بيىل ۇلتتىق بىرىڭعاي تەستىلەۋدىڭ (ۇبت) فورماتى وزگەرمەيدى. ۇبت تاپسىراتىن پاندەر, بەرىلەتىن سۇراقتار, ۇپاي سانى, وتەتىن ۋاقىتى بۇرىنعىشا بولادى. سەيسەنبى كۇنى ۇكىمەت وتىرىسىندا بايانداما جاساعان ءبىلىم جانە عىلىم ءمينيسترى اسحات ايماعامبەتوۆ تەستىلەۋدى جەتىلدىرۋگە قاتىستى بيىل قولعا الىناتىن ءىس-شارالار جونىندە اڭگىمەلەپ بەردى. ەندى سولارعا تولىعىراق توقتالايىق.
ۇبت-عا 117242 تۇلەك قاتىسادى
بيىل ۇبت-عا قاتىسۋعا 117 242 ادام ءوتىنىش بەرگەن. سونىڭ ىشىندە 96 مىڭنان استامى – بيىلعى مەكتەپ تۇلەكتەرى نەمەسە بارلىق مەكتەپ بىتىرۋشىلەردىڭ 72 پايىزى. ال 20 مىڭنان استامى – بيىل جانە وتكەن جىلدارى كوللەدجدەر مەن شەتەلدىك ءبىلىم بەرۋ ۇيىمدارىن بىتىرۋشىلەر. سىناق 20-30 ماۋسىم ارالىعىندا ەلىمىزدەگى 169 ۇبت تاپسىرۋ نۇكتەلەرىندە وتكىزىلەدى.
اسحات ايماعامبەتوۆ قۇزىرلى مينيسترلىك ۇبت-نى وتكىزۋگە تولىق دايىن ەكەنىن ءمالىم ەتتى. بىرىنشىدەن, قازىرگى ۋاقىتتا تەستىلەۋ ماتەريالدارى قۇپيا تارتىپپەن وڭىرلەرگە تولىعىمەن جىبەرىلگەن. ەكىنشىدەن, ۇبت-نى ۇيىمداستىرۋ ءۇشىن مەملەكەتتىك كوميسسيالار قۇرىلعان. ونىڭ قۇرامىنا قۇقىق قورعاۋ ورگاندارىنىڭ, قوعامدىق بىرلەستىكتەردىڭ جانە باق-تىڭ وكىلدەرى ەنگىزىلگەن. ۇشىنشىدەن, رەسپۋبليكالىق دەڭگەيدە جانە جەرگىلىكتى ءاربىر ۇبت وتكىزەتىن نۇكتەلەردە اپپەلياتسيالىق كوميسسيالار قۇرىلعان. تورتىنشىدەن, بارلىق اۋديتوريالار باقىلاۋ بەينەكامەرالارمەن جانە ۇيالى بايلانىس سيگنالدارىن وشىرەتىن قۇرالدارمەن جابدىقتالعان. بەسىنشىدەن, جەدەل اقپارات الماسۋ ءۇشىن مينيسترلىكتىڭ ارنايى CALL-ورتالىق ءوز جۇمىسىن باستاعان.
ايتا كەتەلىك, ۇبت ەلىمىزدە بيىل 16-شى رەت وتكىزىلەدى. وسى ارالىقتا سىناق تاپسىرۋعا 1,8 ملن ادام قاتىسىپتى.
تالاپكەرلەرگە بىرقاتار جەڭىلدىكتەر ەنگىزىلدى
ەندى تالاپكەرلەرگە قاتىستى ەنگىزىلگەن جەڭىلدىكتەرگە كەلەيىك. بيىلدان باستاپ اقىلى وقۋعا ءتۇسۋ ءۇشىن ۇبت جىلىنا ءتورت رەت وتكىزىلەدى. مينيستر مۇنداي جەڭىلدىكتەر وقۋشىلارعا پسيحولوگيالىق قىسىمدى ازايتۋعا جانە ماۋسىم ايىندا وتەتىن ۇبت-عا تياناقتى دايىندالۋعا سەپتىگىن تيگىزەدى دەپ سانايدى.
