تاياۋدا عانا كورنەكتى كومپوزيتور, قازاقستاننىڭ جانە كسرو حالىق ءارتىسى, مەملەكەتتىك سىيلىقتىڭ لاۋرەاتى, قازاقستاننىڭ ەڭبەك ەرى ەركەعالي راحماديەۆتىڭ اتى بەرىلگەن ەلوردانىڭ مەملەكەتتىك اكادەميالىق فيلارمونياسى «نازقوڭىر» اتتى كونتسەرت وتكىزدى. «استانا» كونتسەرت زالىندا وتكەن كەشتى ونەر وشاعىنىڭ «حالىق ءانى» ءبولىمى ۇيىمداستىردى.
التايدان اتىراۋعا دەيىنگى كەڭ بايتاق دالامىزدا قازاق مۋزىكاسى وڭىرلىك جانە ورىنداۋشىلىق ەرەكشەلىگىنە قاراي باتىس انشىلىك مەكتەبى, جەتىسۋ ءان مەكتەبى, سىر بويىنىڭ انشىلىك مەكتەبى, ارقا انشىلىك مەكتەبى جانە التاي, تارباعاتاي مەكتەبى بولىپ بولىنەدى. ماسەلەن, باتىستا مۇحيت مەرالىۇلى ءبىر مەكتەپ قالىپتاستىرسا, جەتىسۋدا جامبىل مەن كەنەن, سىر بويىندا نۇرتۋعان, تۇرماعامبەت سىندى ۇلتتىق مۋزىكانىڭ الىپتارى ءومىر ءسۇردى. ارقادا اقان سەرى مەن ءبىرجان سال, التايدىڭ بەرگى جاعى مەن ارعى جاعىندا نەبىر دۇلدۇلدەر وتكەن. كەشتە وسى مەكتەپتەردىڭ بارلىعى قامتىلدى.
قازاقستاننىڭ ەڭبەك سىڭىرگەن قايراتكەرلەرى ايگۇل قوسانوۆا, گۇلزيرا بوكەيحان, گۇلميرا سارينا, مادەنيەت قايراتكەرى سەكەن سىزدىقوۆ, فيلارمونيانىڭ «حالىق ءانى» ءبولىمىنىڭ كوركەمدىك جەتەكشىسى تەلمان نۇركەنوۆ, رەسپۋبليكالىق جانە حالىقارالىق بايقاۋلاردىڭ لاۋرەاتتارى ساۋلەجان تاعزيا, وزگەرىس شەرىكباي, پەريزات تۇراروۆا, ايگەرىم نارتۇيە, جاندوس يمانباي, دانيار مۇقان, اينۇر قونىسباەۆا, ايدوس وڭعارباي, جاقسىگەلدى ماياساروۆ, ەلبول قۋانبەك, باۋىرجان نۇرمۇحانوۆ, نۇرجان مەيرحان, وسپان قۇلسىماق, ايبالا بەيسەنوۆا, الۋا قالىمبەكوۆا اسەم اندەردى اۋەلەتتى.
