ۇلەسكەرلەر ۇنىنە قۇلاق ءتۇردى
ەلوردادا ۇلەسكەرلەردىڭ قۇقىن قورعاۋ بويىنشا كەزەكتى سوت پروتسەسى اياقتالدى. بۇل استانا قالاسى اكىمدىگىنىڭ جانىنداعى ۇلەستىك قۇرىلىس ماسەلەلەرى جونىندەگى ۆەدومستۆوارالىق كوميسسيانىڭ جۇمىسى شەڭبەرىندە جۇزەگە استى.
استانا قالاسىنىڭ پروكۋراتۋراسىنا اياقسىز قالعان قۇرىلىس نىسانىن «فەنيكس-ستوليچنىي» تۇرعىن ءۇي-قۇرىلىس كووپەراتيۆىنە ءوز بەتىمەن اياقتاۋعا بەرۋ تۋرالى ءوتىنىش تۇسكەن. وسى ءوتىنىشتىڭ نەگىزىندە جاسالعان شاعىم بويىنشا ازاماتتىق ءىس قارالىپ, شەشىم شىقتى.
2 ناۋرىزدا استانا قالاسىنىڭ مامانداندىرىلعان اۋدانارالىق ەكونوميكالىق سوتى «فەنيكس-ستوليچنىي» مۇددەسى ءۇشىن «تولەندى» تقك جانە «استانا سيتي بيلد» جشس-نەن 818 ملن تەڭگە كولەمىندە قارجى ءوندىرىپ الۋ جانە قۇرىلىسى اياقتالماعان «ستوليچنىي-2» تك جەر تەلىمدەرىمەن بىرگە بەرۋ تۋرالى ارىز تالاپتاردى قاناعاتتاندىردى.
سوت شەشىمى كەزەك كۇتتىرمەي ورىنداۋعا جولداندى. اتالعان ءراسىم ۇلەسكەرلەردىڭ قۇقىن قورعايدى جانە ازاماتتارعا تۇرعىن ءۇي قۇرىلىسىن ءوز بەتىمەن اياقتاۋعا مۇمكىندىك بەرەدى.
قازىرگى ۋاقىتتا تقك اتالعان نىساندى ادىلەت ورگاندارىندا تىركەۋ ءراسىمىن باستادى.
ورىنبەك وتەمۇرات