ەلوردادا كۇيىپ تۇرعان ماسەلەنىڭ ءبىرى – ۇلەسكەرلىك تۇرعىن ءۇي قۇرىلىسى. كوپ جىلدان بەرى قوردالانىپ قالعان وسى كۇردەلى پروبلەما استاناعا التاي كولگىنوۆ اكىم بولىپ كەلگەلى وڭ شەشىمىن تابا باستادى. ءسوزىمىز دالەلدى بولۋى ءۇشىن تسيفرلاردى سويلەتەيىك.
ەستەرىڭىزگە سالا كەتەيىك, ەلوردادا تۇيتكىلدى 62 نىسان انىقتالعان. تۇيتكىلدىڭ سەبەپتەرى كوپ. ءتىپتى ءبىر قۇرىلىس كومپانيالارىنا قاتىستى بىرنەشە زاڭ بۇزۋشىلىقتار نەمەسە نورماتيۆتىك-تەحنيكالىق سايكەسسىزدىكتەر ورىن العان. ماسەلەن, 10 نىسان بويىنشا – قۇرىلىس سالۋشىلار مەن پايشىلاردىڭ اراسىنداعى داۋ-داماي, 32 نىسان بويىنشا – جوبالىق-سمەتالىق قۇجاتتاردىڭ جانە ساراپتامانىڭ جوقتىعى, 26 نىسان بويىنشا – قارجىلىق جانە تەحنيكالىق ءاۋديتتىڭ جوقتىعى, 25 نىسان بويىنشا قارجىلىق مودەلدىڭ جوقتىعى ۇلەستىك تۇرعىن ءۇي قۇرىلىستارىنىڭ تەجەلۋىنە سەبەپ بولدى. وسىعان وراي 26 نىسانعا اۋديت جاسالىپ, 13-ءىنىڭ جوبالىق-سمەتالىق قۇجاتتارى بەكىتىلىپ, 19-ى ازىرلەنۋ ۇستىندە,12-ءنىڭ قارجىلىق مودەلى قالىپتاستىرىلدى.
بۇگىندە 22 نىسان جەرگىلىكتى اتقارۋشى بيلىك تاراپىنان ەرەكشە نازاردا باقىلانىپ وتىر. بۇل نىساندار بويىنشا نەگىزگى جۇمىستاردى «ەلوردا قۇرىلىس كومپانياسى» جشس جۇرگىزەدى. اتالعان نىساندار «نۇرلى جەر» تۇرعىن ءۇي باعدارلاماسىنا ەنگىزىلىپ, ولارعا 40 ملرد تەڭگە قاراستىرىلعان. پروبلەمالارى ءۇي كەشەندەرىنىڭ قۇرىلىستارىن اياقتاۋ جول كارتاسىنىڭ جوسپارىندا بەكىتىلدى. اكىمدىكتىڭ ۇسىنىسىمەن «نۇرلى جەر» باعدارلاماسىنا ۇلتتىق قوردىڭ, جەكە ينۆەستوردىڭ قارجىسىن جارامسىز ۇيلەردى بۇزۋعا, جەر ساتىپ الۋعا, جاڭا نىساندار سالۋعا پايدالانۋ تۋرالى وزگەرتۋلەر ەنگىزىلدى. ول قۇرىلىس سالاسىنا كوپتەگەن ينۆەستورلاردىڭ كەلۋىنە, «ساقالدى قۇرىلىستارعا» جان بىتىرۋگە سەرپىن بەردى. قالا اكىمى التاي كولگىنوۆتىڭ ايتۋىنشا, وسىنداي شارالاردىڭ ارقاسىندا الداعى 4 جىلدىڭ ىشىندە 14 مىڭنان استام ۇلەسكەرلەر باسپانالى بولاتىن بولدى.
جىل قورىتىندىسى بويىنشا, استانادا بيۋدجەت ەسەبىنەن 3,5 مىڭ باسپانا پايدالانۋعا بەرىلەدى. كەلەر جىلى تۇرعىن ءۇي قۇرىلىسىنا بارلىق كوزدەردەن 43,5 ملرد تەڭگە ءبولىنىپ, اۋدانى 550 مىڭ شارشى مەتر بولاتىن 7 مىڭ پاتەر سالۋ جوسپارلانعان.
دەگەنمەن حالىق سانى جىل سايىن جەدەل ءوسىپ كەلە جاتقان ەلورداسىندا باسپانا جەتىسپەۋشىلىگى ءالى دە وتكىر. بۇگىنگى كۇنى تۇرعىن ءۇي كەزەگىندە 47577 ادام تىركەلگەن. جەرگىلىكتى بيلىك وسى ماسەلەنى شەشۋ ءۇشىن كەلەسىدەي باعىتتاردا جۇمىس ىستەيدى: «باقىتتى وتباسى» باعدارلاماسى بويىنشا; جەڭىلدەتىلگەن نەسيەگە جانە جالعا بەرىلەتىن ۇيلەر; ەڭبەكشى جاستارعا ارنالعان ۇيلەر; بيۋدجەت قىزمەتكەرلەرىنە, كوپبالالى جانە تولىق ەمەس وتباسىلارعا بەرىلەتىن 1 ملن تەڭگەنىڭ سەرتيفيكاتى; «نۇرلى ەرتىس» جانە «ەڭبەك» باعدارلاماسى بويىنشا وتباسىلاردى وزگە وڭىرلەرگە كوشىرۋ.
ۇلەستىك قۇرىلىس ماسەلەلەرى
نەگىزگى پروبلەمالار:
قۇرىلىس سالۋشىلار مەن پايشىلاردىڭ اراسىنداعى داۋ-داماي (10 تقك)
جوبالىق-سمەتالىق قۇجاتتاردىڭ جانە ساراپتامانىڭ بولماۋى
(32 نىسان)
قارجىلىق جانە تەحنيكالىق ءاۋديتتىڭ جوقتىعى (26 نىسان)
قارجىلىق مودەلدىڭ جاسالماۋى (25 نىسان)
قابىلدانعان شارالار:
«نۇرلى جەر» باعدارلاماسىنىڭ ماقساتتى تاعايىندالۋىن كەڭەيتۋ جانە قارجىسىن ەكىنشى قايتارا پايدالانۋ تۋرالى وزگەرتۋلەر ەنگىزىلدى.
13 نىساننىڭ جوبالىق-سمەتالىق قۇجاتتارى بەكىتىلىپ, 19-ى ازىرلەنۋ ۇستىندە.
26 نىسانعا قارجىلىق-
تەحنيكالىق اۋديت جاسالدى
12 نىساننىڭ قارجىلىق
مودەلى قالىپتاستىرىلدى.
