استانا قالالىق قوعامدىق دەنساۋلىق ساقتاۋ دەپارتامەنتى «قاۋىپسىز ءونىمدى تاڭدا» اتتى اكتسيا وتكىزدى. مۇنداي شارا ەلىمىزدىڭ ءار ايماعىندا ءبىر مەزگىلدە ۇيىمداستىرىلىپ وتىر.
«شاپاعات» كوممۋنالدىق بازارىندا ۇيىمداستىرىلعان شارادا تۇتىنۋشىلار وزدەرى ساتىپ العان ازىق-تۇلىكتىڭ ساپاسىن تەكسەرىپ كوردى. ويتكەنى كوپشىلىك ءۇشىن كۇندەلىكتى تۇتىنىپ جۇرگەن ازىق-تۇلىكتىڭ قانشالىقتى ساپالى ەكەنىن ءبىلۋ ماڭىزدى جايت بولسا كەرەك.
– «قاۋىپسىز ءونىمدى تاڭدا» اتتى اكتسيانىڭ ەڭ باستى ماقساتى – قالا تۇرعىندارىن قاۋىپسىز ازىق-تۇلىكپەن قامتاماسىز ەتۋ. ويتكەنى كەي كەزدەرى تۇتىنۋشىلار ساپاسىز ءونىم ساتىپ الىپ, سان سوعىپ جاتاتىنى جاسىرىن ەمەس. سوندىقتان دا ۇلتتىق لابوراتوريا ماماندارى ەكسپرەسس ادىسپەن ەلىمىزدىڭ تۇكپىر-تۇكپىرىنەن كەلگەن كوكونىستەر مەن ازىق-تۇلىكتەردىڭ قۇرامىنداعى نيترات مولشەرىن, بال مەن شىرىنداردىڭ ساپاسىن جانە بارلىق تاعامداردىڭ ميكروبتىق لاستانۋ دەڭگەيىن انىقتاپ بەرە الادى.
وسى رەتتە ايتا كەتۋ كەرەك, ساتۋشى مەن تۇتىنۋشى ازىق-تۇلىكتەردى اقىسىز تۇردە تەكسەرتە الادى. مۇنداي اكتسيا ءار ەكى اپتا سايىن قالا بازارلارىندا ءداستۇرلى تۇردە ۇيىمداستىرىلىپ تۇراتىن بولادى, – دەدى سارىارقا اۋدانىنىڭ باس مەملەكەتتىك سانيتارلىق دارىگەرى گۇلبانۋ ەسداۋلەتوۆا..
ۇلتتىق ساراپتاما ورتالىعىندا دارىگەر-باكتەرولوگ بولىپ قىزمەت جاسايتىن مايگۇل بەردىكەي ازىق-تۇلىك ونىمدەرىنىڭ ساپاسىن 1-2 مينۋتتىڭ ىشىندە انىقتاپ بەرەتىنىن ايتادى. ياعني «Highlight» دەگەن اپپارات تۇتىنۋشىلار مەن ساۋداگەرلەردىڭ ۋاقىتىن المايدى.
سونداي-اق, ول ساپاسىز ازىق-تۇلىك انىقتالسا, دەنساۋلىق ساقتاۋ دەپارتامەنتى ناقتى شارا قولداناتىنىن ايتىپ ءوتتى.
مامانداردىڭ ايتۋىنشا, مۇنداي اكتسيا ءار ەكى اپتا سايىن قالا بازارلارىندا ءداستۇرلى تۇردە ۇيىمداستىرىلىپ تۇراتىن بولادى. ماسەلەن, وسى كۇنى «سارىارقا» ساۋدا ورتالىعىنداعى «5 مينۋت» سۋپەرماركەتىندە ءدال وسىنداي اكتسيا ۇيىمداستىرىلدى.
سەرىك جولداسباي
