نۇر-سۇلتان قالاسىندا ەلوردا اكىمى, «Amanat» پارتياسى قالالىق فيليالىنىڭ توراعاسى التاي كولگىنوۆتىڭ قاتىسۋىمەن ساياسي كەڭەس وتىرىسى ءوتتى. كۇن تارتىبىندە 2022 جىلعى 26 ساۋىردە بولاتىن پارتيانىڭ كەزەكتەن تىس XXIII قۇرىلتايىنا نۇر-سۇلتان قالالىق فيليالىنان 31 دەلەگاتتى سايلاۋ تۋرالى ماسەلە قارالدى.
سونىمەن قاتار پارتيانىڭ قالالىق فيليالىنىڭ توراعاسى التاي كولگىنوۆ ساياسي كەڭەس مۇشەلەرىن پارتيا توراعاسىنىڭ كەزەكتەن تىس XXII قۇرىلتايدا بەرگەن تاپسىرماسى اياسىندا ەلوردادا جۇرگىزىلىپ جاتقان جۇمىستار بويىنشا حاباردار ەتتى. قوعامدىق كەڭەستەردىڭ قىزمەتىن وڭتايلاندىرۋ ماقساتىندا جەكەلەگەن قوعامدىق كەڭەستەر بىرىكتىرىلىپ, ولاردىڭ سانى 11-دەن 9-عا دەيىن ازايعان. بيىل قوعامدىق كەڭەستەردىڭ 13 وتىرىسى وتكىزىلىپ, وندا 38 ماسەلە, ونىڭ ىشىندە پارتيانىڭ سايلاۋالدى باعدارلاماسىن ورىنداۋ بويىنشا 4 ماسەلە قارالدى.
پارتيا فيليالىنىڭ قوعامدىق قابىلداۋى دا جاڭا فورماتتا جۇمىس ىستەي باستادى. اعىمداعى جىلدىڭ ناۋرىز ايىنان باستاپ «ءوندىرىس», «كوكتال-2», «وڭتۇستىك-شىعىس», «كيرپيچنىي», «پريگورودنىي», «تەلمان» تۇرعىن الاپتارىندا 6 موبيلدىك قوعامدىق قابىلداۋ وتكىزىلدى. جالپى جىل باسىنان بەرى ەلوردانىڭ 1,4 مىڭعا جۋىق تۇرعىنى فيليالدىڭ قوعامدىق قابىلداۋ بولمەسىنە ءوتىنىش بىلدىرگەن. سونىڭ 48 پايىزى وڭ شەشىمىن تاپتى, 46 پايىزى بويىنشا تۇسىنىكتەمە بەرىلدى جانە 6 پايىزى بويىنشا جۇمىس اتقارىلۋدا.
قالالىق ماسليحاتتاعى «Amanat» دەپۋتاتتىق فراكتسياسىنىڭ جۇمىسىن جانداندىرۋ بويىنشا جۇمىستار جۇرگىزىلۋدە. ءاربىر دەپۋتاتقا باقىلاۋ جاساۋ ءۇشىن قالانىڭ تۇرعىن الاپتارى جانە سايلاۋالدى باعدارلامانىڭ ورىندالۋى بويىنشا جول كارتاسىنىڭ تارماقتارى بەكىتىلگەن. دەپۋتاتتار قالا تۇرعىندارىمەن تۇراقتى تۇردە كەزدەسۋلەر وتكىزۋدە. پارتيانى ترانسفورماتسيالاۋ شەڭبەرىندە جينالعان پارتيالىق جارنالاردىڭ 20 پايىزى پارتيالىق ءىس-شارالاردى وتكىزۋ, ونىڭ ىشىندە تۇرمىسى تومەن وتباسىلارعا كومەك كورسەتۋ ءۇشىن باستاۋىش پارتيا ۇيىمدارىنا قايتارىلادى. قۇرىلتاي بارىسىندا «Adal» ساياسي پارتياسىنىڭ «Amanat» پارتياسىنا قوسىلۋى تۋرالى ماسەلە قارالادى دەپ جوسپارلانۋدا.
