جاپونيادا اباي اتامىزدىڭ ايتۋلى مەرەيتويى اياسىندا اقىننىڭ جاپون تىلىنە اۋدارىلعان العاشقى شىعارمالار جيناعىنىڭ تانىستىرىلىمى بولدى.
قر سىرتقى ىستەر مينيسترلىگىنىڭ مالىمەتىنشە, اتالعان شارانىڭ باس قوناعى جاپونيا پارلامەنتىنىڭ جوعارعى پالاتاسىنىڭ سپيكەرى اكيكو سانتو بولىپ, ول كىسى ۇلى ويشىلدىڭ فيلوسوفياسى ادامزاتتىڭ قازىرگى كەزەڭدەگى بارلىق قيىنشىلىقتاردى, سونىڭ ىشىندە كوروناۆيرۋس پاندەمياسىن ەڭسەرۋ ءۇشىن دانالىق پەن باتىلدىققا ۇيرەتەتىندىگىن ايتقان.
قازاقستاننىڭ جاپونياداعى ەلشىسى ەرلان باۋداربەك-قوجاتاەۆ ابايدىڭ 175 جىلدىق مەرەيتويى اياسىندا بۇكىل الەم بويىنشا وتكىزىلىپ جاتقان ءىس-شارالار ەلىمىزدىڭ مادەني ديپلوماتياسىنىڭ دامۋىنا ەرەكشە ۇلەس قوسقانىن جەتكىزدى. جاپونيا مادەنيەت جونىندەگى اگەنتتىگىنىڭ توراعاسى ريوحەي مياتا ءوز سوزىندە اباي پوەزياسى مەن «مانەشيۋ» جاپون ولەڭدەرىنىڭ كونە جيناعىنىڭ جالپى مازمۇنى ۇقساس بولعانىنا ءتانتى بولىپ, ەكى ەل ەجەلدەن جىبەك جولى ارقىلى بايلانىسقانىن بايانداپتى.
كىتاپتىڭ تانىستىرىلىمىن كۇن شىعىس ەلىندە زاماناۋي جاپون پوەزياسىنىڭ «قوزعاۋشى كۇشى» دەپ اتالىپ جۇرگەن اقىن جانە سىنشى كيۆاو نومۋرا جاسادى. كورەرمەندەر ءانشى رانكانىڭ ابايدىڭ «كوزىمنىڭ قاراسى» ءانىن جاپون تىلىندە ورىنداۋىنا ءتانتى بولدى.
ايتا كەتەيىك, اتالعان كىتاپتى قر مادەنيەت جانە سپورت مينيسترلىگىنىڭ تاپسىرىسىمەن قازاقستاننىڭ جاپونياداعى ەلشىلىگىنىڭ قولداۋىمەن «ۇلتتىق اۋدارما بيۋروسى» قوعامدىق قورى جۇزەگە اسىردى. ماتىندەردىڭ ادەبي اۋدارماسىن توكيو شەت تىلدەر ۋنيۆەرسيتەتىنىڭ پروفەسسورى حيروكي ساكاي, قازاق ادەبيەتىن زەرتتەۋشى ميكيا نيشيمۋرا, جاپون-قازاق سوزدىگىنىڭ اۋدارماشىسى جانە قۇراستىرۋشىسى شيگەنوبۋ ماسۋدجيما جاساعان.
