مەملەكەت باسشىسى ن.نازارباەۆ تۇركىستان وبلىسىنا ساپارى بارىسىندا جاڭا اكىمشىلىك ورتالىقتى دامىتۋ جوباسىمەن تانىستى. سونداي-اق «ازىرەت سۇلتان» تاريحي-مادەني قورىق-مۋزەيىنىڭ اۋماعىندا ورنالاسقان قوجا احمەت ياساۋي كەسەنەسىن ارالاپ كوردى جانە ءوڭىردىڭ الەۋمەتتىك-ەكونوميكالىق دامۋ ماسەلەلەرى جونىندە كەڭەس وتكىزدى.
ەلباسى تۇركىستاننىڭ جاڭا اكىمشىلىك ورتالىعىنىڭ اۋماعىن ارالاپ كورىپ, مەموريالدى تاس قالاۋ راسىمىنە قاتىستى. وسى جەردە وبلىس اكىمى جانسەيىت تۇيمەباەۆ جاڭا وبلىس ورتالىعىنىڭ دامۋ پەرسپەكتيۆالارى تۋرالى باياندادى. مەملەكەت باسشىسىنا تۇركىستاننىڭ تاريحي-مادەني ورتالىعىن قايتا جاڭعىرتۋ اياسىندا «ازىرەت سۇلتان» قورىق-مۋزەيىنىڭ دامۋ جوسپارى تانىستىرىلدى.
ەلباسى وسى ساپار بارىسىندا تۇركىستان قالاسىن تۇركى الەمىنىڭ مادەني-رۋحاني ورتالىعى رەتىندە دامىتۋ جونىندەگى باس جوسپاردىڭ تۇجىرىمداماسىن ماقۇلداۋ تۋرالى جانە ءبىر اي مەرزىمدە «TURKISTAN» ارنايى ەكونوميكالىق ايماعىن قۇرۋ تۋرالى جارلىقتارعا جاريا تۇردە قول قويدى.
ن.نازارباەۆ سوڭىنان وبلىس جۇرتشىلىعىمەن جانە تۇركىستان قالاسىنىڭ تۇرعىندارىمەن كەزدەستى. ول جۇرتشىلىق الدىندا سويلەگەن سوزىندە تۇركىستان وبلىسىن قۇرۋدىڭ جانە ءوڭىر ورتالىعىن تۇركىستان قالاسىنا كوشىرۋدىڭ تاريحي ءارى الەۋمەتتىك-ەكونوميكالىق مانىنە بارلاۋ جاسادى.
پرەزيدەنت سوزىندە تۇركىستاننىڭ كۇللى تۇركى حالىقتارىنىڭ ومىرىندە الاتىن ورنىنىڭ ەرەكشە جوعارى ەكەنىنە دە وي جۇگىرتتى. سوڭىندا نۇرسۇلتان نازارباەۆ تۇركىستاندى تۇلەتۋگە اتسالىساتىن بارلىق تۇرعىندارعا تابىس تىلەدى.
