ونەر مەن ماحاببات ەشقاشان ۇلتقا دا, دىنگە دە بولىنبەيدى. ولار بارشا ادامزاتقا ورتاق. وپەرا دا سونداي. قازاق حالقىن بۇل ونەردەن الىس دەپ ايتقانىمىز بولماس. ويتكەنى قازاقستاندا وپەرا جانرى حح عاسىردىڭ 30-جىلدارى تۋدى. العاشقى وپەرالىق شىعارمالار مۋزىكالىق پەسا جانە دراما تۇرىندە قويىلىپ, تۇگەلدەي قازاقتىڭ حالىق مۋزىكاسىنا, ونىڭ ءان-كۇي بايلىعىنا نەگىزدەلىپ جازىلدى. سودان بەرى قازاق وپەراسى قارىشتاپ دامىپ, الەمدىك دەڭگەيگە كوتەرىلدى.
قازاق وپەراسىنىڭ قارا شاڭىراعى – الماتىداعى اباي تەاترىنىڭ ەلوردا تورىنە گاسترولدىك ساپارمەن كەلىپ جاتقانىن بۇعان دەيىن دە ايتقانبىز. ونەر ساپارىنىڭ شىمىلدىعى گاەتانو دونيتسەتتيدىڭ ەڭ جاقسى وپەرالارىنىڭ ءبىرى «دون پاسكۋالەمەن» اشىلدى. وپەرانى يتاليادان ارنايى شاقىرىلعان ماتەو ماتستسوني دەگەن كورنەكتى رەجيسسەر ساحنالاعان. سوندىقتان دا شىعار قويىلىمنان يتاليالىق اتموسفەرا مەن ءستيلدى بايقاماۋ مۇمكىن ەمەس. بەينەبىر ورتا عاسىرداعى ماحاببات پەن وشپەندىلىككە تولى قوعامنىڭ ورتاسىنا كىرىپ كەتكەندەي بولاسىڭ. وپەرادا كۇردەلى ستسەنوگرافيالىق سيۋجەتتى قۇرايتىن كوپتەگەن ارنايى ەففەكتتەر مەن «ۋاقىتتان-ۋاقىتقا اۋىساتىن» قوزعالىستار قامتىلعان. كلاسسيكالىق سيمفونيا زاماناۋي تەحنولوگيانىڭ سۇيەمەلدەۋىمەن كەرەمەت ۇيلەسىم تاۋىپ, بەينەپروەكتسيالارمەن تولىقتىرىلعان. ءدال وسى شىعارما ءوزىمىزدىڭ «استانا وپەرا» تەاترىنىڭ قورجىنىندا دا بار. بىراق ول كىشى زالعا ارنالىپ قويىلعاندىقتان, ءدال اباي تەاترىنىڭ قويىلىمىنداي اۋقىمدى ەمەس. وپەراعا جينالعان استانالىق كورەرمەندەردىڭ قاتارى دا كوپ. بارلىعى ونەر كەشىن اسىعا, ساعىنىپ كۇتكەندەي.
دونيتسەتتيدىڭ «ءۇش ءبولىمدى دراما-بۋففا» دەپ ءوزى اتاعان وپەراسىنىڭ سيۋجەتىندە, كورەرمەندەر باس كەيىپكەرلەر – قارت دون پاسكۋالەمەن (تاير ءتاجى, ءىلياس ارتاعاليەۆ), ونىڭ جاس جيەنى ەرنەستومەن (دامير سادۆاكاسوۆ, ارتۋر گابديەۆ), ايلاكەر دارىگەر مالاتەستامەن (ەميل ساكاۆوۆ, ولەگ تاتاميروۆ) جانە نورينا سۇلۋمەن (زارينا التىنباەۆا, اناستاسيا كوجۋحاروۆا) كەزدەسەدى.
نورينا سۇلۋدىڭ ءرولىن سومداعان تانىمال ءانشى زارينا التىنباەۆانىڭ كاسىبي شەبەرلىگى مەن حاريزماسىنا تاڭدانباۋ مۇمكىن ەمەس. ءۇش ەر ازاماتتىڭ ورتاسىندا ءجۇرىپ, ايەل زاتىنىڭ بارلىق مىنەز-قۇلقىن, بولمىسى مەن سۇلۋلىعىن تولىقتاي پاش ەتەدى. جەتپىستەگى دون پاسكۋالەگە تۇرمىسقا شىقسا دا, ءوز ماحابباتى ءۇشىن سوڭىنا دەيىن كۇرەسەدى. وپەراداعى تاعى ءبىر ەرەكشە تۇستاردىڭ ءبىرى قارت دون پاسكۋالەنىڭ ءرولىن جاس اكتەر ءىلياس ارتاعاليەۆ سومدايدى. اتاق پەن ماحابباتقا قۇمارتقان شالدىڭ جاس قىزدى ايەلدىككە العان اشكوزدىگى مەن بارلىق بايلىعىمنان ايىرىلىپ قالامىن دەگەن قورقىنىشىن ءارتىس تەك اۋەنمەن عانا ەمەس, ەموتسيامەن دە كوركەم بەينەلەي ءبىلدى. سونىمەن قاتار ارتىستەر تەك قانا ساحنادا ونەر كورسەتپەي, كەيبىر اريالاردى كورەرمەن ورتاسىندا ورىندادى. بۇل دا قويىلىم اتموسفەراسىن جاقىن سەزىنۋگە اسەر ەتكەندەي.
قويىلىمدا دەكوراتسيا مەن 3D فورماتىنداعى جارىقتاندىرۋدىڭ سوڭعى جەتىستىكتەرى پايدالانىلعان. سونىمەن بىرگە سپەكتاكل بارىسىندا ءۇش ءداۋىردىڭ ءوزارا الماسۋى ەرەكشە قارقىنمەن جەتكىزىلەدى. بۇل اسىرەسە كوستيۋمدەر مەن دەكوراتسيالاردا ايرىقشا كورىنىس تاپتى. جالپى وسىنداي قىزىقتى رەجيسسەرلىك قادامدار جاسالىپ, ءتىپتى كورەرمەنمەن وزىنشە ءبىر ينتەراكتيۆتى بايلانىس بولدى.
ماتەو ماتستسوني بۇل وپەرانى بۇكىل تاريحتا وتكەن عاسىرلارداعى ايەلدەردى ازات ەتۋ سيمۆولى رەتىندە نورينانىڭ كوزىمەن قاراۋ دەپ تۇسىندىرەدى. وسى ارقىلى بۇگىنگى كورەرمەن 1800 جانە 1950 جىلدار ارالىعىنا ساياحات شەگىپ, بۇگىنگى 2021, ياعني زاماناۋي يتاليا ءسان-سالتاناتىنىڭ ورتاسىنا تاپ كەلەدى.
كوكتەم قارقىن
