قالا اكىمى التاي كولگىنوۆ شاھارداعى ساقالدى قۇرىلىس نىساندارىن ارالاۋدى جالعاستىرۋدا.
سولاردىڭ ءبىرى – «باسپانا-كوكتال» تۇرعىن ءۇي كەشەنى. بۇگىندە مۇنداعى ءوز پاتەرلەرىن 500-دەن اسا ادام كۇتىپ ءجۇر. اكىم نىسانعا سوڭعى كەلگەن ساتتەن بەرى وبەكت قۇرىلىسى بەكىتىلىپ, ءۇي ساراپتامادان ءوتتى. قۇرىلىس سالۋشىنىڭ ايتۋىنا قاراعاندا, ءۇيدى ارلەۋ بويىنشا ىشكى جۇمىستار كوكتەمدە باستالادى. سونىمەن قاتار ينجەنەرلىك جەلىلەر جۇرگىزىلەدى. قالا اكىمى تك قۇرىلىسىنىڭ بارىسى ۇنەمى قاداعالاۋدا بولاتىنىن اتاپ ءوتتى. «ەڭ باستىسى, مەردىگەر انىقتالدى. مەملەكەت اقشا ءبولدى. تك قۇرىلىسىن «ەلوردا قۇرىلىس» كومپانياسىنىڭ قاتىسۋىمەن «نۇرلى جەر» باعدارلاماسى اياسىندا اياقتايمىز. سۋىق تۇسكەنگە دەيىن ءۇيدىڭ شاتىرىنا قاتىستى جۇمىستاردى اياقتاۋ كەرەك. قولدارىڭىزدا ءۇيدى ەلەكتر ەنەرگياسىنا, سۋمەن جابدىقتاۋعا جانە سۋ بۇرۋعا قوسۋ قۇجاتتارى, سونداي-اق اۋماقتى اباتتاندىرۋ جوباسى بولۋى ءتيىس» دەدى ا. كولگىنوۆ ۇلەسكەرلەرمەن كەزدەسۋىندە.
بۇدان بولەك, شاھار باسشىسى «سەمەينىي» تۇرعىن ءۇي كەشەنىنە دە بارىپ, پوليتسيا دەپارتامەنتىنە پاتەرلەردى قوسارلانعان ساتۋ فاكتىسى بويىنشا تەكسەرىپ, شارالار قولدانۋدى تاپسىردى. سونداي-اق قۇرىلىس سالۋشىنىڭ دەدلايندى ورىنداماعانىن اتاپ ءوتتى. «سەمەينىي» تك ۇلەسكەرلەرىنىڭ سانى – 190 ادام. اكىم سوڭعى رەت كەلگەن ساتتەن باستاپ ءۇيدىڭ جىلۋى, عيماراتتىڭ قاسبەتىن نىعايتۋ, كىرەبەرىستەردەگى ارلەۋ جۇمىستارى باستالعان. الايدا, پاركينگ بويىنشا ماسەلەلەر ءالى دە شەشىمىن تاپقان جوق. تۇرعىنداردىڭ تاعى ءبىر ماسەلەسى – قوعامدىق كولىك جانە ايالداما. قازىرگى تاڭدا وسى باعىتتا جۇمىستار جۇرگىزىلۋدە.
مۇنىمەن قوسا ەلوردا اكىمى «جاسىل-استانا نس» تۇرعىن ءۇي كەشەنىنىڭ ۇلەسكەرلەرىمەن دە جولىقتى. كەشەن ءۇش بلوكتان تۇرادى, ۇلەسكەرلەردىڭ جالپى سانى – 380 ادام. اكىم نىسانعا سوڭعى كەلگەن كەزدەن, ياعني 19 شىلدەدەن بەرى عيماراتتىڭ قاسبەتىن جاساۋ, شاتىردى نىعايتۋ, بالكونداردى جىلۋمەن جابدىقتاۋ بويىنشا جۇمىستار باستالدى. ءۇيدىڭ ءبىرىنشى بلوگىنداعى ءۇش كىرەبەرىستىڭ تۇرعىندارىنا پاتەر كىلتتەرى تاپسىرىلدى.
