كەشە وقۋشىلار سارايىندا «Capolavoro di dombra – 2018» قازاق حالقىنىڭ كونە ۇلت اسپاپتارىنىڭ ءى حالىقارالىق فەستيۆال-كونكۋرسى اشىلدى. بايقاۋدى استانا قالاسى اكىمدىگىنىڭ قولداۋىمەن ونەر, مادەنيەت, ءبىلىم جانە سپورت سالاسىنداعى تالانتتاردى قولداۋ حالىقارالىق قورى ۇيىمداستىردى.
اسپاپتىق جانر, ۆوكال, ۇلتتىق كوركەمونەر كاسىپتەرى جانە قولونەر اتالىمدارى بويىنشا ءوتىپ وتىرعان بايقاۋعا قىتاي, قىرعىزستان, ارمەنيا مەملەكەتتەرىمەن قاتار ەلىمىزدىڭ تۇكپىر-تۇكپىرىنەن كەلگەن ونەرپازدار قاتىسىپ جاتىر. العاشقى اتالىمدا دۋەت, تريو, انسامبلدەر مەن وركەسترلەر جارىسقا قوسىلدى. ال ەكىنشى اتالىمنىڭ باستى شارتى – قازاق ۇلتتىق اسپاپتارىمەن ءان ورىنداۋ. كەلەسى اتالىمداردا مەتالدى كوركەمدەپ وڭدەۋگە, مەتال جانە اعاشتى كوركەم اشەكەيلەۋگە, كوركەم كەراميكاعا, سۇيەكتى كوركەمدەپ وڭدەۋگە, ءتۇرلى كادەسىيلارعا باعا بەرىلەدى.
بايقاۋدىڭ ءبىر ەرەكشەلىگى, مۇندا سىبىزعى, دابىل, داۋىلپاز, جەتىگەن, داڭعىرا, اساتاياق, ۇران, قوبىز, شاڭقوبىز, شەرتەر, سازسىرناي, توقىلداق, تۇياقتاس سياقتى قازاقتىڭ ۇلتتىق اسپاپتارى ناسيحاتتالادى.
ەكى كۇندىك بايقاۋ جەڭىمپازدارى بۇگىن وتەتىن گالا-كونتسەرتتە ماراپاتتالادى.
