قر ۇلتتىق مۋزەيىندە ۇلى جەڭىستىڭ 72 جىلدىعىنا ارنالعان اسكەري-تاريحي مينيدياراما كورسەتىلىپ, «ۇلى وتان سوعىسىنداعى قازاقستاندىقتار» جانە «ۇلى وتان سوعىسىنىڭ باتىرلارى – ح. دوسپانوۆا, م. مامەتوۆا, ت. بيگەلدينوۆ», «ءا.نۇرشايىقوۆتىڭ تۋعانىنا 95 جىل» اتتى قوس كورمە اشىلدى.
اسكەري-تاريحي مينياتيۋرالار تۇرىندە بەرىلگەن شاعىن ديارامالاردى اتالمىش مۋزەيدىڭ «قازاقستان تاريحى» ءبولىمىنىڭ قىزمەتكەرى سەرىك ءابدىراحمانوۆ جاسادى. «ۇلى جەڭىسىمىزدى ۇمىتپايتىنىمىز سەكىلدى, سوعىس سالعان قاسىرەت تە, سول سوعىسقا قاتىسقان جاۋىنگەرلەر دە ەشقاشان ۇمىتىلماق ەمەس. ولاردىڭ ەرلىگى بۇگىنگى اسكەر ساپىنداعى جاۋىنگەرلەردى جىگەرلەندىرەتىنى ءسوزسىز. ۋاقىت وزگەرىپ, زاماندار الماسادى. الايدا جەڭىس كۇنى الداعى تالاي ۇرپاقتىڭ مەرەكەسى بولىپ قالا بەرەتىنىنە سەنىمدىمىن. ال مۋزەيدەگى بۇگىنگى شارانى ەلىمىزدە الدا تويلاناتىن ۇلكەن مەرەكەنىڭ باسى دەپ بىلەم» دەدى ۇلتتىق مۋزەي ديرەكتورىنىڭ ورىنباسارى لەونيد كوچەتوۆ.
شارا قوناقتارى قر ۇلتتىق مۋزەي قورىنان الىنعان ۇلى وتان سوعىسى تاقىرىبىنداعى جادىگەرلەرمەن, جەكە زاتتارمەن, فوتوقۇجاتتارمەن, قازاقستاندىق باتىرلارعا ارنالعان كىتاپتارمەن تانىستى. سولاردىڭ ءبىرى – «ارداگەرلەر ۇيىمى» رەسپۋبليكالىق قوعامدىق بىرلەستىگى توراعاسىنىڭ ءبىرىنشى ورىنباسارى ومىرزاق وزعانباەۆ بولدى. «ۇلدى اكەسىنەن, قىزدى شەشەسىنەن, ءىنىنى اعادان, جاردى جۇبايىنان ايىرعان بۇل سوعىستىڭ قاسىرەتى تىم اۋىر. ەل باسىنا كۇن تۋعاندا ازاماتتارىمىزبەن قوسا قازاق قىزدارى دا قولىنا قارۋ الدى. وسىلاي ءبىزدىڭ قايسار قىزدارىمىز جاقسى جار, ارداقتى انا عانا ەمەس, ەل قورعاۋشى باتىر بولا الاتىنىن دا دالەلدەگەن ەدى. بۇگىنگى كورمە ءبىز ارداق تۇتاتىن وسى باتىرلارىمىزدىڭ ومىرىنەن حابار بەرەدى. ول قاسىرەتتى تولىقتاي سەزىندىرمەسە دە, بۇگىنگى جاستاردىڭ رۋحىن وياتۋعا ارنالعان يگى شارا» دەدى ول.
ەكىنشى دۇنيەجۇزىلىك سوعىس جىلدارىندا قازاقستاندىق باتىرلاردىڭ ەرلىگى تۋرالى ءباسپاسوز بەتتەرىندە ءجيى جازىلاتىن. بۇل تاقىرىپتى فيلولوگيا عىلىمدارىنىڭ دوكتورى سەرىك تاحان قوزعادى. ونىڭ ايتۋىنشا, بەلگىلى ورىس جازۋشىسى بوريس پولەۆوي سوعىس جىلدارىندا «پراۆدا» گازەتىنىڭ ءتىلشىسى بولعان. سول كەزدە اتالمىش گازەتكە 1943 جىلى كەڭەس وداعىنىڭ باتىرى مالىك عابدۋللين تۋرالى ماقالا جازعان. سونداي-اق, نۇركەن ءابدىروۆ, مانشۇك مامەتوۆا, حيۋاز دوسپانوۆا سىندى كوپتەگەن قازاق مايدانگەرلەرى جونىندە وچەركتەر دە ەرلىكتەرى سۋىماي جاتىپ جارىق كورگەن. عالىم سولاردىڭ ءبىرازى كورمەدەن كورىنىس تاپقانىنا مارقايدى. اتالمىش شارانى قر ۇلتتىق مۋزەيىنىڭ «قازاقستان تاريحى» ءبولىمىنىڭ عىلىمي كىتاپحانا جانە ەكپوزيتسيالىق كورمە قىزمەتى ۇيىمداستىرعانىن ايتا كەتەيىك.
