ءا.مامبەتوۆ اتىنداعى مەملەكەتتىك دراما جانە كومەديا تەاترىندا كورنەكتى جازۋشى, دراماتۋرگ, مەملەكەتتىك سىيلىقتىڭ يەگەرى دۋلات يسابەكوۆتىڭ «تىنىشتىق كۇزەتشىسى» دراماسىنىڭ پرەمەراسى ءوتتى. تۋىندى ۇلى جەڭىستىڭ 75 جىلدىعىنا ارنالدى. سپەكتاكلدى اتالمىش تەاتردىڭ كوركەمدىك جەتەكشىسى, قازاقستاننىڭ ەڭبەك سىڭىرگەن قايراتكەرى سايلاۋ قاميەۆ ساحنالادى.
بۇل شىعارمانىڭ ءدال وسى تەاتردا قويىلۋىندا ءبىر زاڭدىلىق بار. جازۋشى وسىنداي اتاۋمەن الدىمەن اڭگىمە جازدى. ول «قازاق ادەبيەتى» گازەتىندە جارىق كورگەن سوڭ, ونەر ادامدارىن قىزىقتىردى. سونىڭ ىشىندە ايگىلى ءارتىس ءانۋار مولدابەكوۆ اڭگىمەنى پەساعا اينالدىرۋدى ۇسىندى. باس كەيىپكەر دەمەسىننىڭ بەينەسىن ءوزى سومداعىسى كەلەتىنىن ايتتى. الايدا ارادا كوپ ۋاقىت وتپەي اكتەر ومىردەن وزىپ كەتىپ, ارمانىنا جەتە المادى…
ال م.اۋەزوۆ تەاترىنىڭ سول كەزدەگى كوركەمدىك جەتەكشىسى ءازىربايجان مامبەتوۆ اۆتورعا رەسمي حات جازىپ, شىعارمانى ساحناعا لايىقتاۋدى ءوتىندى. اكتەر مەن رەجيسسەردىڭ ءوتىنىشىن جەردە قالدىرماعان قالامگەر ەكى ايدىڭ ىشىندە پەسا جازىپ شىقتى. سپەكتاكلدى اتالمىش ونەر ورداسىندا ساۋلەبەك اسىلحانوۆ قويدى. باس كەيىپكەرلەردى قازاقستاننىڭ حالىق ارتىستەرى تۇڭعىشباي جامانقۇلوۆ پەن گۇلجان اسپەتوۆا سومدادى.
مىنە, ارادا ءبىرتالاي جىل وتكەن سوڭ, وسى قويىلىمنىڭ دۇنيەگە كەلۋىنە تىكەلەي سەبەپشى بولعان ساحنا سۋرەتكەرى ءازىربايجان مامبەتوۆتىڭ اتى بەرىلگەن تەاتردا بۇل تۋىندى جاڭعىرىپ وتىر.
سپەكتاكل جەلىسى باس كەيىپكەر دەمەسىننىڭ (بەيبارىس اسقاربەكوۆ) اينالاسىندا ءوربيدى. كىشكەنتايىنان قاسىرەت شەككەن ونى اۋىل جۇرتى «جىندى», «ەسالاڭ», «اۋمەسەر» دەپ اتاپ كەتكەن. ول بولسا قىسى-جازى ۇستىنەن كونەتوز سولدات شينەلى مەن اسكەري باس كيىمدى تاستاماي, ءوزىن «تىنىشتىق كۇزەتشىسى» دەپ اتايتىن.
درامادا سوعىس جىلدارىنداعى اۋىل تىرشىلىگى, تىلداعى ەڭبەك سۋرەتتەلەدى. ايەلدەر مەن بالالاردىڭ يىقتارىنا تۇسكەن اۋىرتپالىق ايقىن كورىنەدى. بىراق جانرى دراما بولسا دا, دۋلات يسابەكوۆتىڭ قالامىنا ءتان يۋمور قوسا جۇرەدى.
