ەرەكشە قاجەتتىلىكتەرى بار بالالار قوعامنىڭ قولداۋىن قاجەت ەتەدى. وزدەرىن قورشاعان ورتانىڭ كىشكەنتاي ءبىر بولشەگى رەتىندە سەزىنۋ ولار ءۇشىن اسا ماڭىزدى. كوپتەگەن ورتالىق پەن ۇيىمنىڭ وسى ماسەلەگە ءجىتى كوڭىل ءبولىپ, الەۋمەتتىك سۇراقپەن اينالىسۋى «ەرەكشە» بالالار مەن اتا-انالارعا ءۇمىت سىيلايدى. وسىنداي ورتالىقتىڭ ءبىرىن استانالىق كاسىپكەر بوتاگوز سۇلتانوۆا اشتى, بۇگىندە «باقىتتى شاڭىراق» قوعامدىق قورى 2000-نان اسا بالانىڭ وڭالۋىنا سەپتەسىپ كەلەدى.
2019 جىلى ەرەكشە قاجەتتىلىگى بار بالالاردى تاربيەلەپ وتىرعان جۇزدەگەن اتا-انادان تۇراتىن باستاماشىل توپ قۇرىلدى. تۇرعىن ءۇي, جاردەماقى سەكىلدى بىرقاتار ماسەلەنى كوتەرگەن ولار الەۋمەتتىك وسال توپتان شىققان قازاقستاندىقتارعا كومەكتەسۋدى قولعا الدى. الەۋمەت مۇددەسى ءۇشىن كۇرەسكەندەردىڭ قاتارىندا بوتاگوز سۇلتانوۆا بولىپ, كەيىن ءوزى دە جەكە قور اشۋدى ۇيعارادى. ءتۇرلى دياگنوزى بار بالالارعا قول ۇشىن سوزىپ كەلە جاتقان «باقىتتى شاڭىراق» قوعامدىق قورى وسىلايشا 2020 جىلى اشىلدى. ەلوردادا 4 جىل قاتارىنان جۇمىس ىستەپ كەلە جاتقان ورتالىق ەرەسەكتەر مەن بالالارعا وڭالتۋ قىزمەتىن ۇسىنىپ, ەرەكشە تاعدىرى بار 720 وتباسىنىڭ باسىن قوسىپ وتىر. ولارعا ازىق-تۇلىك سەبەتى, ءبىلىم بەرۋ قۇرالدارى, كاسىپكەرلىك نەگىزدەرىنە تەگىن وقىتۋ سەكىلدى ءتۇرلى ماتەريالدىق, الەۋمەتتىك, ءبىلىم بەرۋ جانە پسيحولوگيالىق كومەك كورسەتىلەدى.
«ورتالىقتى اشۋداعى باستى ماقساتىم – استانالىق وتباسىلارعا دەمەۋ بولىپ, ءار بالا باقىتقا لايىق ەكەنىن سەزدىرۋ» دەگەن كەيىپكەرىمىز بوتاگوز سۇلتانوۆا – ءوزى دە ءادىل ەسىمدى «ەرەكشە» بالا تاربيەلەپ وتىرعان قايسار انا. 2,5 جاسىندا ونكولوگياعا شالدىققان ۇلىنىڭ ەم-دوم شارالارىمەن تالاي جەردە ءجۇرىپ, تالاي قيىندىقپەن كەزىكسە دە, تاعدىر تالكەگىنە ەش مويىمادى. ءجۇزۋ, شەت ءتىلىن ۇيرەنۋ, باعدارلامالاۋ ساباقتارى مەن تاريح ءپانىن ءسۇيىپ وقيتىن ءادىل ءۇشىن اناسىنىڭ قامقورلىعى مەن مەيىرىمى – ەڭ ماڭىزدىسى. سوزىنشە, اناسىمەن بىرگە تاڭەرتەڭ جۇگىرۋ كۇندى ءساتتى باستاۋعا ەرەكشە سەزىم سىيلايدى.
«ەرەكشە بالا تاربيەلەپ وتىرعان ءاربىر اتا-انانىڭ اسىل ارمانى – ۇرپاعىن قايتكەن كۇندە دە وڭالتۋ, ونى اياققا تۇرعىزىپ, ومىرگە بەيىمدەۋ. ەلورداداعى «باقىتتى شاڭىراقتىڭ» ءار ورتالىعىنا كەلەتىن اتا-انانىڭ تىلەگى دە سول. ورتالىقتا بتسپ, اۋتيزم, داۋن سيندرومى جانە جۇرەك تالماسى سەكىلدى دياگنوزى بار بالالار ءۇشىن پەداگوگيكالىق تۇزەتۋ قاراستىرىلعان. لوگوپەد, دەفەكتولوگ, پسيحولوگ مامانداردىڭ وقىتۋ ساباقتارى مەن پسيحولوگيالىق قولداۋى ۇسىنىلادى. بالالاردى وڭالتىپ قانا قويماي, اتا-انالاردى دا الەۋمەت ومىرىنە ەتەنە ارالاسۋعا شاقىرامىز. شىنى كەرەك, مۇنداي وتباسىلارمەن جۇمىس ىستەۋ قيىن. ءۇمىتى ءۇزىلىپ, جەتەرىنە جەتە الماي, تاۋى شاعىلىپ, جىگەرى ۇگىلىپ جاتاتىندار بار. ماتەريالدىق جاعدايى تومەن وتباسىلاردى قولداۋدا اتا-انالارعا جۇمىسقا تۇرۋ مۇمكىندىگى بەرىلەدى. ودان بولەك, قوردىڭ باستى مىندەتى – زاڭنامالىق دەڭگەيدە مۇمكىندىگى شەكتەۋلى بالالار مەن اتا-اناسىنىڭ قۇقىعىن ايقىنداۋ. تۇرعىن ۇيمەن قامتاماسىز ەتىپ, بەرىلەتىن جاردەماقى مولشەرىن ۇلعايتۋ ءۇشىن مەملەكەتتىك ورگاندارمەن ۇنەمى بايلانىستا بولىپ, ءوز مۇددەمىزدى قورعاۋدان شارشاعان ەمەسپىز. سونداي-اق قوعامدا بالالاردى دەنساۋلىعىنا قاراي ءبولىپ قاراۋ بار. مەنىڭشە, ءار ادام بىردەي مۇمكىندىك پەن قۇقىققا يە. بۇل ماسەلەنى شەشۋدە ءبىز اتا-انالارمەن ۇيىسا وتىرىپ, تەڭ قۇقىق ءۇشىن كۇرەسىپ كەلەمىز» دەپ ءبولىستى ب.سۇلتانوۆا.
كەيىپكەرىمىزدىڭ باستاماسى ارقاسىندا قازىردە استانادا «باقىتتى وتباسى» باعدارلاماسىمەن مىڭداعان وتباسىنىڭ تۇرعىن ءۇي الۋعا بايلانىستى ءوتىنىشى ماقۇلداندى. بۇل – «باقىتتى شاڭىراقتىڭ» ءبىر عانا جەمىسى. ورتالىقتا كوپ اتا-انانىڭ العىسىن الىپ, وتباسىلاردىڭ ءبىر-بىرىمەن ارالاس-قۇرالاسىپ, 800-دەي «ەرەكشە» بالانى قامتىپ, جۇزدەگەن بالانىڭ قۇرداستار قاتارىنا قوسىلۋىنا سەبەپكەر بولعان بوتاگوز سۇلتانوۆا ءۇشىن بالاسى بار ءۇي – باقىتتى شاڭىراق.
