبەك ەلەبەكوۆتەن ءتالىم السا, ءوزى بۇگىنگى بۋىن انشىلەرىنىڭ تالايىن تاربيەلەپ شىعاردى. ەرجان بازاربەكوۆ تە ونىڭ شاكىرتى. وسى شاراعا ايگىلى ءانشى ارنايى قاتىسىپ, شاكىرتىنە اق تىلەگىن ءبىلدىردى. وسىنداي ورتادا ارقالانىپ, «ءاۋ» دەپ جىبەردى.
بۇعان قوسا, بەلگىلى ماتەماتيك عالىم, عىلىمعا ولشەۋسىز ەڭبەك سىڭىرگەنى ءۇشىن «عاسىر ادامى» اتانعان تەمىرعالي كوكەتاەۆ, جازۋشى كامەل ءجۇنىستەگى, قازاق تەلەۆيزياسىنىڭ ارداگەرى ءابدىرالى بولەباي, ءانشى, ونەر زەرتتەۋشى, قازاقستاننىڭ ەڭبەك سىڭىرگەن ءارتىسى سەرىك وسپانوۆ, تانىمال اقىن, مەملەكەتتىك سىيلىقتىڭ يەگەرى, ەلورداداعى س.سەيفۋللين مۇراجايىنىڭ ديرەكتورى نەسىپبەك ايتۇلى قاتارلى باسقا دا ازاماتتار ىزگى لەبىزدەرىن جەتكىزدى.
