قالا اكىمى التاي كولگىنوۆ ازاماتتاردى كەزەكتى رەت ونلاين قابىلدادى. وسىلايشا بيىل ءبىر جىلدا ەلوردا اكىمى ارىپتەستەرىمەن بىرگە 5 مىڭنان استام قالا تۇرعىنىن قابىلدادى.
«قالا ءوز تۇرعىندارىنىڭ قاتىسۋىمەن دامىپ كەلەدى. ازاماتتاردى قابىلداۋدا, كەزدەسۋلەردە, قالانى ارالاۋ بارىسىندا, الەۋمەتتىك جەلىلەر ارقىلى تۇرعىنداردىڭ ەلوردامىزدى دامىتۋعا قاتىستى ۇسىنىستارىن قابىلدايمىز. سۇراقتار الەۋمەتتىك نىساندار قۇرىلىسىنا دا, جول ينفراقۇرىلىمىنا دا, اباتتاندىرۋعا, تۇرعىن ءۇي الاپتارىن دامىتۋعا جانە ت. ب. قاتىستى. بيىل بىرقاتار ماسەلە شەشىلدى. 10 مىڭ الەۋمەتتىك پاتەر, 40 مىڭ وقۋشى ورنىنا ارنالعان 15 مەكتەپ سالىندى, «ءۇي ماڭىنداعى دارىگەر» نىساندارى اشىلدى, وڭالتۋ ورتالىقتارى مەن اۋلا كلۋبتارىنىڭ جەلىسى كەڭەيتىلدى, 100-دەن استام كوشە سالىنىپ, جوندەلدى, 9 ەلدى مەكەنگە گاز تاراتۋ جەلىلەرى جۇرگىزىلدى جانە ت. ب. ازاماتتاردى قابىلداۋ كەزىندە كەلىپ تۇسكەن ماسەلەلەردى ەسكەرە وتىرىپ, كەلەسى جىلعا الدىن الا جوسپار دايىندالادى» دەدى قالا اكىمى.
مەملەكەت باسشىسىنىڭ «حالىق ۇنىنە قۇلاق اساتىن مەملەكەت» تۇجىرىمداماسى اياسىندا ءوزارا بايلانىستى نىعايتۋعا الەۋمەتتىك ورتالىقتار دا كومەكتەسەدى. ولاردىڭ قاتارىندا «جانۇيا» وتباسى ينستيتۋتىن قولداۋ ورتالىعى, تۇرعىن ءۇي سالاسىندا قىزمەت كورسەتەتىن بىرىڭعاي ورتالىق, iQala ورتالىعى, جاستارعا قىزمەت كورسەتۋ ورتالىعى بار. بيىلدىڭ وزىندە اتالعان ورتالىقتار قالا تۇرعىندارىنىڭ 150 مىڭنان استام ءوتىنىشىن وڭدەدى.
