كەشە ۇلت ۇستازى – احمەت بايتۇرسىنۇلىنىڭ تۋعانىنا مەرەيلى 150 جىل تولۋىنا وراي ەلوردانىڭ زيالىلار قاۋىمى قالامگەرلەر اللەياسىندا «الاش قايراتكەرلەرى» ەسكەرتكىشىنە گۇل شوعىن قويىپ, تاعزىم ەتتى. ءىس-شاراعا عىلىم جانە جوعارى ءبىلىم ءمينيسترى ساياسات نۇربەك, اقپارات جانە قوعامدىق دامۋ ءمينيسترى دارحان قىدىرالى, مادەنيەت جانە سپورت ءمينيسترى داۋرەن اباەۆ, نۇر-سۇلتان قالاسى اكىمىنىڭ ورىنباسارى ەسەت بايكەن, نۇر-سۇلتان قالاسى ءماسليحاتىنىڭ حاتشىسى ەرلان كاناليموۆ جانە احمەتتانۋشى, الاشتانۋشى عالىمدار قاتىستى.
ءىس-شارا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە ۇيىمداستىرىلعان «احمەت بايتۇرسىنۇلىنىڭ عىلىمي مۇراسى جانە جاڭا قازاقستاننىڭ زياتكەرلىك ساباقتاستىعى» اتتى حالىقارالىق عىلىمي-پراكتيكالىق كونفەرەنتسيامەن جالعاستى. سونىمەن قاتار ا.بايتۇرسىنۇلى اتىنداعى № 48 مەكتەپ-ليتسەيدەگى ۇلت ۇستازى مۋزەيىنە بارۋ, «مەكتەپ جانە احمەت بايتۇرسىنۇلى» كورمەسىن تاماشالاۋ, مەكتەپ مۇعالىمدەرى ءىس-تاجىريبەسىمەن تانىسۋ شارالارى ءوتتى.
«وزگە وقىعان زامانداستارى ءوز باستارىنىڭ پايداسىن عانا ىزدەپ, ار ءھام يماندارىن ساتىپ جۇرگەندە, احمەت حالىقتىڭ ارىن ىزدەپ, ءوزىنىڭ ويعا العان ءىسى ءۇشىن ءبىر باسىن بايگەگە تىككەن. احمەت بايتۇرسىنۇلى – ۇلتىن شىن سۇيەتىن شىن ۇلتشىل» دەدى ساكەن سەيفۋللين. قيىن-قىستاۋ زاماندا ءومىر ءسۇرىپ, سوڭىندا وشپەس ءىز قالدىرعان احمەت بايتۇرسىنۇلىنىڭ مەرەيتويى يۋنەسكو دەڭگەيىندە اتالىپ وتۋدە. ەلوردادا بىرنەشە حالىقارالىق عىلىمي كونفەرەنتسيا, ءمۇشايرا ءوتتى. احاڭنىڭ اتى مەكتەپ پەن داڭعىلعا بەرىلدى. جاقىندا ەڭسەلى ەسكەرتكىشى دە بوي كوتەرەدى دەگەن جوسپار بار.
«احمەت بايتۇرسىنوۆ – بىرىنشىدەن, قازاق ءتىلىنىڭ تۇڭعىش الىپپەسى مەن وقۋلىقتارىنىڭ اۆتورى. سوڭىنان ءىز سالعان جاڭاشىل اعارتۋشى. قازاق وقۋشىلارىنىڭ بىرنەشە بۋىنى ساۋاتىن بايتۇرسىنوۆتىڭ ءالىپ-بيىمەن اشىپ, انا ءتىلىن بايتۇرسىنوۆتىڭ «ءتىل قۇرالى» ارقىلى وقىپ ۇيرەندى» دەيدى اكادەميك, پروفەسسور رابيعا سىزدىقوۆا.
الاش ارداگەرى, ءتىل ءبىلىمىنىڭ اتاسى احمەت بايتۇرسىنۇلىنىڭ 150 جىلدىق مەرەيتويى جانە ءتىل مەرەكەسى اياسىندا قر عىلىم جانە جوعارى ءبىلىم مينيسترلىگى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «احمەت بايتۇرسىنۇلىنىڭ عىلىمي مۇراسى جانە جاڭا قازاقستاننىڭ زياتكەرلىك ساباقتاستىعى» اتتى حالىقارالىق عىلىمي-پراكتيكالىق كونفەرەنتسيا ءوتتى.
كونفەرەنتسياعا قر عىلىم جانە جوعارى ءبىلىم ءمينيسترى س.نۇربەك, قر اقپارات جانە قوعامدىق دامۋ مينيسترى د. قىدىرالى, قر مادەنيەت جانە سپورت ءمينيسترى د.اباەۆ, قازاقستان, رەسەي, اقش, تۇركيا, ۆەنگريا, پولشا, تۇرىكمەنستان, وزبەكستان, تاتارستان, قىرعىزستاننىڭ, ت.ب. ەلدەردىڭ عالىمدارى قاتىسىپ, بايانداما جاسادى.
ءىس-شارا اياسىندا قر عىلىم جانە جوعارى ءبىلىم مينيسترلىگى ءتىل ساياساتى كوميتەتىنىڭ «احمەت بايتۇرسىنۇلى مەن الاش زيالىلارى تۋرالى جاڭا مۇراعات دەرەكتەرى» اتتى تانىستىرىلىمى جانە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى, اكادەميك ە.سىدىقوۆتىڭ ماسكەۋدىڭ «حۋدوجەستۆەننايا ليتەراتۋرا» باسپاسىنان شىققان «احمەت بايتۋرسىنوۆ – ۋچيتەل ناتسي» اتتى كىتابىنىڭ تۇساۋكەسەرى ءوتتى.
گۇلشات ساپارقىزى
