استاناداعى اسكەري-تاريحي مۋزەيدە بەلگىلى زەرگەر سەرجان ءباشىروۆتىڭ «ۇلت جاۋھارلارى» اتتى كوللەكتسيالىق كورمەسى وتۋدە.
مادەني شاراعا تاقىرىپ وتە تاۋىپ قويىلعان. ۇلت جاۋھارلارى قانداي كەلىستى ءسوز. حالقىمىز ءتۇرلى زوبالاڭدار كەسىرىنەن تالاي جاۋھارلارىنان ايىرىلىپ قالدى. بىراق وكىنىشتىڭ ورنى بىرتە-بىرتە تولىپ كەلەدى. ونىڭ ءوزى – ۇلتتىق قۇندىلىقتاردى قادىرلەگەن سەرجان ءباشىروۆ سەكىلدى ازاماتتاردىڭ ارقاسىندا. سەرجان – زەرگەرلىك ونەردەن ءورىسىن تاپقان شەبەر. بابالار ورنەكتەگەن ءداستۇردى جالعاستىرۋشى. شىرايلى شىعىستاعى تارباعاتاي تاۋىنىڭ ءبىر قولتىعىندا تۋعان ول جاسىنان زەرگەرلىكپەن اۋەستەنىپ, كەيىن الماتى كوركەمسۋرەت ۋچيليششەسىن «مەتالدى كوركەم وڭدەۋ» ماماندىعى بويىنشا بىتىرگەن. ەتنواۆانگارد ستيلىندەگى زەرگەرلىك بۇيىمداردىڭ اۆتورى. جۇمىستارىنا كوبىنەسە كۇمىس, سۇيەك, مارجان, كوگىلدىر اقىقتى قولدانادى. ونىڭ تۋىندىلارى الىس-جاقىن شەت مەملەكەتتەرگە تانىلىپ ۇلگەرگەن. بىرقاتار حالىقارالىق, رەسپۋبليكالىق بايقاۋلاردىڭ جەڭىمپازى اتانعان.
كورمەگە زەرگەردىڭ جاساعان بۇيىمدارى مەن كوللەكتسيالىق زاتتارى قويىلدى. ءبىر عاجابى, شەبەر بۇرىنعى اتالارىمىز تىرشىلىككە قولدانعان دۇنيەلەردى جيناۋمەن اينالىسادى. جيناۋمەن عانا شەكتەلمەي, ونى قالپىنا كەلتىرىپ, ءمىنسىز شەبەردىڭ قولىنان شىققانداي جۇتىندىرىپ قويادى. كورمەدەگى عاسىردان استام ساقتالعان تۇسكيىزدەر, كەبەجەلەر, ساندىقتار كەلۋشىلەردىڭ قىزىعۋشىلىعىن تۋعىزدى. ەرتەدەگى اتالارىمىز پايدالانعان ءشيتى مىلتىق, كۇمىسپەن ادىپتەلگەن ەر توقىم, ۇزەڭگى, ومىلدىرىك سەكىلدى بۇيىمداردى كورىپ, بۇرىنعى زامانعا ساپارلاپ بارعانداي كۇي كەشتىك. وتكەن عاسىرداعى كيىز ءۇيدىڭ ەسىگى – سىقىرلاۋىق پەن ەرلەر بەلدىگىنىڭ كوزدىڭ جاۋىن الار ءتۇرلىسىن كورەسىز. باياعى اجەلەرىمىز توقىعان قىپ-قىزىل كىلەمدەردىڭ ءوزى كورمەگە ەرەكشە كورىك بەرىپ تۇر. كۇندەلىكتى قاجەتكە جارايتىن تۇرمىستىق زاتتاردى كەزدەستىرەسىز. وسىنداي كونەدەن سىر تارتاتىن دۇنيەنى تىرنەكتەپ جيناۋ دا وڭاي ەمەس. زەرگەردىڭ كوللەكتسيالىق توپتامامەن اينالىسقانىنا وتىز جىلدان استام ۋاقىت ءوتىپتى. ونىڭ ءبىرىن ءوزى ساتىپ السا, ەكىنشىسىن اۋەستىگىن بىلەتىن ادامدار سىيعا تارتقان.
شاراعا قر قك باس شتابى باستىعىنىڭ ورىنباسارى, گەنەرال-مايور مۇحامەدجان تالاسوۆ قاتىسىپ, زەرگەردىڭ شىعارماشىلىعى تۋرالى ءسوز قوزعاپ, وعان الداعى تاڭدا جۇرتشىلىقتى قۋانتا بەرەر جاڭا تابىستار تىلەدى.
ايتا كەتەيىك, كورمە 30 جەلتوقسانعا دەيىن جالعاسادى.
ازامات ەسەنجول
