ەلوردالىق بالالار اۋرۋحاناسىندا تۇركيانىڭ جەتەكشى مامانى بۋراك تاندەردىڭ قاتىسۋىمەن بالالار حيرۋرگياسى بويىنشا حالىقارالىق شەبەرلىك سىنىبى ءوتتى.
شارا نۇر-سۇلتان قالاسىنىڭ №2 كوپبەيىندى قالالىق بالالار اۋرۋحاناسىندا وتكىزىلدى. سونداي-اق الەمنىڭ تۇكپىر-تۇكپىرىندەگى ماماندار ءۇشىن شەبەرلىك سىنىبىنىڭ ونلاين-كورسەتىلىمى ۇيىمداستىرىلدى. العاشقى كۇندەرى شەتەلدىك مامان وتاندىق ارىپتەستەرىمەن بىرگە اسقازان-ىشەك جولدارىنىڭ پاتولوگياسى بار قازاقستاننىڭ ءار جەرىنەن كەلگەن بالالاردى تەكسەردى. بىرنەشە كىشكەنتاي پاتسيەنتكە وتا جاسالدى.
– وتادان كەيىن ءبىز قازاقستاندىق ارىپتەستەرمەن بىرلەسىپ, حيرۋرگيالىق ارالاسۋدىڭ ءاربىر كەزەڭىن ەگجەي-تەگجەيلى تالقىلادىق. مۇنداي ىنتىماقتاستىق ولاردىڭ كاسىبي وسۋىنە وتە قولايلى. ءبارىمىز ءبىر-بىرىمىزدەن بىرنارسە ۇيرەنەمىز. وتالاردىڭ ءساتتى وتكەنىنە قۋانىشتىمىن, – دەدى تۇركيالىق حيرۋرگ بۋراك تاندەر.
بارلىق بالالارعا از ءينۆازيۆتى ادىستەردى قولدانۋ, ياعني مينيمالدى تىلىكتەر مەن تىگىستەر جاساۋ ارقىلى وتا جاسالدى. كەيبىر وتا تاسىلدەرى ءبىزدىڭ ەلىمىزدەگى بالالار حيرۋرگتارىنىڭ تاجىريبەسىندە العاش رەت قولدانىلدى. شەبەرلىك سىنىبى اياسىندا بارلىعى 5 وتا جاسالدى, ونىڭ ىشىندە اسقازان-ىشەك جولدارىنىڭ تۋا بىتكەن اقاۋلارى بار بالالار دا بار.
بۇدان باسقا, قاتىسۋشىلار اسقازان-ىشەك جولدارىنىڭ تۋا بىتكەن اقاۋلارى (گيرشپرۋنگ اۋرۋى), انورەكتالدى دامۋ اقاۋلارى, گەپاتوبيليارلىق حيرۋرگيا, وكپەنىڭ تۋا بىتكەن اقاۋلارى بويىنشا وقىتۋ ءدارىستەرىنە قاتىستى.
– دۇنيە ءبىر ورىندا تۇرمايدى جانە دارىگەرلەردىڭ كاسىبي قۇزىرەتتىلىگىن ارتتىرۋ – وزگە سالالار سەكىلدى بىلىكتىلىكتى راستاۋدىڭ جانە جەتىلدىرۋدىڭ مىندەتتى قۇرالى. مەملەكەت پەن جەرگىلىكتى اتقارۋشى ورگانداردىڭ قولداۋىنىڭ ارقاسىندا بۇگىندە ءبىز شەت ەلدەرگە وقۋعا بارىپ قانا قويماي, قازاقستانعا شەتەلدىك ارىپتەستەرىمىزدى دە شاقىرۋعا مۇمكىندىگىمىز بار. شەبەرلىك كلاسىنىڭ ءۇش كۇنى ىشىندە ماماندارىمىز جاڭا ءبىلىم مەن پراكتيكالىق داعدىلاردى مەڭگەرگەنىنە جانە وسى ءبىلىمدى ولار كەيىننەن بالالاردى ەمدەۋدە قولداناتىندىعىنا سەنىمدىمىن, – دەدى №2 كوپبەيىندى قالالىق بالالار اۋرۋحاناسىنىڭ ديرەكتورى گۇلنار قۇلىشەۆا.
بالالاردىڭ اتا-انالارى ەموتسيالارىن جاسىرا المادى. 15 جاستاعى ناۋقاستىڭ اناسى نارازگۇل ماساعۇتوۆا قازاقستان مەن تۇركيانىڭ جەتەكشى حيرۋرگتارى وتكىزەتىن شەبەرلىك كلاسى تۋرالى الەۋمەتتىك جەلىلەردە وقىعانىن ايتتى. سودان كەيىن جەرگىلىكتى ەمحانادان جولداما الىپ, بالامەن بىرگە استانالىق كلينيكاعا كەڭەس الۋعا كەلدى.
«مەنىڭ بالاما وسىنداي كاسىبي ماماندار وتا جاساعانىنا وتە قۋانىشتىمىن. وسى بالالار اۋرۋحاناسىنا, بارلىق دارىگەرلەرگە, مەملەكەتىمىزگە شىن جۇرەكتەن العىس ايتقىم كەلەدى. بارشاڭىزعا ساتتىلىك پەن دەنساۋلىق تىلەيمىن» دەپ دارىگەرلەرگە العىس ايتتى.
– ءبىرىنشى كۇنى اۋىر سىرقاتى بار ەكى بالاعا وتا جاسالدى. ءبىرىنشى بالاعا از ينۆازيالى وتا – تۇرىك حيرۋرگىنىڭ وزىندىك ادىستەمەسى بويىنشا لاپاروسكوپيالىق حولەتسيستەكتوميا جاسالدى. بۇل بالاعا قالپىنا كەلۋ جاعىنان دا, ەستەتيكالىق جاعىنان دا جاعىمدى اسەر ەتەدى. ەكىنشى جاعدايدا لاپاروسكوپيالىق ەحينوكوككەكتوميا, ياعني تەسىك ارقىلى ەحينوكوككەكتوميا وتاسى جاسالدى. ىستانبۇلدان كەلگەن ارىپتەس وسى وتانى جۇرگىزۋدەگى ءوز تاجىريبەسىمەن ءبولىستى. بۇل ادىسكە قازاقستاندىق بالالار حيرۋرگتارى زور ىقىلاس ءبىلدىردى, – دەيدى №2 كوپبەيىندى قالالىق بالالار اۋرۋحاناسىنىڭ حيرۋرگيالىق بلوك جەتەكشىسى رينات بايگيرەەۆ.
اۋرۋحانا باسشىلىعى ءوز كەزەگىندە دارىگەرلەردىڭ بىلىكتىلىگىن ارتتىرۋ پراكتيكاسىن جالعاستىرۋعا نيەتتى ەكەنىن اتاپ ءوتتى. 2022 جىلدىڭ سوڭىنا دەيىن ۋرولوگيا, ورتوپەديا, نەيروحيرۋرگيا, كومبۋستيولوگيا جانە باسقا دا بەيىندەر بويىنشا بىرقاتار شەبەرلىك كلاستارىن وتكىزۋ جوسپارلانىپ وتىر.
