– مەملەكەت باسشىسى قاسىم-جومارت توقاەۆتىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى حالقىمىزعا ارناعان جولداۋىندا ەلىمىزدىڭ ەڭ ءبىر كوكەيتەستى ماسەلەلەرى تەرەڭ سيپاتتالعان. اسىرەسە, «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ – بارىمىزگە ورتاق مىندەت ەكەنى جاقسى ايتىلعان.
ءار حالىق ءۇشىن جەردەن قاسيەتتى دۇنيە جوق. پرەزيدەنت وسى جولداۋدا جۇرتشىلىقتى تولعاندىرىپ جۇرگەن جەر ماسەلەسىنە ارنايى توقتالىپ: «مەملەكەت باسشىسى رەتىندە تاعى دا مالىمدەيمىن: جەرىمىز شەتەلدىكتەرگە ساتىلمايدى. وعان جول بەرىلمەيدى» دەدى. وسى پاراساتتى تولعام ەل كوڭىلىنەن شىقتى دەپ ويلايمىن. سونداي-اق قاسىم-جومارت كەمەلۇلىنىڭ «قازاق ءتىلىنىڭ مەملەكەتتىك ءتىل رەتىندەگى ءرولى كۇشەيىپ, ۇلتارالىق قاتىناس تىلىنە اينالاتىن كەزەڭى كەلدى دەپ ەسەپتەيمىن» دەپ ايتقانى وتە قۇپتارلىق. وسى تۇرعىدان كەلگەندە, الداعى جىلى التىن وردانىڭ 750 جىلدىعىن, ءال-ءفارابيدىڭ 1 150 جىلدىق, اباي اتامىزدىڭ 175 جىلدىعىن اتاپ ءوتۋ ۇلت تاريحىن تۇگەندەۋگە ايتارلىقتاي سەرپىن بەردى.
وسى جەردە ءبىر ۇسىنىسىمدى ايتا كەتسەم دەيمىن. انا ءتىلىمىزدىڭ بايلىعى, بار قازىناسى كوركەم ادەبيەتىمىزدە جاتىر. سوندىقتان قازاق كلاسسيكتەرىنىڭ ءجۇز شىعارماسىن مەكتەپ باعدارلاماسىنا ەنگىزىپ, جوعارى وقۋ ورىندارىنا دا مىندەتتى تۇردە وقىتۋ قاجەت. ويتكەنى ەلىمىزدەگى ءار ادامنىڭ ينتەللەكتۋالدىق مادەنيەتىن قالىپتاستىرۋعا, رۋحاني دامىتۋعا ءمان بەرىلۋى كەرەك. كەز كەلگەن مەكەمە باسشىسىنا حالىقتىڭ تاريحى مەن ءتىلىن, ءداستۇرىن جەتىك بىلەتىن, پاراساتتى ازاماتتار ىرىكتەلىپ تاعايىندالسا دەيمىن. ايتپەسە, حاكىم اباي اتامىز ايتقان «كەسەلدى قۋلار» كوبەيىپ كەتتى.
جولداۋدا ءبىلىم سالاسىنا قاتىستى دا ءبىراز ماسەلەلەر قامتىلعان. قالا مەن اۋىل مەكتەپتەرى اراسىنداعى ورتا ءبىلىم سالاسىنىڭ الشاقتاپ بارا جاتقانى, اۋىلدىق جەرلەردەگى بىلىكتى پەداگوگتاردىڭ تاپشىلىعى سەكىلدى پروبلەمالار – مەنىڭ دە جانىما باتادى. عىلىم سالاسىنا دا ەرەكشە نازار اۋدارىلعانى مەنى قۋانتىپ وتىر. شىن مانىندە, عىلىم دامىماي, مەملەكەتتىڭ العا ءجۇرۋى قيىن. ءبارى – ءبىر-بىرىمەن ساباقتاسىپ جاتقان دۇنيەلەر. سونىمەن قاتار مادەنيەت قىزمەتكەرلەرىن قولداۋعا دا كوڭىل ءبولىنىپتى. شىندىعىندا, ەلىمىزدەگى كىتاپحانا, مۋزەي سالاسىنىڭ ماماندارىنىڭ جالاقىسى وتە ماردىمسىز. قازىر بىزدە «كىتاپحانا, جاتاقحانا, ءدارىحانا» دەگەن ۇقساس اتاۋلار ءجيى كەزدەسەدى. كونە ءۇندى جۇرتىندا كىتاپحانانى «دانالىق ءۇي» دەپ اتاعان. بىزگە دە كىتاپحانانى وسىلاي اتاۋعا بولادى.
حالقىمىز «اۋىل – التىن بەسىك» دەپ بەكەر ايتپاعان. پرەزيدەنت ءوز جولداۋىندا اۋىلدى كوركەيتۋ جايىندا دا سالماقتى ويلار قوزعاعان. سودان كەيىن اۋىل, اۋدان, قالا ەكونوميكالىق تۇرعىدان دەربەس بولۋ كەرەك دەگەنى دە كوڭىلگە قونادى. ءار ەلدى مەكەن ءوز ماسەلەسىن ءوزى شەشكەنى ءجون. سونداي-اق وتباسى جانە بالا تاربيەسى, مەديتسينالىق قىزمەت, الەۋمەتتىك كومەك, تۋريزم, شاعىن جانە ورتا بيزنەس سەكىلدى وزەكتى ماسەلەلەر جان-جاقتى سارالانعان. قورىتا كەلگەندە, مەملەكەت باسشىسىنىڭ جولداۋى ەلىمىزدىڭ ودان ءارى دامۋ باعىتىن كورسەتىپ بەردى دەپ ايتۋعا بولادى.
