جاقىندا ر.قوشقارباەۆ, 80/1 مەكەنجايى تۇرعىندارى نۇر-سۇلتان قالاسى ءماسليحاتىنىڭ دەپۋتاتى ميراس شەكەنوۆكە وتىنىشتەرىن جولدادى. كوپبالالى جانە تۇرمىسى تومەن وتباسىلارعا ارناپ سالىنعان تۇرعىن ءۇيدىڭ جەرتولەلەرىن جوندەۋ قاجەتتىلىگى تۋىندادى. دەپۋتاتتىڭ سەپ بولۋىمەن بيۋدجەتتەن ءتيىستى جۇمىستارعا 37,5 ملن تەڭگە بولىنەتىن بولدى. بيۋدجەتتى ناقتىلاعاندا دەپۋتاتتار ءدال وسىنداي كولەمدەگى قارجىنى باعدارلاما اكىمشىسى قالالىق تۇرعىن ءۇي جانە تۇرعىن ءۇي ينسپەكتسياسىنا ءبولۋدى قولدادى.
اتالعان مەكەنجايداعى تۇرعىن ءۇيدىڭ سالىنعانىنا كوپ ۋاقىت بولا قويماسا دا, م.شەكەنوۆ جاۋاپتى مەكەمە وكىلدەرىمەن بىرگە جاعدايمەن تانىسۋ ءۇشىن تۇرعىندارمەن كەزدەسكەندە, جەرتولەلەرگە كۇردەلى جوندەۋ كەرەكتىگىنە كوز جەتكىزدى.
تۇرعىن ءۇيدىڭ جەرتولەلەرىن سۋ باسادى. وسىنداي جاعداي جىلدا قايتالانادى. سونىڭ سالدارىنان پودەزدەردە عانا ەمەس, پاتەرلەردە دە دىمقىلدىق سەزىلەدى. قابىرعالار كوگەرىپ, وندا ساڭىلاۋلار پايدا بولعان. ىرگەتاستىڭ گيدرووقشاۋلاۋ جۇيەسى دە ناشار. ىرگەتاسى ءتۇسىپ كەتكەندىكتەن, جەرتولە قابىرعالارى سوگىلگەن. ءۇيدى سالعان قۇرىلىس كومپانياسى قاتەلەردى جىبەرگەن. سونداي اعاتتىقتار سۋاعار جۇيەسى مەن درەناج مونتاجدالعاندا كەتكەن. جالپى العاندا, جەرتولەلەر ساپاسىز سالىنعان.
دەپۋتات ءمان-جايعا قانىققان سوڭ, بيۋدجەتتى كەزەكتى ناقتىلاۋ كەزىندە ماسەلە كوتەردى. ونىڭ ۇسىنىسى قابىلدانىپ, تۇرعىن ءۇي جانە تۇرعىن ءۇي ينسپەكتسياسى باسقارماسىنا جالپى 95 ملن تەڭگە بولىنسە, ونىڭ 37,8 ميلليونى بۇل ءۇيدىڭ جەرتولەلەرىن جوندەۋگە جۇمسالاتىن بولدى. قازىرگى كەزدە الماتى اۋدانىنىڭ اكىمدىگى جەرتولەلەردەن سۋدى سورۋدى جۇرگىزىپ جاتىر.
ارينە, ءتيىستى جۇمىستاردى سۋىق تۇسكەنشە اياقتاۋ كەرەك. ءماسليحات دەپۋتاتتارى وسىعان نازار اۋداردى. تۇرعىن ءۇي جانە تۇرعىن ءۇي ينسپەكتسياسى باسقارماسىنداعىلار ۋاقىتشا سورعىلار ورناتىلعانىن, ازىرگە ولار دۇرىس جۇمىس ىستەپ جاتقانىن جەتكىزدى. قارجى اۋدارىلعاننان كەيىن مەردىگەرلەر اراسىندا اعىمداعى جوندەۋدى وتكىزۋگە كونكۋرس جاريالانادى. بارلىق جۇمىستار قازان ايىنىڭ اياعىنا دەيىن اياقتالماق. م.شەكەنوۆ اتقارىلاتىن جۇمىستاردىڭ كەستەسىن سۇراپ, ءۇي پروبلەمالارىن شەشۋ ماسەلەسىن جەكە باقىلاۋىنا الدى.
