31 تالاپكەر قالا اكىمىنىڭ گرانتىنا يە بولدى
قالا اكىمى اسەت يسەكەشەۆ ەلوردانىڭ 31 مەكتەپ تۇلەگىنە ءبىلىم گرانتتارىن سالتاناتتى جاعدايدا تابىستادى. جاستار جەرگىلىكتى بيۋدجەت قارجىسىنا جوعارى وقۋ ورىندارىندا تەگىن ءبىلىم الۋعا مۇمكىندىك الدى.
جاستارعا ءبىلىم بەرۋ – مەملەكەت ساياساتىنىڭ باسىم باعىتتارىنىڭ ءبىرى. وقۋعا جۇمسالعان كۇش پەن قاراجات ارقاشان دا ءوزىن اقتاپ شىعادى, بۇل بولاشاققا جاسالعان ۇلكەن ينۆەستيتسيا. ەلباسى دامىعان 30 ەلدىڭ قاتارىنا ەنۋدى مىندەت ەتىپ قويىپ وتىر. ول ءۇشىن ءبىرىنشى كەزەكتە ادامي كاپيتالدى دامىتۋ كەرەك. بۇل تۇرعىدا, جاستارعا ءبىلىم الۋعا بارلىق جاعداي جاسالىپ كەلەدى. سىزدەر – ەلىمىزدىڭ بولاشاعىسىزدار, ءبىز سىزدەرگە سەنەمىز جانە ۇلكەن ءۇمىت ارتامىز. بارلىعىڭىزعا اماندىق-ساۋلىق, تالماس قايرات, جاستىق جالىن جانە ءبىلىم سالاسىنداعى جارقىن جەتىستىكتەر تىلەيمىن. ىسكە ءسات! – دەپ قالا اكىمى اسەت يسەكەشەۆ جاس تۇلەكتەردى قۇتتىقتادى.
جيىندا گرانت ۇتىپ العان جىبەك جاقسىباەۆانىڭ اناسى مانات ۇسەنوۆا كوپبالالى اتا-انالاردىڭ اتىنان العىس ءبىلدىردى. ول «قىزىم ۇبت-دان جوعارى بالل جيناپ, قالامىزداعى №75 مەكتەپ-گيمنازياسىن قىزىل اتتەستاتپەن ءبىتىردى. بولىنگەن گرانت اكىمدىك پەن مەملەكەت تاراپىنان زور كومەك بولدى» دەدى. ال اكىم گرانتىن يەلەنگەن تاعى ءبىر تالاپكەر توميريس تولەگەن س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ مەنەدجمەنت ماماندىعىن تاڭدادى. تەگىن ءبىلىم الۋعا مۇمكىندىك العان جاس تۇلەك ۇكىلەنگەن ءۇمىتتى اقتايمىن دەپ ۋادە بەردى.
جىل سايىن مەكتەپ قابىرعاسىنان تۇلەپ ۇشقان تۇلەكتەردىڭ وقۋ اقىسىن تولەۋگە الەۋمەتتىك كومەك كورسەتىلەدى. ماتەريالدىق كومەك جەتىمدەرگە, كىشكەنتايىنان مۇگەدەكتەرگە, بالالار ءۇيى تۇلەكتەرىنە, اكە-شەشەسىنىڭ قامقورلىعىنان ايىرىلعان بالالارعا جانە كوپ بالالى وتباسىندا تاربيەلەنگەن بالالارعا بەرىلەدى.
جىل باسىنان بەرى تەگىن ءبىلىم الۋعا 48 ءوتىنىش قابىلداندى. ونىڭ 17-ءسى رەسپۋبليكالىق گرانتتى جەڭىپ السا, قالعان 31 ءوتىنىش تامىز ايىندا كەزەكتى كوميسسيا وتىرىسىندا قارالدى. قورىتىندىسى بويىنشا, 16 639 500 تەڭگە كولەمىندە 31 گرانتتى تاعايىنداۋ تۋرالى شەشىم شىقتى. اكىمنىڭ ءبىلىم بەرۋ گرانتى ەڭبەك نارىعىنداعى سۇرانىسقا يە تەحنيكالىق, پەداگوگيكالىق جانە مەديتسينالىق ماماندىقتار بويىنشا ءبىلىم الۋعا بەرىلەدى. ايتا كەتەيىك, بيىل جەرگىلىكتى بيۋدجەت قاراجاتىنان 100 ستۋدەنتتىڭ وقۋ اقىسىن تولەۋگە 43,9 ملن تەڭگە ءبولىندى.
