مەملەكەت تاراپىنان كوزدىڭ قاراشىعىنداي قورعاۋعا الىنعان كيىكتى قازاق دالاسىنىڭ يەسى دەپ تە اتايدى. كەزىندە باتىس ەۋروپاعا دەيىن تىرشىلىك ەتكەن جانۋار بۇگىندە موڭعوليا, قالماق دالاسى مەن قازاقستاندا عانا ساقتالعان. ايتا كەتەرلىگى, ولاردىڭ 90 پايىزى قازاق دالاسىن مەكەندەيدى.
«Mega Silk Way» ويىن-ساۋىق ورتالىعىندا وتكەن «ۇلى دالا كيەسى» اتتى فوتوكورمەنىڭ باستى ماقساتى دا سول, قازاققا ەتەنە جاقىن كيىكتەردى بارىنشا ساقتاۋ جانە قورشاعان ورتانى قورعاۋ پروبلەمالارىنا قوعامنىڭ نازارىن اۋدارتۋ. كاسپي قۇبىر كونسورتسيۋمى جانە «National Geographic Qazaqstan» جۋرنالى ۇيىمداستىرعان شاراعا قوعام قايراتكەرلەرى, حالىق قالاۋلىلارى, ەلوردا تۇرعىندارى مەن قوناقتارى قاتىستى. جينالعان كوپشىلىك كيىكتەر تۋرالى بەينەروليك كورىپ, ءساتتى تۇسىرىلگەن فوتوسۋرەتتەر جيىنتىعىن تاماشالادى.
رەسمي دەرەكتەرگە ءسۇيەنسەك, وتكەن عاسىردىڭ 50-60-جىلدارى ميلليوننان اسقان كيىكتەر مۇيىزىنە بولا ادامداردىڭ قولىنان قىرىلىپ, جىل وتكەن سايىن جوعالىپ بارادى. بۇگىندە ولاردىڭ سانى – 215000. ەلىمىزدە وسى ءبىر جانۋارلاردى قورعاۋ جانە ساقتاپ قالۋ ىسىندە كاسپي قۇبىر كونسورتسيۋمىنىڭ قوسقان ۇلەسى زور. فوتوكورمەنىڭ اشىلۋ سالتاناتىندا «كاسپي قۇبىر كونسورتسيۋمى» اق باس ديرەكتورىنىڭ ورىنباسارى قايىرگەلدى قابىلدين كومپانيا بوكەندەردى عارىشتان باقىلاۋعا مۇمكىندىك بەرەتىن 30 دانا قارعىباۋ ساتىپ الۋعا 2016 جىلى 21 ميلليون تەڭگە, ال وتكەن جىلى تەك زەرتتەۋ جۇمىستارىنا 27 ملن تەڭگە بولىنگەنىن العا تارتتى. «بۇگىنگى كورمەنىڭ «ۇلى دالانىڭ كيەسى» دەپ اتالۋى تەگىن ەمەس. ءبىز الداعى ۋاقىتتا دا وسى باعدارلامانى قولدايتىن بولامىز» دەيدى ول.
ەشقاشان جەتىم قالعان لاقتارىن دالاعا تاستامايتىن, جولشىباي ماڭىراپ شىققان قۇرالايدى كەزدەستىرە قالسا, ەمىزىپ, وزىمەن ەرتىپ كەتەتىن جانۋاردىڭ ەرەكشەلىگى تۋرالى پارلامەنت سەناتىنىڭ دەپۋتاتى بىرعانىم ءايتىموۆا دا اتاپ ءوتتى.
– ءبىز ءۇشىن بۇگىنگى كورمەنىڭ تاقىرىبى وزەكتى. وزدەرىن قورعاۋ تۋرالى ايتايىن دەسە بوكەندەردىڭ ءتىلى جوق. ولاردىڭ جاناشىرى – تەك ادامدار. كەيدە ىسساپارمەن باراتىن جەرىمىزگە تىكۇشاقپەن ۇشامىز. سول كەزدە كەڭ دالادا جايىلىپ جۇرگەن بوكەندەردى كورىپ ەرەكشە اسەرلەنەمىن. سونداي تاماشا كورىنىس! ەندەشە وسى ءبىر جانۋاردى قورعاۋ, ساقتاۋ ءبارىمىزدىڭ مىندەتىمىز بولماق, – دەيدى بىرعانىم ءايتىموۆا.
