كارانتين ءتارتىبىنىڭ ۇنەمى بۇزىلۋىنا بايلانىستى ەلورداداعى بىرقاتار ويىن-ساۋىق مەكەمەلەرىنىڭ جۇمىسى توقتاتىلۋى مۇمكىن. قازىرگى تاڭدا نۇر-سۇلتان قالاسى مامانداندىرىلعان اۋدانارالىق اكىمشىلىك سوتىنا 8 ءىس قاراۋعا جىبەرىلدى.
ارنايى تەكسەرىستەن كەيىن «Alanya» تۇنگى كلۋبى مەن «Janym Sol» كاراوكە-بارىنىڭ جۇمىسىن توقتاتۋ تۋرالى شەشىم قابىلداندى. سونداي-اق «SOVA» كاراوكە-بارىنا, «Echo» بارىنا, «ZOLOTO» مەيرامحاناسىنا, «ستوريس» دەمالىس ورنىنا قاتىستى ءىس ءالى دە قاراستىرىلۋدا. ال «Teqila» لاۋندج-بارىنا ەكى حاتتاما تولتىرىلدى.
– وتكەن دەمالىس كۇندەرى تىزىمدە كورسەتىلگەن بىرقاتار نىساندارعا قاتىستى بىرنەشە رەت جەدەل حابارلامالار كەلىپ ءتۇستى. جوسپاردان تىس تەكسەرۋلەر جۇرگىزىلدى. ناتيجەسىندە زاڭ بۇزۋشىلىق فاكتىلەرى راستالىپ, ءىس-قاعازدار اكىمشىلىك سوتقا قوسىمشا دالەل رەتىندە جىبەرىلدى, – دەدى نۇر-سۇلتاننىڭ باس مەملەكەتتىك سانيتارلىق دارىگەرى جاننا پىراليەۆا.
سونىمەن قاتار مەرەكە كۇندەرى «Mega Silk Way» ساۋدا, ويىن-ساۋىق كەشەنىندەگى «Kango» باتۋت ورتالىعى مەن تۇران داڭعىلى, 21 مەكەنجايىنداعى «Icon» كلۋبىنىڭ ەرەجە بۇزعانى تۋرالى اقپارات ءتۇستى. بۇعان دەيىن اتالعان نىساندارعا زاڭ بۇزۋشىلىقتى جويۋ تۋرالى ەسكەرتۋلەر جاسالعان ەدى. ەندى بۇيرىقتى ورىنداماعانى ءۇشىن قۇقىق بۇزۋشىلىق تۋرالى حاتتاما اكىمشىلىك سوتتىڭ قاراۋىنا جىبەرىلەدى.
