كەشە استاناداعى ۇلتتىق اكادەميالىق كىتاپحانادا «ULYS» دەپ اتالاتىن قازاقستانداعى العاشقى تسيفرلىق جۋرنالدىڭ تۇساۋى كەسىلدى. ساراپتامالىق, تانىمدىق باعىتتاعى باسىلىم ورتالىق ازيا مەن تۋىسقان تۇركى دۇنيەسىنە ورتاق باسىلىمعا اينالماق. وندا شىعاتىن ماقالالار دا سايكەس تىلدە باسىلادى. ۇلت ۇستازى احمەت بايتۇرسىنۇلىنىڭ تۋعان كۇنىنە ورايلاستىرىلىپ, وقىرمانعا جول تارتقان جۋرنالدىڭ قۇرىلتايشىسى ءارى باس رەداكتورى – جۋرناليست ەرجان قالىمبايۇلى.
قازىرگى اقپارات تاسقىنى زامانىندا كوشتەن قالماي, العا جىلجۋىمىز كەرەك. شەتەلدەردە تسيفرلىق جۋرنالدى شىعارۋ وسىدان ون شاقتى جىل بۇرىن قولعا الىندى. وقىرمانداردىڭ سۇرانىسى بۇگىندەرى وسىنداي بوپ تۇر. كوبىمىز قازىر قولدا بار قۇرالدار ارقىلى اقپارات الاتىنىمىز دا شىندىق. باسىلىمدى تانىستىرعان باس رەداكتوردىڭ ايتۋىنشا, ولار احمەت بايتۇرسىنۇلىنىڭ «ەل بۇگىنشىل, مەنىكى ەرتەڭگى ءۇشىن» دەگەن ءسوزىن ۇران ەتىپ, ساپالى جانە قولجەتىمدى ساراپتامالاردى ۇسىنباق.
«الەۋمەتتىك جەلىدە كوبىنەسە جەڭىل-جەلپى اقپاراتتار شىعىپ جاتادى. بىراق ارقاشاندا ينتەللەكتۋالدى ماتەريالدار سۇرانىسقا يە. ولاردىڭ وقىرماندارى كوپ ەمەس. ارينە, جاڭا جۋرنال وقىرماندارىنىڭ كوپ بولۋىن تىلەيمىز. ەڭ باستىسى, بۇل ويعا جەتەلەيتىن, ەل قىزىعىپ وقيتىن, تەك جاڭالىقتاردى تاراتپايتىن باسىلىم بولىپ, جان-جاقتى ءتاجىريبەسى بار, ءوز ءىسىنىڭ ناعىز ماماندارى اۆتور رەتىندە تارتىلسا دەيمىز» دەدى ساياساتتانۋشى بەرىك ابدىعاليۇلى.
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ «جۋرناليستيكا جانە ساياساتتانۋ» فاكۋلتەتىنىڭ دەكانى قايرات ساق تسيفرلىق جۋرنالدى شىعارۋدى بۇگىنگى زاماننىڭ اقپاراتتىق تەحنولوگياسىنىڭ ۇلتتىق مۇددەگە قىزمەت ەتۋىنە بالايتىنىن جەتكىزدى. «قازىرگى اقپارات زامانىندا اقپاراتتىق تاۋەلسىزدىك, اقپاراتتىق قاۋىپسىزدىك – وتە وزەكتى ماسەلە. ءبىز اقپاراتتىق قاۋىپسىزدىكتەن ۇتىلىپ جاتىرمىز. اقپاراتتىق باسەكەدە الەممەن تەڭەسۋ ءۇشىن جاڭا زامانعا ساي جۋرنال شىعارىپ, وسىنداي قادامدار جاساۋىمىز كەرەك. باستىسى ەلگە, ۇلتقا قىزمەت جاساۋىمىز ءتيىس» دەدى ول.
