«استانا» كونتسەرت زالىندا كسرو حالىق ءارتىسى, اسا كورنەكتى كومپوزيتور كارا كاراەۆتىڭ تۋعانىنا 100 جىل تولۋىنا ارنالعان كونتسەرت ءوتتى. استانا اكىمدىگى, «تۇركسوي» حالىقارالىق ۇيىمى جانە قازاقستانداعى ازەربايجان رەسپۋبليكاسىنىڭ ەلشىلىگى بىرلەسىپ ۇيىمداستىرعان كەشتە كومپوزيتوردىڭ شىعارمالارى ورىندالدى. كونتسەرتكە استانا اكىمىنىڭ ورىنباسارى ەرمەك امانشاەۆ, «تۇركسوي» باس حاتشىسى دۇيسەن قاسەيىنوۆ قاتىستى.
كارا كاراەۆتىڭ شىعارماشىلىق مۇراسى مۋزىكا ونەرىنىڭ بارلىق جانرلارىن قامتيدى. كومپوزيتور 3 وپەرا, 3 سيمفونيا, 3 بالەت, كامەرالىق, اسپاپتىق مۋزىكاعا ارنالعان كوپتەگەن شىعارمالاردى, كينو مەن تەاترعا ارنالعان تۋىندىلاردى جازدى. استانانىڭ مەملەكەتتىك اكادەميالىق فيلارمونياسىنىڭ سيمفونيالىق وركەسترى مۋزىكامەن سۇيەمەلدەگەن كەش كورەرمەندەرى ونىڭ «ءلايلى-ءماجنۇن» سيمفونيالىق پوەماسىن, «نايزاعاي سوقپاعىمەن» بالەتىنەن №2 سيۋيتانى, «ۆالس» تۋىندىسىن, كومپوزيتوردى الەمدىك دەڭگەيدە تانىتقان «جەتى سۇلۋ» بالەتىنەن «قاس سۇلۋ» شىعارماسىن تىڭدادى. وركەسترگە «تۇركسوي» ۇيىمى كامەرالىق وركەسترىنىڭ مۇشەلەرى مۇستافا مەحمانداروۆ پەن مۇرتازا بۇلبۇل ديريجەرلىك ەتتى.
«كارا كاراەۆ» – جالعىز ازەربايجاننىڭ ماقتانىشى ەمەس, ءبىرتۇتاس تۇركى الەمىنىڭ ماقتانىشى. سوندىقتان بيىل «تۇركسوي» كومپوزيتوردىڭ جىلىن جاريالاپ, ۇيىمعا مۇشە ەلدەردىڭ بارىندە وسىنداي كونتسەرتتەردى وتكىزىپ جاتىرمىز. بۇعان قوسا, تۇركى دۇنيەسىنەن تىس ماسكەۋدە, سانكت-پەتەربۋرگتە, ەۋروپادا ءوتتى» دەدى دۇيسەن قاسەيىنوۆ.
ونى قوستاعان ەرمەك امانشاەۆ قالا اكىمدىگى اتىنان وسى كونتسەرتتى ۇيىمداستىرۋشىلارعا العىس ايتىپ, «تۇركسويدىڭ» تۇركى الەمىن ناسيحاتتاۋداعى ەڭبەگىن اتاپ ءوتتى. كەشتىڭ سوڭىندا قاتىسۋشىلارعا ەستەلىك سىيلىقتار تاپسىرىلدى.
