جارتى عاسىردان استام حالقىمىزدى اسەم ءان مەن كۇمبىرلەگەن كۇيگە بولەپ كەلە جاتقان «قازاقكونتسەرت» مەملەكەتتىك ۇيىمىنا الپىس جىل تولدى. كەشە عانا ىرگەلى ۇجىم جاڭا ماۋسىمىن مەرەيتويلىق باعدارلامامەن اشىپ, كورەرمەندەرگە تاماشا كەش سىيلادى.
وسىعان وراي نۇر-سۇلتان قالاسىنىڭ اكىمى التاي كولگىنوۆ «قازاقكونتسەرت» مەملەكەتتىك كونتسەرتتىك ۇيىمىن 60 جىلدىق مەرەيتويىمەن قۇتتىقتادى: «60 جىل دەگەنىمىز — قۇرمەتكە لايىق ۇلكەن شىعارماشىلىق جول. بۇگىندە تاريحى باي «قازاقكونتسەرت» – ەلىمىزدىڭ ەڭ ءىرى مۋزىكالىق ۇيىمى. مادەنيەت پەن ونەر ءتىلى – بارشامىزعا ورتاق, تۇسىنىكتى, امبەباپ ءتىل. مادەنيەت كەز-كەلگەن مەملەكەت پەن ۇلتتىڭ دامۋىنا نەگىز بولعان. الداعى ۋاقىتتا دا ۇجىم مول ءبىلىمى مەن تاجىريبەسىن مادەنيەت سالاسىنىڭ يگىلىگى جولىندا جۇمساي بەرگەي. دەندەرىڭىزگە ساۋلىق, وتباسىلارىڭىزعا اماندىق پەن باق-بەرەكە, ەڭبەكتەرىڭىزگە تابىس تىلەيمىن!» دەدى قالا باسشىسى.
وسىدان الپىس جىل بۇرىن حالقىمىزدىڭ مۋزىكاسى مەن مۇراسىن ناسيحاتتاۋ ماقساتىندا قازاق كسر مينيسترلەر كەڭەسىنىڭ بۇيرىعىمەن قۇرىلعان ۇيىمنىڭ العاشقى قۇرامىندا, مادەنيەتىمىزدىڭ تاريحىندا ەسىمدەرى التىن ارىپپەن جازىلعان شارا جيەنقۇلوۆا, جامال وماروۆا, جۇسىپبەك ەلەبەكوۆ, رابيعا ەسىمجانوۆا, جاپپاس قالامباەۆ, گۇلجيھان عاليەۆا, عاريفوللا قۇرمانعاليەۆ, روزا باعلانوۆا, ماعاۋيا حامزين سەكىلدى داڭقتى تۇلعالار ەڭبەك ەتتى. كەيىن كەلە ولاردىڭ قاتارىن ەركەعالي راحماديەۆ, سارا تىنىشتىعۇلوۆا, ءازيدوللا ەسقاليەۆ, سۇلتانعالي شۇكىروۆ, گۇلجان تالپاقوۆا سەكىلدى كورنەكتى ونەرپازدار تولىقتىردى. ولاردىڭ ءىزىن روزا رىمباەۆا, جەڭىس سەيدۋللاۇلى, ماقپال ءجۇنىسوۆا, ايجان نۇرماعامبەتوۆا, ەرلان رىسقالي, ازامات جىلتىركوزوۆ, ءمولدىر اۋەلبەكوۆا جانە باسقا دا ساحنا مايتالماندارى جالعادى. وسى ۋاقىت ىشىندە ءبىراز اسۋدان اسقان ۇيىم وتاندىق ونەردىڭ ورتالىعىنا اينالىپ, قانشاما تالانتتى تۇلەپ ۇشىردى.
