ەلوردادا ماۋسىمنىڭ 15-16-سى كۇندەرى «جاڭا ەنەرگيا – جاڭا ەكونوميكا» دەگەن تاقىرىپپەن X استانا ەكونوميكالىق فورۋمى بولىپ ءوتتى. وعان 100 ەلدەن كەلگەن 4 مىڭنان اسا دەلەگات قاتىستى. ولاردىڭ اراسىندا ساياساتكەرلەر, ەكونوميستەر جانە حالىقارالىق ۇيىمداردىڭ وكىلدەرى بار.
استانا ەكونوميكالىق فورۋمىنىڭ باستى قورىتىندىسى تۇراقتى ءوسىمدى قامتاماسىز ەتۋگە باعىتتالعان ەكونوميكالىق ساياسات جۇرگىزۋ جونىندەگى نەگىزگى كەپىلدەمەلەردى ۇسىناتىن قۇجات بولدى. بۇل جيىندا ءارتۇرلى فورماتتا وتكىزىلگەن 40 سەسسيادا قارالعان وزەكتى ماسەلەلەردىڭ مازمۇندارىنان ءتۇزىلىپ الىندى.
فورۋمنىڭ ءبىرىنشى كۇنى قاتىسۋشىلار الەمدىك ەكونوميكانىڭ تسيفرلىق ترانسفورماتسياسى, «جاسىل» قارجىلاندىرۋ مەن ينۆەستيتسيالار, جاھاندىق ساۋدا درايۆەرى جانە ونىڭ قۇرىلىمى, تۇراقتى ەكونوميكالىق وسۋگە قول جەتكىزۋ, ازىق-تۇلىك قاۋىپسىزدىگى, بولاشاقتاعى «اقىلدى» جانە تۇراقتى قالالار, مەملەكەتتەردىڭ «جاسىل» ەكونوميكاعا كوشۋ جاعدايىنداعى باسىمدىلىقتار, مىندەتتى الەۋمەتتىك ساقتاندىرۋ ماسەلەلەرى بويىنشا پىكىر الماسىپ, وي ءبولىستى. سونىمەن قاتار, جيىن شەڭبەرىندە IV حالىقارالىق كولىكتىك-لوگيستيكالىق بيزنەس-فورۋمى وتكىزىلىپ, وسى ماسەلە توڭىرەگىندە قوردالانىپ قالعان پروبلەمالاردىڭ جايىنا توقتالدى.
– استانا ەكونوميكالىق فورۋمى كەلەشەكتە ورتالىق ازيا ەلدەرى ءۇشىن اسا ماڭىزدى بولىپ سانالاتىن بارلىق ماسەلەلەردى اشىق تالقىلايتىن ۇلكەن الاڭعا اينالادى, – دەدى جيىننىڭ سوڭىندا «برەتتون-ۆۋدس» جاڭارتۋ جونىندەگى كوميتەتىنىڭ نەگىزىن قالاۋشى جانە ونىڭ ديرەكتورى مارك ۋزان. – بۇدان اتالمىش ايماق مەملەكەتتەرى زور پايدا تابادى. ءبىز ەندى «جاھاندانۋدىڭ ءالى انىقتالماعان بەلگىلەرى» دەگەن تاقىرىپتا ۇلكەن كونگرەسس وتكىزگىمىز كەلىپ وتىر. سەبەبى جاھاندانۋ ماسەلەسى قازىر ساياسي شەشىمدەر قابىلداۋشىلار اراسىندا كۇن تارتىبىنە قويىلىپ وتىر.
فورۋم بارىسىندا جاھان ەكونوميكاسىنىڭ قازىرگى احۋالى مەن بولاشاعىنا قاتىستى ماسەلەلەر جونىندە كەڭ اۋقىمدى پىكىرتالاستار ورىن الدى. ول بۇگىندە پايدا بولىپ وتىرعان بىرقاتار كەدەرگىلەر جاعدايىندا جاقىن جىلداردا ەكونوميكانى تۇراقتى دامىتۋعا قالاي قول جەتكىزۋگە بولاتىنى جايىندا ماسەلە كوتەردى. ساراپشىلار وسى ورايدا دامىعان جانە دامۋشى نارىقتاردىڭ ساۋداداعى, ينۆەستيتسيا مەن ءوندىرىستەگى باياۋ ءوسىمنىڭ قيىندىقتارىن باستان كەشىپ وتىرعانىن اتاپ كورسەتتى. قاتىسۋشىلار الەم ساۋداسى مەن تاۋار وندىرۋشىلەرىنىڭ باياۋ دامۋىنا, سونداي-اق سىبايلاستىققا بايلانىستى تۋىنداپ وتىرعان كەدەرگىلەردى جەڭۋدىڭ جولدارىن تالقىلادى.
فورۋمنىڭ ەكىنشى كۇنى, نەگىزىنەن, قازاقستان ەكونوميكاسىنا قاتىستى ماسەلەلەردى تالقىلاۋعا ارنالدى. ول پلەنارلىق ماجىلىستەر تۇرىندە ءوربىدى. بۇل كۇنگى جيىنعا قازاقستان پرەزيدەنتى نۇرسۇلتان نازارباەۆ قاتىستى. كەشە مەملەكەت باسشىسى, سونداي-اق, فورۋمعا كەلگەن نوبەل سىيلىعىنىڭ لاۋرەاتتارىمەن جانە الەمنىڭ بەدەلدى عالىمدارىمەن كەزدەستى.
ەلباسى ءوزىنىڭ سوزىندە قوناقتاردىڭ قازاقستان ءۇشىن ماڭىزدى ۋاقىتتا كەلگەنىنە نازار اۋدارىپ ءوتتى. «بۇگىن ءبىز «ەكسپو-2017» كورمەسىنىڭ اياسىندا وسى كەزدەسۋدى وتكىزىپ وتىرمىز. بۇل كورمەنى قازاقستان ۇتىپ الىپ, جاقىندا سالتاناتتى تۇردە اشتى. وعان الەمنىڭ 155 مەملەكەتى مەن 22 حالىقارالىق ۇيىم قاتىسىپ جاتىر. ولار وزدەرىنىڭ جاڭا تەحنولوگيالارىن كورسەتەتىن بولادى. تاقىرىپ – جاڭا ەنەرگەتيكا. بۇل تۋرالى قازىرگى تاڭدا بۇكىل الەم ايتۋدا. كورمەنىڭ ارقاسىندا قازاقستان جاڭا تەحنولوگيالار بويىنشا الەمنىڭ نازارىن وزىنە قاراتىپ وتىر. ءبىز وسى فورۋمدا جاڭا ەنەرگيا مەن جاڭا ەكونوميكا ماسەلەلەرىن تالقىلايمىز» دەدى مەملەكەت باسشىسى.
استانا ەكونوميكالىق فورۋمى قازىرگى تاڭدا كۇللى الەم ءۇشىن اسا ماڭىزدى بولىپ وتىرعان ەكونوميكالىق ءوسىمدى تۇراقتى قالىپقا جەتكىزۋ جونىندەگى ماسەلەنى تالقىلاۋىمەن ەرەكشە ەستە قالاتىن بولادى.
سەرىك ءپىرنازار
