تۇتىنۋشىلار قۇقىعىن قورعايدى
15 ناۋرىز – حالىقارالىق تۇتىنۋشىلاردىڭ قۇقىعىن قورعاۋ كۇنى. وسىعان وراي استانا قالالىق «ادىلەت» تۇتىنۋشىلار قۇقىعىن قورعاۋ قوعامى» قوعامدىق بىرلەستىگى سالتاناتتى جيىن وتكىزدى.
قوعامدىق بىرلەستىك توراعاسى قابىكەن زاكاريانوۆتىڭ ايتۋىنشا, ەلىمىزدە تۇتىنۋشىلاردىڭ قۇقىعى ءجيى بۇزىلادى. الايدا قاراپايىم جۇرت ءوز قۇقىعىن قورعاپ, ءتيىستى جەرگە شاعىمدانا بەرمەيدى. سونداي-اق, ول جيىندا مەكتەپتەگى ىستىق تاماق بەرۋ ماسەلەسىنە قاتىستى ءوز پىكىرىن ءبىلدىردى.
– ءبىز مەكتەپتەردىڭ ىستىق تاماقپەن تولىق قامتىلۋىمەن اينالىستىق. ويتكەنى بالالاردىڭ ءبىزدىڭ بولاشاعىمىز ەكەنىن جاقسى تۇسىنەمىز. سوندىقتان دا ەلورداداعى بارلىق مەكتەپتەردى ارالاپ, ولاردىڭ ىستىق تاماقپەن قامتىلۋىن قاراپ شىقتىق. وسىنىڭ ارقاسىندا از قامتىلعان وتباسىدان شىققان باستاۋىش سىنىپ وقۋشىسىنا بەرىلەتىن ىستىق تاماقتىڭ باعاسى 80 تەڭگەدەن 284 تەڭگەگە دەيىن ءوستى, – دەيدى قابىكەن زاكاريانوۆ.
الايدا قوعامدىق بىرلەستىك ءبىر وقۋشىعا بەرىلەتىن ىستىق تاماقتىڭ باعاسى 350-400 تەڭگە بولۋى كەرەك دەپ ەسەپتەپ وتىر. جيىن سوڭىندا تۇتىنۋشىلاردىڭ قۇقىعىن قورعاۋعا قوسقان ۇلەسى ءۇشىن بىرقاتار سالا وكىلدەرى ارنايى ماراپاتتالدى.
سەرىك قۇدايبەرگەنۇلى