انكارادا الاش ارىسى احمەت بايتۇرسىنۇلىنىڭ 150 جىلدىعىنا ارنالعان كونفەرەنتسيا ءوتتى. تۇركسوي ۇيىمى ۇيىمداستىرعان القالى جيىنعا قازاقستاننان امانتاي ءشارىپ پەن انار فازىلجان, قىرعىزستاننان مەريم كولباەۆا, ازەربايجاننان ەلچين يبراحيم, وزبەكستاننان ەرگاش ابدۋۆاليتوۆ سەكىلدى بەلگىلى عالىمدار قاتىستى.
كونفەرەنتسيا بارىسىندا ۇلت ۇستازىنىڭ ءومىرى مەن ەڭبەگى جايىندا جان-جاقتى ماعلۇمات بەرىلدى. جيىندى تۇركسوي-دىڭ باس حاتشىسى دۇيسەن قاسەيىنوۆ اشتى.
– احمەت بايتۇرسىنۇلىنىڭ مەرەيتويىنا ارنالعان العاشقى حالىقارالىق كونفەرەنتسيانى ءبىز ۇيىمداستىرىپ وتىرمىز. مۇنىمەن شەكتەلمەيمىز. ۇلت ۇستازىنىڭ 150 جىلدىعى اياسىنداعى شارالار جىل بويى جالعاسادى, – دەدى ول.
جيىن بارىسىندا احمەت بايتۇرسىنۇلى تۋرالى تۇركسوي ۇيىمى تۇرىك تىلىندە دايىنداعان بەينەفيلم كورسەتىلدى. بەلگىلى قالامگەر سەرىكباي وسپانۇلىنىڭ «ۇلت ۇستازى» كىتابىنىڭ تانىستىرىلىمى ءوتتى. بۇل ەڭبەك تۇركسوي ۇيىمىنىڭ قارجىلاي قولداۋىمەن جارىق كوردى. كونفەرەنتسيا ىستانبۇل قالاسىنىڭ ىستانبۇل ۋنيۆەرسيتەتىندە جالعاستى.
