استانا قالاسى ىشكى ساياسات باسقارماسى «ەكسپو-2017» حالىقارالىق مامانداندىرىلعان كورمەسىن وتكىزۋ كەزىندەگى قالاداعى تۇراق ورىندارى تۋرالى اقپارات بەردى.
«استانا LRT» جشس كولىك تۇرلەرىن ەسكەرە وتىرىپ, قانشا تۇراق كەڭىستىگى قاجەت ەكەندىگىن ەسەپتەدى. ساراپتاما «استانا ەكسپو-2017» ۇك» اق ۇسىنعان رەسمي مالىمەتتەردىڭ نەگىزىندە جۇرگىزىلدى.
سونىمەن, تالداۋعا سايكەس, كورمەگە ءبىر كۇندە ەڭ كوپ دەگەندە 128 700 ادام باس سۇعادى, دەمالىس كۇنى – 78 800, جۇمىس كۇنى 39 400 ادام كەلەدى. ال بۇكىل كورمە ۋاقىتىندا (93 كۇندە) 7 كۇن – ەڭ قاۋىرت كۇن, 24 – دەمالىس كۇنى جانە 62 – جۇمىس كۇنى بولماق.
«ەكسپو تىركەۋ قۇجاتتاماسىنا سايكەس كولىك تۇرلەرى مەن قوزعالىس قۇرالى بويىنشا ساراپتاما جاسالدى. سايكەسىنشە, كەلۋشىلەردىڭ شامامەن 50 پايىزى قوعامدىق كولىكتى پايدالانادى, ولاردىڭ 36,3 پايىزى قالالىق اۆتوبۋستارمەن, 6,3 پايىزى ەكسپرەسس-اۆتوبۋستارمەن, 14,1 پايىزى حالىقارالىق اۆتوبۋستارمەن, 2 پايىزى تاكسيمەن, 33,3 پايىزى جەكە كولىكپەن كەلەدى. بۇل ەسەپ ادام ەڭ كوپ كەلەتىن كۇندەر بويىنشا جاسالعان» دەلىنگەن حابارلامادا.
«استانا LRT» ماماندارىنىڭ بولجامىنشا, ەڭ قاۋىرت كۇنى كورمەگە جەكە كولىگىمەن 41 300 ادام كەلەدى, ونىڭ 27 500-ءى ءبىر مەزەتتە كەلەدى. دەمەك, بۇل كۇنى قاجەتتى تۇراق ورنىنىڭ سانى – 11 071.
ال ساۋدا ورتالىقتارىنداعى تۇراقتى قوسا العاندا, كورمە اۋماعىندا جەكە كولىككە ارنالعان 6 مىڭ تۇراق ورنى قاراستىرىلعان. تولىعىراق ايتساق, 4300 تۇراق – ەكسپو اۋماعىندا, ال 1700 تۇراق – ساۋدا ورىندارىندا. «ناتيجەسىندە قاۋىرت كۇندەرى تۇراق ورنى تاپشىلىعى – 5 071, دەمالىس كۇندەرى 791 بولادى» دەيدى «استانا LRT» وكىلدەرى.
ەكسپو اۋماعىندا قالاارالىق اۆتوبۋستارعا 147 تۇراق ورنى, 200 تۇراق ورنى بار VIP-تۇراق (كونگرەسس-كەشەن استىندا), 180 تۇراق ورنى ەسەپتەلگەن تاكسيگە ارنالعان تۇراقتار, ءورت ءسوندىرۋ, جەدەل جاردەم, قۇقىق قورعاۋ ورگاندارى قىزمەتتەرىنە ارنالعان 390 تۇراق ورنى, باق اۆتوكولىگىنە ارنالعان 130 تۇراق ورنى قاراستىرىلعان.
تۇراق كەڭىستىگى قاجەتتىلىگىن قامتاماسىز ەتۋ اياسىندا (قاۋىرت كۇنى 5 مىڭ تۇراق ورنى جەتىسپەيتىن بولادى) شاتتل باستاردى ۇيىمداستىرۋ ارقىلى ءىلىپ اكەتۋ تۇراقتارىن قولدانۋ قاراستىرىلۋدا.
ەكسپو كەشەنىنە جاقىنىراق اۋماقتا مىنا جەرلەردە تۇراقتار بار: ورىنبور كوشەسىنىڭ بويىندا – 1377 تۇراق ورنى (2,5 شاقىرىم قاشىقتىقتا ورنالاسقان), تۇران داڭعىلى بويىندا – 745 تۇراق ورنى (2,7 شاقىرىم قاشىقتىقتا ورنالاسقان), «استانا ارەنا» – 1600 تۇراق ورنى (2 شاقىرىم قاشىقتىقتا ورنالاسقان), «بارىس ارەنا» – 700 تۇراق ورنى (2,7 شاقىرىم قاشىقتىقتا ورنالاسقان), 31-كوشە/ماڭگىلىك ەل كوشەسى – 2400 تۇراق ورنى, «قازاقستان» سك – 1200 تۇراق ورنى (8 شاقىرىم قاشىقتىقتا ورنالاسقان). بارلىعى 8022 تۇراق ورنى بار. ەكسپو اۋماعىنداعى تۇراقتاردى قوسا العاندا, 14022 تۇراق ورنى بولادى. بۇل قاۋىرت كۇنى قاجەت تۇراق سانىن تولىقتاي قامتاماسىز ەتەدى.
استانا قالاسىنىڭ اكىمى اسەت يسەكەشەۆتىڭ تاپسىرماسىنا سايكەس, كورمەگە كەلۋشىلەر قاتارى كوبەيگەن جاعدايدا, قالا اۋماعىندا 3000 قوسىمشا تۇراق ورىندارىن ۇيىمداستىرۋ ماسەلەسى قاراستىرىلدى. اتاپ ايتساق, وقۋشىلار سارايىندا – 400, بەيبىتشىلىك جانە كەلىسىم سارايىندا – 300, قالالىق پاركتە – 350, استانالىق تسيركتە – 350, «دۋمان» ويىن-ساۋىق ورتالىعىندا – 450, «Music Hall» رەستورانىندا – 300, «حان شاتىر» ساۋدا ورتالىعىندا – 1100 جانە «الاتاۋ» سپورت كەشەنىندە 100 تۇراق ورنى پايدالانۋعا بەرىلەدى. «بارلىعى 3350 تۇراق ورنى بولادى» دەيدى كومپانيا قىزمەتكەرلەرى. وسىلايشا, قالا اۋماعىندا 11 372 تۇراق ورنى بولادى.
«جالپى العاندا, تالداۋ جۇمىستارى ۇسىنىلعان شەشىمدەر قاۋىرت كۇندەرى دە, قوسىمشا جۇكتەمە تۇسەتىن كۇندەرى دە تۇراق ورنى قاجەتتىلىگىن وتەيتىنىن كورسەتتى» دەپ قورىتىندى جاسادى «استانا LRT» وكىلدەرى.
گۇلدانا تالعاتقىزى
