استاناداعى وقۋشىلار سارايىندا العاش رەت ۇيىمداستىرىلعان «ۇلاعاتتى اۋلەت» قالالىق بايقاۋىنىڭ ماراپاتتاۋ ءراسىمى ءوتىپ, وندا ەنەرگەتيكا سالاسىندا 274 جىلدىق ەڭبەك ءوتىلى بار, ىرگەلى سىزدىقوۆتار اۋلەتى جەڭىمپاز اتاندى. ىزگىلىكتى شارانىڭ ۇيىمداستىرۋشىسى – استانا قالاسى اكىمدىگى.
سوڭعى جىلدارى باق-بەرەكە ۇيىعان, ءۇبىرلى-ءشۇبىرلى ونەگەلى اۋلەتتەردى كوپشىلىككە كەڭىرەك تانىستىرۋ, ولاردىڭ ەلەۋلى ەڭبەكتەرىن ناسيحاتتاۋ سەكىلدى يگىلىكتى شارالار كوپتەپ ۇيىمداستىرىلا باستادى. كەشەگى ىزگىلىككە تولى كەش تە سونداي ادەمى ءداستۇردىڭ جالعاسى دەۋگە بولادى. شارا شىمىلدىعى استانا اكىمى اسەت يسەكەشەۆتىڭ قۇتتىقتاۋىمەن اشىلدى. ونى جۇرتشىلىققا ەلوردا اكىمدىگىنىڭ باس ينسپەكتورى
ريمما يمانعازينوۆا وقىپ بەردى. وندا: «ۇلاعاتتى اۋلەت» بايقاۋى – مەرەيلى وتباسىلار مەن ۇزدىك اۋلەتتەردى ناسيحاتتاۋعا ارنالعان جوبا. ەلوردادا بىرنەشە بۋىن وكىلدەرى ءبىر سالادا جەمىستى ەڭبەك ەتىپ جۇرگەن اۋلەتتەر بارشىلىق. حالقىمىزدا «وتان – وتباسىنان باستالادى» دەگەن جاقسى ءسوز بار. ەلىمىزدىڭ بۇتىندىگ ءى مەن تاۋەلسىزدىگىمىزدىڭ كەلەشەگى ەڭ الدىمەن وتباسى ينستيتۋىنىڭ بەرىكتىگىنە بايلانىستى. بايقاۋعا قاتىسقانداردىڭ ءبارى – ماداقتاۋعا لايىق, كوپكە ۇلگى بولعان اۋلەتتەر. سوندىقتان بارشا وتباسىعا جەكە العىسىمدى بىلدىرەمىن» دەلىنگەن قۇتتىقتاۋدا.
ودان كەيىن بەلگىلى قايراتكەر ايگۇل سولوۆەۆا ءسوز الىپ, وتباسى قۇندىلىعى جايىندا سالماقتى ءسوز قوزعادى.
«نەگىزگى بايقاۋدىڭ ماقساتى – كوپ جىلدار بويى ءبىر سالادا ەڭبەك ەتىپ, جەتىستىككە جەتىپ, ونەگەلى ءداستۇردى جالعاستىرعان اۋلەت وكىلدەرىن ەلگە تانىستىرۋ. ءوز سالاسىنىڭ بىلگىرى اتانىپ, اتا جولىن جالعاپ كەلە جاتقان قاراپايىم اۋلەتتەر بارشىلىق. ولاردى كوپشىلىك بىلە بەرمەيدى. سايىسقا 36 وتباسى قۇجات تاپسىردى. ارينە, العاش ۇيىمداستىرعاندىقتان, بايقاۋ تۋرالى باسقا دا اۋلەتتەر حابارسىز بولۋى مۇمكىن. بىراق الداعى جىلى دا ايتۋلى شارا جالعاسىن تابادى» دەدى قالالىق ىشكى ساياسات باسقارماسىنىڭ جاۋاپتى مامانى ساكەن ەسىركەپوۆ. سونىمەن, كوپشىلىكتى كوپ كۇتتىرمەي ماراپاتتاۋ ءراسىمى دە باستالدى. الدىمەن ساحناعا تەمىرجول سالاسىنىڭ ساربازدارىنا اينالعان 200 جىلدان اسا ەڭبەك ءوتىلى بار اليەۆتەر وتباسى كوتەرىلىپ, ولار ءۇشىنشى ورىنعا قول جەتكىزدى. ەكىنشى ورىندى – 220 جىلدىق ەڭبەك ءوتىلى بار, ۇستازدىق قىزمەتتىڭ ابىرويىن اسىرىپ, ۇلاعاتتى ءداستۇردى جالعاپ كەلە جاتقان ازەنوۆتەر وتباسى يەلەندى. ساحناعا وسى اۋلەتتىڭ اقىلشىسىنا اينالعان, ۇزاق جىلدار بويى اۋداندا ادىستەمەلىك كابينەتتىڭ مەڭگەرۋشىسى بولعان, بۇگىندە سەكسەندى القىمداعان ءباتجان اجەمىزدىڭ ءوزى شىعىپ, مەرەيلى ماراپاتتى الدى. ءبىرىنشى ورىندى 109 جىلدىق ەڭبەك وتىلىمەن, ۇستازدار اۋلەتىنىڭ ديناستياسى اتانعان ارعىنباەۆتار وتباسى جەڭىپ الدى. ال باس جۇلدە جوعارىدا ايتىپ وتكەن, ەلورداداعى ەنەرگەتيكا سالاسىنىڭ دامۋىنا قوماقتى ۇلەس قوسقان سىزدىقوۆتار اۋلەتىنە بۇيىردى. جۇلدەگەرلەردىڭ بارلىعىنا دا باعالى سىيلىقتار تابىس ەتىلدى.
– راس ايتسام, «ۇلاعاتتى اۋلەت» بايقاۋىندا توپ جارامىز دەپ ويلاعان جوقپىز. بار بولعانى, سايىستىڭ شارتىنا بايلانىستى قۇجاتتاردى جىبەردىك. ەندى, مىنە, باس جۇلدە بۇيىرىپ تۇر. ارينە, الدىمەن بىزگە سانالى تاربيە بەرىپ, ىزگى جولدى نۇسقاعان اتا-انامىزعا العىسىمىز شەكسىز. اكەم مەن شەشەم دە ەنەرگەتيكا سالاسىندا ەڭبەك ەتتى. ولاردىڭ جولىن ءبىز جالعادىق. ۇلكەن اعام دا – ەنەرگەتيكا سالاسىنىڭ مامانى. مەنىڭ ءوزىم 17 جىلدان بەرى وسى باعىتتا ەڭبەك ەتىپ كەلەمىن. 1-دارەجەلى تەحنيكپىن. ەندى ءبىزدىڭ جولىمىزدى بالالارىمىز قۋدى. بۇدان ارتىق بىزگە قانداي باقىت كەرەك, – دەدى ەلۋباي سىزدىقوۆ.
شىندىعىندا, باقىت دەگەن ءسوزدىڭ ءوزى شارتتى ۇعىم دەپ ايتادى. ءتورت قۇبىلاڭىز تۇگەل بولىپ, اتا جولدان تايماي, وتباسىڭىزدىڭ بەرەكەسى ۇيىپ تۇرسا, ودان ارتىق قانداي
باقىت كەرەك. ەلۋباي اعانىڭ سوزىندە جان بار. وعان ءبىز دە قوسىلدىق.
ازامات ەسەنجول
