ەلوردا كوشەلەرىمەن كەلە جاتقاندا ەكى قاباتتى, قىزىل ءتۇستى, تۋريستىك اۆتوبۋستى كوزىمىز شالىپ قالدى. استانادا 2016 جىلدان بەرى تۋريستەرگە قالانى ارالاتىپ, اقىلى قىزمەت كورسەتەتىن بۇل اۆتوبۋس بيىل دا كوكتەمگى جۇمىس ماۋسىمىن باستادى. «Astana Red Bus Tour» اۆتوبۋسىنىڭ جالعىز كولىك جۇرگىزۋشىسى ەرلان ەسەمسەيىتوۆتى تۋريستىك باعدار بويىنشا ءبىرىنشى ايالداما, «بايتەرەك» مونۋمەنتى جانىندا تۇرعاندا كەزدەستىردىك. ونىڭ ايتۋىنشا, بيىل اۆتوبۋستىڭ تۋريستەردى تاسۋ قىزمەتى ءساۋىر ايىندا باستالدى, ەندى جۇمىسى قالىڭ قار تۇسكەنگە دەيىن, ياعني قاراشاعا دەيىن جالعاسادى.
تاڭەرتەڭ 10.00-دەن كەشكى 20.00-گە دەيىن تۋريستەر تاسيتىن ەرلان ەسەمسەيىتوۆ ءار باعدارى 2 ساعاتتىق ءبىر تۋريستىك ساپار بارىسىندا ەلورداداعى 4 كورنەكى نىساننىڭ قاسىنا 15 مينۋتتاي ايالداي وتىرىپ, كۇن سايىن كولىك ايدايدى. بارلىعى كۇنىنە وسىنداي 4 مارشرۋت جاسايدى.
– مارشرۋت وسى «بايتەرەكتەن» باستالادى, ءبىرىنشى ايالداما «وكەناريۋم», ەكىنشىسى – «حان شاتىر», ءۇشىنشىسى – ۇلتتىق مۋزەي, ءتورتىنشىسى – قازاق ەلى الاڭى, سوسىن وسى جەرگە قايتىپ كەلەمىز. الداعى ۋاقىتتا «ەكسپو» كورمەسىن, ورتالىق مەشىتتى جانە سالتانات قاقپاسىن, سونىمەن قاتار «ەسىل» كەمە ساياحاتى ستانساسىن قوسقالى جاتىر. سوندا 8 ايالداما بولادى. بيلەت باعاسى – ادام باسىنا 6000 تەڭگە, 3 جاسقا دەيىنگى بالالارعا تەگىن, 3-14 جاس ارالىعىنداعى بالالارعا, كوپبالالى انالارعا, زەينەتكەرلەرگە 50 پايىز جەڭىلدىك جانە كوپبالالى انانىڭ تەك ءبىر بالاسىنا اقىسىز قىزمەت كورسەتىلەدى. بيلەتتەر وسى ءبىرىنشى ايالداماداعى ارنايى دۇڭگىرشەكتە ساتىلادى. تۋريستىك ساپار قۇنى بيىل قىمباتتادى. سوندىقتان بولار كوبىنە بۇل اۆتوبۋسپەن شەتەلدىك تۋريستەر ساياحاتتايدى. ءارى ولاردىڭ ءبىزدى تاڭداۋداعى باستى سەبەبى, اۆتوبۋستا قالا كوشەلەرىمەن كەلە جاتقاندا بارلىق عيماراتتاردى 8 تىلدە تانىستىراتىن اۋديوگيد بار, – دەيدى اۆتوبۋس جۇرگىزۋشىسى.
62 ورىندىق اۆتوبۋس ءىشى ازىرگە تولىق تولا قويمايدى. جازعا تامان ادام قاراسى كوبەيە تۇسەدى. قازىر ەڭ كوپ دەگەندە 40-45 ادامداي مىنەدى.
– قازىرگى تاڭدا رەسەيلىك تۋريستەر وتە كوپ. كورشى ەلدەگى جاعدايعا بايلانىستى ۆيزا جاساتا الماعان سوڭ, قازاقستانعا كەلىپ جاساتۋدا. ولاردان بولەك يتاليا, مالايزيا, ءۇندىستان ەلدەرىنىڭ ازاماتتارى دا كەلەدى. ماۋسىمنان باستاپ ەكىنشى ارىپتەسىم جۇمىسقا شىعادى, سول كەزدە تۇنگى 23.00-گە دەيىن قاتىنايتىن بولامىز. كولىكتە توڭازىتقىش بار, كۇن ىسىعاندا سۋدى ءوزىمىز بەرەتىن بولامىز, سۋ بيلەت قۇنىنا كىرەدى, الايدا جەلدەتكىش جوق, جازدا اسىرەسە, ەكىنشى قاباتى ىسىپ كەتەدى, – دەيدى ول.
ەلورداعا اقمولا استاناعا اۋىسقان جىلى كەلگەن كولىك جۇرگىزۋشىسى قازىرگى جۇمىسى جانىنا جايلى, تىنىش ەكەنىن ايتادى. جالاقىسى دا سالىستىرمالى تۇردە ءبىرشاما جوعارى.
