ەلوردادا باستاپقى مەديتسينالىق-سانيتارلىق كومەك كورسەتۋ جۇيەسى دامىپ كەلەدى. وسى رەتتە «ۇيدەگى دارىگەر» جوباسىنىڭ مۇمكىندىكتەرى ايتارلىقتاي. جوباعا سايكەس تۇرعىن ۇيلەردىڭ ءبىرىنشى قاباتىندا ورنالاسقان شاعىن دارىگەرلىك امبۋلاتوريالار جۇمىس ىستەيتىن بولادى.
جاڭا جوبانىڭ ءبىر ەرەكشەلىگى – وعان ارنايى جەر ۋچاسكەسىن ءبولۋ, كلينيكانى سالۋ مەن جابدىقتاۋعا بيۋدجەتتىك شىعىندار قاجەت ەمەس. امبۋلاتوريانى اشۋ جەكە ينۆەستيتسيا ەسەبىنەن جۇزەگە اسىرىلادى. وتكەن جىلى وسىنداي 8 امبۋلاتوريا اشىلدى. قالا قۇرىلىسىنىڭ ءوسۋ قارقىنى مەن جوسپارلارىن ەسكەرە وتىرىپ, اكىمدىك 2023 جىلعا دەيىن بمسك جەلىسىن دامىتۋ جوسپارىن بەكىتتى. وعان سايكەس قوسىمشا 51 دارىگەرلىك امبۋلاتوريا اشىلاتىن بولادى. جاڭا قىزمەتتىڭ جايىن بىلمەك بولىپ, استانا اكىمدىگىنىڭ №4 قالالىق ەمحانا شارۋاشىلىق جۇرگىزۋ قۇقىعىنداعى مەملەكەتتىك كوممۋنالدىق كاسىپورنىنىڭ №6 وتباسىلىق دەنساۋلىق ورتالىعىنا باردىق.
كوپ قاباتتى ءۇيدىڭ تومەنگى قاباتىندا ورنالاسقان جيناقى جايدىڭ تابالدىرىعىن اتتاعان ساتتەن-اق ۇلكەن ەمحانالارداعى قاربالاس, قاي دارىگەرگە بارۋ كەرەك دەپ جان-جاعىڭا الاقتايتىن ادەتتەگىدەي احۋالدى كورمەدىك. شاعىن ءارى تىپ-تىنىش. ءبىر-ەكىلى كىسىلەر ەسىك الدىنداعى ۇيلەستىرۋشىدەن كەلگەن جۇمىسىنىڭ جايىن انىقتاپ, دالىزدەگى جايلى ورىندىقتارعا جايعاسىپ, دارىگەرگە كەزەگىن كۇتىپ وتىر. وسى ورتالىقتىڭ مەڭگەرۋشىسى ۇلبالا ومىراليەۆا 200-دەن استام شارشى مەتردە ورنالاسقان امبۋلاتوريانىڭ كۇندەلىكتى جۇمىسىمەن تانىستىردى.
– سوڭعى كەزدە اكىمدىك تاراپىنان كوپ ءمان بەرىلىپ وتىرعان مۇنداي امبۋلاتوريالاردىڭ ارتىقشىلىعى بارىن ىسىمىزبەن دالەلدەپ وتىرمىز. جاقىن ايماقتا ورنالاسقان كوپ پاتەرلى ۇيلەردىڭ تۇرعىندارىنا قىزمەت ەتەمىز. وسى كۇنى بىزدە تىركەلگەن جەتى مىڭ ادامنىڭ 2300-ءى – بالالار. كۇنىنە ەكى اۋىسىمدا 80-100 ادامعا دارىگەرلىك قىزمەت كورسەتىلەدى. ەرەسەكتەر بالالارىمەن بىرگە كەلىپ, ءبىر مەزەتتە دارىگەرگە قارالىپ, كەڭەس الادى. باسى اۋىرىپ, جۇرەگى سىزداسا, الدىمەن جەدەل جاردەمدى ەمەس, ءبىزدى شاقىراتىن بولدى. وسىندا جۇمىس ىستەيتىن ءتورت دارىگەردىڭ بايلانىس تەلەفوندارى – تۇرعىنداردىڭ قولدارىندا. وزىمىزدە تىركەلگەن اياعى اۋىر ايەلدەردىڭ بارىنە ورتاق «چات» اشىپ, ولاردىڭ كۇندەلىكتى كوڭىل كۇيىن باقىلاپ وتىرمىز. بالا دۇنيەگە كەلىپ جاتسا, الدىمەن ءبىز بارامىز. وسىدان-اق وتباسىنىڭ ءبىر مۇشەسىنە, سەنىمدى كورشىسىنە اينالدىق, – دەدى ورتالىق مەڭگەرۋشىسى.
جاسىراتىنى جوق, ەمحاناعا بارۋدىڭ, وندا كەزەككە تۇرۋدى, بەيتانىس دارىگەردىڭ شارشاڭقى ءتۇرىن ويلاعاندا, ءدارىگەرگە كورىنۋدىڭ ءوزى «بەينەتكە» اينالادى. سودان دا اۋىرا قالعاندا ەمحانانى اينالىپ وتەمىز. ۇيدە بار ءدارىنى ىشە سالامىز. وسىلايشا ءوز دەنساۋلىعىمىزعا سالعىرت قاراۋعا ءماجبۇرمىز. ال شاعىن امبۋلاتوريانىڭ ەرەكشەلىگى – دارىگەرگە جۇمىسقا بارا جاتىپ تا سوعا كەتىپ, قان قىسىمىن تەكسەرىپ, اعزاداعى قانت مولشەرىن دە انىقتاپ, جۇرەك سوعىسىن دا تىڭداتىپ ۇلگەرەمىز. تاياق تاستام جەردەگى ەمحاناعا جىلدام جەتىپ, تەز كورىنىپ, كەرەك شيپاگەردىڭ كەڭەسىن الىپ, جارتى جۇيكەسى جۇقارماي, ءارى قاراي ەمدەلىپ كەتۋگە دە زور مۇمكىندىك.
– التى ايدىڭ كولەمىندە حالىقتىڭ جەدەل جاردەم شاقىرتۋىن ازايتتىق. ءجيى كەزدەسەتىن ينفاركت, ينسۋلتتەن بولاتىن ءولىمنىڭ ازايۋىنا اسەرىمىز بار. قالاي دەسەڭىز, تۇرعىندار الدىمەن بىزگە حابارلاسادى. جاقىن جەردەن جەتىپ بارىپ, ناۋقاستىڭ جايىن بىلەمىز. قاجەت بولسا عانا جەدەل ءجاردەم شاقىرتامىز. ال ناۋقاستىڭ دەرتى قاتەرلى بولسا نىشاندارىنان بىردەن ءبىلىپ, ينفاركت, ينسۋلت ورتالىقتارىنا تىكەلەي جەتكىزۋدى تابىستاپ, جەدەل جاردەمنىڭ اۋرۋعا بولەتىن ۋاقىتىن قىسقارتامىز. مۇنداي كەزدە العاشقى ساعاتتار ادام ومىرىنە اراشا بولادى. وسىلايشا حالىقتىڭ مەديتسينالىق مەكەمەلەرگە دەگەن كوزقاراسىن, دارىگەرگە قارالۋ مادەنيەتىن وزگەرتىپ, قىزمەت ساپاسىن كوتەرىپ جاتىرمىز, – دەپ ويىن تۇيىندەدى دارىگەر.