«بۇعان دەيىن مەكتەپ ءبىتىرۋشىلەر تەستىلەۋدى تەك ماۋسىم ايىندا تاپسىرىپ كەلگەن ەدى. بيىل ولار قاڭتار جانە ناۋرىز ايلارىندا دا تاپسىرا باستادى. سوندىقتان, وسى جولعى تەستىلەۋگە وقۋشىلار وتە جاقسى دايىندىقپەن كەلىپ وتىر دەپ زور سەنىممەن ايتا الامىن» دەپ مالىمدەدى اسحات قاناتۇلى.
ءمينيستردىڭ ايتۋىنشا, قاڭتارداعى تەستىلەۋگە 35 مىڭداي, ناۋرىز ايىنداعى تەستىلەۋگە 80 مىڭعا جۋىق وقۋشىلار قاتىسقان. «وسى ەكى ۇبت-دا جالپى مەكتەپ ءبىتىرۋشىلەردىڭ 78 پايىزى قامتىلدى. ولاردىڭ 70 پايىزى قازىردىڭ وزىندە ءتيىستى شەكتى بالدى يەلەنىپ, اقىلى تۇردەگى وقۋعا تۇسۋگە دايىن وتىر. ەندى وسى وقۋشىلار گرانتقا ءتۇسۋ ءۇشىن ماۋسىم ايىنداعى تەستىلەۋگە دە قاتىسادى» دەپ ءتۇسىندىردى قۇزىرلى مينيسترلىك باسشىسى.
بيىلعى جاڭالىقتىڭ ءبىرى – ۇبت-نى تاپسىرۋ كەزىندە IELTS سەرتيفيكاتى بارلارعا جەڭىلدىك جاسالادى. اتاپ ايتساق, IELTS سەرتيفيكاتى بار تۇلەكتەر شەت ءتىلى ءپانى بويىنشا تەستىلەۋدەن بوساتىلادى. ولارعا وسى ءپان بويىنشا ماكسيمالدى بالل اۆتوماتتى تۇردە بەرىلەدى. قازىرگى تاڭدا ۇبت-عا قاتىسۋشىلاردىڭ اراسىندا IELTS سەرتيفيكاتى بار وقۋشىلاردىڭ سانى – 708.
كوللەدج تۇلەكتەرى ۇبت-دان بوساتىلادى
سونىمەن قاتار, كوللەدج تۇلەكتەرىنە دە بيىلعى ۇبت كەزىندە جەڭىلدىكتەر بەرىلەدى. ماسەلەن, ولار بىتىرگەن ماماندىعى بويىنشا جوعارى وقۋ ورنىنا اقىلى نەگىزدە وقۋعا تۇسەمىن دەسە, ۇبت-دان بوساتىلىپ, تەك ەمتيحان تاپسىرادى.
بيىلعى ۇبت-نىڭ تاعى ءبىر جاڭالىعى – ءاربىر تۇلەككە ۇبت سەرتيفيكاتىمەن قوسا ارنايى اقپاراتتىق پاراق بەرىلەدى. وندا ماماندىقتار ءتىزىمى, وعان سايكەس بولىنەتىن گرانتتار سانى, سونداي-اق وتكەن جىلعى گرانت بايقاۋىنىڭ ناتيجەلەرى, وعان ءوتۋ بالى كورسەتىلەدى.
«ءبىزدىڭ ويىمىزشا, مۇنداي ءمالىمەتتەر تالاپكەرلەرگە بولاشاق ماماندىعىن دۇرىس تاڭداۋعا, جيناعان بالىنا سايكەس دۇرىس شەشىم قابىلداۋعا مۇمكىندىك بەرەدى. مىسالى, زاڭتانۋ ماماندىعىنا ادەتتە وتە ۇلكەن, بايقاۋ جوعارى, گرانت از بولىنەدى. شەكتى بالى 130-دان كوپ. سوندىقتان, 100-120 بالل جيناعان بالالار وسى اقپاراتتى بىلە وتىرىپ, دۇرىس تاڭداۋ جاساي الادى» دەپ ءتۇسىندىردى جاڭالىقتى اسحات ايماعامبەتوۆ.
