بەيبىتشىلىك جانە كەلىسىم سارايىندا «The Magic of Nomads» توبىنىڭ «مەنىڭ قازاقستانىم» اتتى كونتسەرتى ءوتتى. وسىدان ون ءبىر جىل بۇرىن قۇرىلعان ۇجىم وسى ۋاقىت ارالىعىندا نيۋ-يورك, لوندون, بەرلين, فرانكفۋرت, گاننوۆەر, ميۋنحەن قالالارىندا ونەر كورسەتىپ ۇلگەردى. قازاق مۋزىكاسىن دجاز جانە زاماناۋي مۋزىكانىڭ ءتۇرلى جانرلارىمەن ۇشتاستىرىپ, ەتنوفيۋجن ستيلىندە جۇمىس ىستەيتىن توپ بۇل جولى استانالىقتاردى جانە قالا قوناقتارىن ونەرىمەن تامسانتتى.
قوبىزشى عازيزا عابدراحيموۆا, سوليستەر ۆيكتور حومەنكوۆ, جالعاسبەك ىلەس, قۇرمانعازى قاليەۆ, ەرمەك ديا-روۆ, ۆالەري ناسيبۋلين جانە وزگە دە مۋزىكانتتاردان قۇرالعان توپتىڭ پروديۋسەرى بەلگىلى كومپوزيتور رەنات عايسين. كونتسەرتتە دە نەگىزىنەن ول وڭدەگەن شىعارمالار ورىندالدى.
ولاردىڭ قاتارىنان «ياپۋراي», «ءاي-ءاي بوپەم», «ەلىگاي» سىندى حالىق اندەرى, جاياۋ مۇسانىڭ «اق سيساسى», ۇكىلى ىبىرايدىڭ «گاككۋى», سۇگىردىڭ «ىڭعاي توك», ءابدىمومىن جەلدىباەۆتىڭ «ەركە سىلقىم» كۇيلەرى ورىن الدى. سونداي-اق, رەنات عايسيننىڭ جانە ۆيكتور حومەنكوۆتىڭ اۆتورلىق شىعارمالارى كەش باعدارلاماسىنا كىردى. كورەرمەندەر كۇي تارتىسقا كۋا بولدى.
الەكساندر ابىلاەۆ جەتەكشىلىك ەتەتىن «استانا» ەسترادالىق-سيمفونيالىق وركەسترى (ديريجەرلەرى الەكساندر بەلياكوۆ پەن ءالىبي ءابدىنۇروۆ) توپتى سۇيەمەلدەپ وتىردى.
كەشكە جەتىگەن, سىبىزعى, سازسىرناي, قامىس سىرناي, قاۋىرسىن سىرناي, شاڭقوبىز سىندى قازاق ۇلتتىق اسپاپتارىن مەڭگەرگەن كومەيمەن ءان ايتۋدىڭ شەبەرى, كومپوزيتور, فولكلورتانۋشى ەدىل قۇسايىنوۆ قاتىستى. «ءبىر بالا» حالىق ءانىن (وڭدەگەن تالعات سارىباەۆ) بەلگىلى ءانشى ارداق بالاجانوۆا ايتىپ بەردى. كۇيشى-كومپوزيتور سەكەن تۇرىسبەكتىڭ «كوڭىل تولقىنى» كۇيىن قارا دومبىرادا دا, ەسترادالىق وڭدەۋدە دە, وركەستردىڭ ورىنداۋىندا دا ەستىپ ءجۇرمىز. بۇل جولى اتالعان كۇي (وڭدەگەن يليا باشكاتوۆ) جاڭاشا سيپاتتا ءورىلدى. ونى كونتسەرتكە قاتىسقان اۆتوردىڭ ءوزى باستاپ بەردى.
«The Magic of Nomads» توبى «بۇلبۇل زامان» اتاۋىن العان ءوزىنىڭ العاشقى كۇيتاباعىن 2008 جىلى لوندونداعى الەمگە ايگىلى Abbey Road ستۋدياسىنان شىعاردى. بۇل ستۋديادان كەزىندە «بيتلز», «پينك فلويد» سىندى تانىمال توپتار البومىن شىعارعانىن ايتا كەتەيىك. ال توپ مۇشەلەرىنىڭ ايتۋىنشا, «The Magic of Nomads» بۇل ستۋديامەن جۇمىس ىستەگەن قازاقستانداعى جالعىز توپ. كوپتەگەن رەسپۋبليكالىق جانە حالىقارالىق فەستيۆالدەرگە قاتىسقان توپتىڭ ەلورداداعى كونتسەرتى استانا قالاسى مادەنيەت, مۇراعاتتار جانە قۇجاتتاما باسقارماسىنىڭ قولداۋىمەن ۇيىمداستىرىلدى.
امانعالي قالجانوۆ