2016 جىلى «قازاقكونتسەرتكە» مادەنيەت جانە سپورت مينيسترلىگىنىڭ مەملەكەتتىك ۇيىمى مارتەبەسى بەرىلدى. بۇگىندە وندا ەلىمىزدىڭ ۇزدىك ارتىستەرى مەن شىعارماشىلىق ۇجىمدارى باس قوسىپ, بارلىق مۋزىكالىق ونەردىڭ جانرلارى ۇسىنىلعان. شىعارماشىلىق قۇرامعا «استانا سازى» قازاق مەملەكەتتىك فولكلورلىق ءانسامبلى, «فورتە تريو» مەملەكەتتىك تريوسى, قازاق مەملەكەتتىك سيمفونيالىق وركەسترى, «Astana Musical» مەملەكەتتىك تەاترى, ەسترادالىق انشىلەر مەن توپتار كىرەدى. ماسەلەن, «استانا سازى» قازاق مەملەكەتتىك فولكلورلىق ءانسامبلى – اتا-بابامىزدان قالعان باي مادەني مۇرا مەن ءداستۇرىمىزدى تەرەڭ مەڭگەرىپ, حالىق مۋزىكاسى ارقىلى ۇلتتىق قۇندىلىقتاردى جاڭعىرتىپ جۇرگەن ۇجىم. انسامبل قۇرامىنداعى مۋزىكانتتار دومبىرا, قىلقوبىز, نارقوبىز, جەتىگەن, سىرناي, سازسىرناي, سىبىزعى, شەرتەر, داڭعىرا, دابىل, ءمۇيىز سىرناي سەكىلدى حالقىمىزدىڭ كونە اسپاپتارىندا شەبەر وينايدى. قازاق مەملەكەتتىك سيمفونيالىق وركەسترى دە ەلىمىزدەگى ۇزدىك مۋزىكالىق ۇجىمنىڭ ءبىرى. وركەستردىڭ قۇرامىندا جەتپىسكە جۋىق كاسىبي مۋزىكانت ەڭبەك ەتەدى. ولار ءارتۇرلى داۋىرلەر مەن ستيلدەردىڭ تۋىندىلارىن, حالىق اندەرى مەن كۇيلەرىنىڭ وڭدەلگەن نۇسقالارىن ورىندايدى. سيمفونيالىق وركەستر دۇنيەجۇزىنە بەلگىلى ديريجەرلاردىڭ قاتىسۋىمەن وتەتىن ارنايى كونتسەرتتىك باعدارلامالاردى ۇيىمداستىرادى. سونداي-اق «Astana Musical» – ەلىمىزدەگى تۇڭعىش مەملەكەتتىك ميۋزيكل تەاترى. ميۋزيكل – ءارتۇرلى ونەر جانرلارىن ءبىر ارناعا توعىستىرعان, مۋزىكا, حورەوگرافيا, اكتەرلىك شەبەرلىك, اكروباتيكا سەكىلدى ەڭ وزىق ۇلگىلەردى بىرىكتىرگەن مۋزىكالىق-ساحنالىق قويىلىم. اتالعان تەاتر قر تۇڭعىش پرەزيدەنتى – ەلباسى نۇرسۇلتان نازارباەۆتىڭ «جاھانداعى زاماناۋي قازاقستاندىق مادەنيەت» جوباسى اياسىندا 2017 جىلعى جەلتوقسان ايىندا ەۋروپانىڭ ەڭ ءىرى بەس قالاسىن قامتىعان حالىقارالىق گاسترولدىك تۋرنە وتكىزدى. 2018 جىلى «Astana Musical» الەم تەاترلارىنىڭ ونەر الاڭىنا اينالعان «اۆينون» حالىقارالىق تەاتر فەستيۆالىنە قاتىستى.
جوعارىدا ايتقان مەرەيتويلىق كەشتە «قازاقكونتسەرت» ۇيىمىنىڭ ديرەكتورى جەڭىس سەيدۋللاۇلى: «بۇل – 60 جىلدان بەرى ونەر سۇيەر قاۋىمنىڭ جانسارايىن اسەم اۋەنمەن جادىراتىپ جۇرگەن كيەلى قاراشاڭىراق تارتۋ ەتەتىن جاڭا جوبالاردىڭ باستاماسى عانا» دەپ ايتىپتى. قىسقاسى, مەرەيتويلىق جىلدىڭ اياسىندا كورەرمەندەر ونلاين جانە ءداستۇرلى فورماتتا جاڭا كونتسەرتتىك باعدارلاما, پرەمەرا جانە تىڭ جوبالارمەن قاۋىشپاق.
