ەلوردادا ۇلت تاريحىنداعى ۇلى تۇلعالاردىڭ ءبىرى تولە بي بابامىز تۋرالى تۇسىرىلگەن «تولە بي» اتتى تەلەحيكايانىڭ تانىستىرىلىمى بولدى. بۇل تۋىندى تۇركىستان وبلىسىنىڭ قۇرىلعانىنا ءبىر جىل تولۋىنا وراي كورەرمەنگە جول تارتىپ وتىر. تەلەحيكايا 10 سەريادان تۇرادى. وندا ءۇش جۇزگە توبە بي بولعان بابامىزدىڭ بالا كۇنىنەن باستاپ ەل ابىزى اتانعان شاعىنا دەيىنگى ءومىرى قامتىلعان.
تاريحي تۋىندىنىڭ تانىستىرىلىمىندا تۇركىستان وبلىسى اكىمىنىڭ ورىنباسارى مالىك وتارباەۆ ءسوز الىپ, ەلورداعا كيەلى شاھاردىڭ سالەمىن جەتكىزدى.
– ءبىز بۇگىن وبلىسىمىزدىڭ ءبىر جىلدىعىنا وراي باس قالادا ۇلكەن مادەني اپتالىقتى باستادىق. بارشا قازاق ءۇشىن تۇركىستاننىڭ ورنى بولەك. بۇل كيەلى جەردە تاريحىمىزداعى ورنى بولەك حاندار مەن سۇلتاندار, بيلەر مەن باتىرلار جەرلەنگەن. بۇگىندە تۇركىستاندا رۋحانيات سالاسىندا كوپتەگەن جۇمىستار قولعا الىندى. سولاردىڭ ءبىرى – تولە بي بابامىز تۋرالى تۇسىرىلگەن تەلەحيكايا. بۇل فيلم زاماناۋي تالاپتارعا تولىق جاۋاپ بەرەدى. تۋىندىنى كورگەن جاستار ودان تاعىلىمدى وي تۇيەدى دەپ ويلايمىن, – دەدى ول.
تەلەحيكايانىڭ ءار سەرياسى 30 مينۋتتان تۇرادى. فيلمگە, نەگىزىنەن, جەرگىلىكتى اكتەرلەر تاڭدالعان. تولە ءبيدىڭ جاس كۇنىن ابزال تولەن ەسىمدى جاس اكتەر ويناسا, ۇلعايعان كەزىندەگى بەينەسىن ساعىندىق ءجۇمادىلوۆ سومدايدى. كينونىڭ ستسەناريىن شويبەك ورىنباي مەن باقىتجان قۇلجاباي جازعان. كومپوزيتورى – رۋسلان شىنىقۇلوۆ.
– بۇل تۋىندىدا تولە بي بابامىز عۇمىر كەشكەن ءداۋىردى, سول كەزدەگى بيلەر ينستيتۋتىن بەرۋگە كۇش سالدىق. سونىمەن بىرگە ايتۋلى تۇلعانىڭ تاۋكە حان, قازىبەك بي, ايتەكە بي, بوگەنباي, قابانباي سەكىلدى باتىرلارمەن ەل باسىنا كۇن تۋعان تار كەزەڭدە ەلدىك ماسەلەنى بىرگە شەشكەن كەزدەرى باياندالادى. قىسقاسى, حيكاياعا ۇلت تاريحىندا ءىزى قالعان تالاي تۇلعانىڭ وبرازى ەندى. وسى جوباعا بەلگىلى رەجيسسەر ساتىبالدى نارىمبەتوۆ كوركەمدىك جەتەكشى رەتىندە قولداۋ كورسەتسە, پاراساتتى پروزاشى مارحابات بايعۇت كينونىڭ ءتىل تازالىعىنا جاۋاپ بەردى, – دەدى «ساق» كينوستۋدياسىنىڭ ديرەكتورى نۇريددين پاتتەەۆ.
جاڭا تەلەحيكايانىڭ تولىق نۇسقاسى قالا كۇنى قارساڭىندا «حابار» ارناسىنان كورسەتىلمەك. سونداي-اق تۇركىستان وبلىسىنىڭ ءبىر جىلدىعى اياسىندا ەلوردادا «وڭتۇستىك فيلم» كومپانياسى مەن «ساق» كينوستۋدياسىنىڭ بىرنەشە انيماتسيالىق تۋىندىسى جۇرتشىلىققا ۇسىنىلادى.
ايجان قامباتىروۆا,
ل.گۋميلەۆ اتىنداعى
ەۋرازيا ۇلتتىق
ۋنيۆەرسيتەتىنىڭ ستۋدەنتى
