تۇڭعىش پادەل ورتالىعى اشىلدى
الەمدە 70-ءىنشى جانە قازاقستاندا العاش رەت پادەل سپورتى ىسكە قوسىلدى. ورتالىقتىڭ سالتاناتتى اشىلۋىنا استانا قالاسى اكىمىنىڭ ورىنباسارى ەسەت بايكەن, يسپانيانىڭ قازاقستانداعى توتەنشە جانە وكىلەتتى ەلشىسى حورحە ۋربيولا لوپەس دە مونتەنەگرو, رەسەي پادەل فەدەراتسياسىنىڭ پرەزيدەنتى انتون بەرناتسكي, بوكستان لوندون وليمپياداسىنىڭ چەمپيونى سەرىك ساپيەۆ قاتىستى.
«بارشاڭىزدى ەلىمىزدەگى العاشقى پادەل ورتالىعىنىڭ اشىلۋىمەن قۇتتىقتايمىن. مەملەكەت باسشىسى قاسىم-جومارت توقاەۆ ءاردايىم بۇقارالىق سپورتتىڭ دامۋىنا كوڭىل بولۋدە. پادەل ورتالىعىنىڭ اشىلۋى ەلوردامىزدىڭ 25 جىلدىعىمەن تۇسپا-تۇس كەلىپ وتىر. اتالمىش سپورتپەن قالا تۇرعىندارى شۇعىلدانۋى ارقىلى تەك قانا ەلىمىزدە عانا ەمەس, الەمدىك دەڭگەيدەگى كوشباسشىلاردىڭ بىرىنە اينالادى دەپ سەنەمىن» دەدى ەسەت بايكەن.
پادەل ورتالىعى قابانباي باتىر داڭعىلىنداعى 47/1-ۇيدە, ۇستەل تەننيسى ورتالىعى عيماراتىنىڭ ارتىندا ورنالاسقان. پادەل فەدەراتسياسىنىڭ باس حاتشىسى ارسلان ابىلعازين بۇل سپورت ءتۇرى جاس تاڭدامايتىنىن ايتادى.
«بۇقارالىق جانە بالالار سپورتىن دامىتۋ ماقساتىندا ەلىمىزگە جاڭا سپورت ءتۇرى – پادەلدى اكەلۋدى ءجون كوردىك. جارتى جىلدان استام ۋاقىتتا ءارتۇرلى قيىندىققا قاراماستان, استانا قالاسىندا العاشقى 4 پادەل كورتىن ورناتتىق. ءبىز بۇل كورتتاردى يسپانيادان جاساتىپ اكەلدىك. بۇل سپورتتىڭ ەرەكشەلىگى, جاس تاڭدامايدى. كەز كەلگەن ادام 1-2 ويناعاننان كەيىن-اق ۇيرەنىپ كەتەدى. وسى ورايدا ەلىمىزدەگى العاشقى باپكەرلەردى رەسەيدە دايىنداپ, 1 جاتتىقتىرۋشىنى يسپانيادان اكەلدىك. ءبىزدىڭ ماقساتىمىز – پادەلدى ەل ىشىندە تانىمال سپورت تۇرىنە اينالدىرۋ. الداعى ۋاقىتتا الماتى قالاسىندا جانە وبلىس ورتالىقتارىندا پادەل ورتالىعىن اشۋدى جوسپارلاپ وتىرمىز» دەگەن ويىمەن ءبولىستى ول.
پادەلدىڭ بارلىق قۇرالى ۇستەل تەننيسى ورتالىعىندا ساتىلادى. كورتتا ويناۋدىڭ 1 ساعاتى شامامەن 6-7 مىڭ (باپكەرمەن 10 مىڭ) تەڭگەنى قۇرايدى.