وتكەن اپتادا ەلوردا اكىمى التاي كولگىنوۆ Nur Otan پارتياسىنىڭ, وكىلەتتى بيلىكتىڭ وكىلدەرىمەن بىرگە قۇرىلىسى ۇزاققا سوزىلىپ كەتكەن «جەتى جول», «ايسانام De Luxe» تۇرعىن ءۇي كەشەندەرىن ارالاپ, مەردىگەرلەرمەن جانە ۇلەسكەرلەرمەن كەزدەستى.
مۇنىڭ الدىندا اكىم «ساقالدى» قۇرىلىس نىساندارىن ارالاپ جۇرگەندە: «ءار اپتا سايىن ءبىر-ەكى پروبلەمالى كوپپاتەرلى تۇرعىن ۇيلەردى ارالاپ تۇرامىن. جوسپارلى كەستە ءتۇزىلدى. قۇرىلىستىڭ اياقتالۋ پروتسەسىن جانە سوزىلىپ كەتكەن ۇلەسكەرلەر ماسەلەسىنىڭ تۇبەگەيلى شەشىمىن تابۋدى باقىلاۋدا ۇستايمىن» دەگەن بولاتىن. ول جولى جالپى اۋماعى 1760280 شارشى مەتر 330 پاتەرگە ەسەپتەلگەن «گارانت» كتك نىسانىندا بولعان. ونىڭ قۇرىلىسىن «ازبۋكا جيليا» كومپانياسىنىڭ توبى 2011 جىلى باستاپ, كەيىن قۇرىلىستى اياقتاۋ ءۇشىن 2016 جىلى نىساندى «وردا ينجينيرينگ» جشس-كە وتكىزگەن. ۇلەسكەرلەردىڭ جالپى سانى – 168 ادام. نىساندى 2020 جىلدىڭ ءساۋىر ايىندا پايدالانۋعا بەرۋ جوسپارلانىپ وتىرعانى ايتىلعان.
سونداي-اق اكىم شۇبار تۇرعىن الابىنىڭ قالقامان جانە ناركەسكەن كوشەلەرىنىڭ قيىلىسىندا ورنالاسقان «كومفورت de Luxe» تك قۇرىلىس الاڭىندا بولعان. جالپى اۋدانى 1573450 شارشى مەتر 216 پاتەرلى تۇرعىن ءۇي كەشەنىنىڭ قۇرىلىسى 2012 جىلى باستالعان. بۇل نىسان بويىنشا ۇلەسكەرلەردىڭ جالپى سانى – 227 ادام. قۇرىلىس 2019 جىلدىڭ جەلتوقسانىندا اياقتالۋى ءتيىس.
بۇل جولى التاي كولگىنوۆ ن.تىلەنديەۆ, 40/1 داڭعىلى بويىنداعى «جەتى جول» كتك قۇرىلىسىنىڭ الاڭىنا باردى. نىساندى 2013 جىلى «ازبۋكا جيليا» كومپانياسىنىڭ توبى تۇرعىزا باستاعان. كەيىنىرەك تۇرعىن ءۇي كەشەنىن سالۋ «وردا ينجينيرينگ» جشس-كە بەرىلدى. ءۇي 2020 جىلدىڭ ماۋسىم ايىندا پايدالانۋعا بەرىلەدى دەپ جوسپارلانىپ وتىر. جالپى اۋدانى 4040276 شارشى مەتر بولاتىن كەشەننىڭ 944 پاتەرى 595 ۇلەسكەرگە تيەسىلى.
اكىم سونداي-اق ماڭگىلىك ەل مەن كەرەي, جانىبەك حاندار داڭعىلدارىنىڭ قيىلىسىندا ورنالاسقان «ايسانام De Luxe» تك قۇرىلىسىنىڭ بارىسىمەن تانىستى. نىساندى سالۋدى 2014 جىلدىڭ مامىر ايىندا ءدال سول «ازبۋكا جيليا» كومپانياسى باستاعان ەدى. جالپى اۋدانى 3307489 شارشى مەتر بولاتىن تۇرعىن ءۇي كەشەنىنىڭ 386 پاتەرى ۇلەسكەرلەرگە ساتىلدى, ولاردىڭ سانى 465 ادامدى قۇرايدى. ولار كەلەسى جىلى ءوز پاتەرلەرىنە كىرە الادى دەپ بەلگىلەنگەن. ال شىن مانىندە ولاي بولماي شىقتى. «ءاربىر پروبلەمالىق تۇرعىن ءۇي جەكە قارالادى جانە ولار كەزەڭ-كەزەڭىمەن شەشىلەدى. قارجى ءبولىندى, ەندى قۇرىلىسشىلار بۇعان جاۋاپتى قاراۋى ءتيىس. قۇرىلىسقا قوعامدىق, پارتيالىق جانە مەملەكەتتىك باقىلاۋ قويامىز» دەدى اكىم ۇلەسكەرلەرمەن كەزدەسۋدە. ۇلەسكەرلەر ۇكىمەتتىڭ پروبلەمالى قۇرىلىستارعا بارىنشا نازار ءبولىپ وتىرعانىنا, اكىمنىڭ ىسكە بەل شەشىپ كىرىسكەنىنە ريزا بولىپ, العىستارىن ايتتى.
ەستەرىڭىزگە سالا كەتەيىك, وتكەن جىل باسىنان بەرى تۇيتكىل تۋدىرعان 62 نىسان بولعان ەكەن, سونىڭ باسىم بولىگىنىڭ ماسەلەلەرى شەشىلىپتى. قازىر ەرەكشە باقىلاۋدا تۇرعانى – 22. بۇل نىساندار بويىنشا نەگىزگى جۇمىستاردى «ەلوردا قۇرىلىس كومپانياسى» جشس جۇرگىزەدى. اتالعان نىساندار «نۇرلى جەر» تۇرعىن ءۇي باعدارلاماسىنا ەنگىزىلىپ, ولارعا 40 ملرد تەڭگە قاراستىرىلعان. جالپى, پروبلەمالى تۇرعىن ءۇي كەشەندەرىنىڭ قۇرىلىستارىن اياقتاۋ جول كارتاسىنىڭ جوسپارىندا بەكىتىلگەن.
