«ۇلتتىق مۋزەيگە سىي-تارتۋ» اكتسياسى جالعاسۋدا. مۇراجاي قورىن تولىقتىرۋدى كوزدەيتىن جوبا اياسىندا استاناداعى ۇلتتىق مۋزەيگە بىلتىردان بەرى 1816 تاريحي ەكسپونات تابىستالدى.
ونىڭ ىشىندە ءىلياس جانسۇگىروۆ, جۇمەكەن ناجىمەدەنوۆ, قادىر مىرزا ءالي, كەنەن ازىرباەۆ, ءشامشى قالداياقوۆ, قاسىم قايسەنوۆ, جۇمابەك تاشەنوۆ سىندى اتاقتى تۇلعالاردىڭ ءومىرى مەن شىعارماشىلىعىنا قاتىستى جادىگەرلەر بار.
بيىل يگى شارانى اقتوبە وبلىسى ءىلىپ اكەتىپ, سالتاناتتى تۇردە 300-گە جۋىق ەكسپوناتتى تارتۋ ەتتى.
ەل تاۋەلسىزدىگىنە 25 جىلدىعىنا قارسى بۇل اكتسيانىڭ ۇلتتىق يدەولوگيانى, ونىڭ ىشىندە «ماڭگىلىك ەل» يدەياسىن قولداۋدا ماڭىزى زور. ەلىمىزدىڭ تۇكپىر-تۇكپىرىنەن جينالىپ جاتقان جادىگەرلەر قازاق تاريحىنىڭ كۋاگەرى ىسپەتتى. ونىڭ بارلىعى دا كەلەشەك ۇرپاق ءۇشىن اسا قاجەت, – دەدى اقتوبە وبلىسى اكىمىنىڭ ورىنباسارى اسقار شەريازدانوۆ.
شاراعا قۇدايبەرگەن جۇبانوۆ, نۇرپەيىس بايعانين, ءاليا مولداعۇلوۆا, مارات وسپانوۆتىڭ ۇرپاقتارى بەلسەنە اتسالىستى, سونداي-اق, جاس ميلليونەر مارات جاقسىلىقۇلى, بوكستان ازيا جانە الەم چەمپيونى گاليب جافاروۆ, قازاقشا كۇرەس پالۋانى باقتىباي قيسىقوۆ, ەل جەتىستىكتەرىنە جەڭىس اكەلىپ جۇرگەن تاعى دا باسقا ازاماتتار ۇلتتىق مۋزەيگە جەكە زاتتارىن تاپسىردى. بارلىق سىي-تارتۋعا زاڭدىق نەگىزدە قابىلداپ الۋ شارتى جاسالىپ, الداعى ۋاقىتتا جۇرت نازارىنا ارنايى كورمە ۇسىنىلماق.
ءمادينا جاقىپ
