پەيلى مە ەڭ قازاقتىڭ تازارتىلعان,
دالاسى ما ەڭ شەكسىز عىپ جاراتىلعان؟
شالقىپ اققان ەدىلدەي ءبىلىم-تەڭىز,
ۇلىتاۋداي ەرەكشە دارا تۇلعاڭ!
اداستىرماس ءبىر داڭعىل سالدىڭىز دا,
جاتىر مىنە جول بولىپ الدىمىزدا.
قازاق ەلى ريزا, اللا بەرگەن,
ايساۋلە مەن ماڭعىستاۋ جالعىزىنا.
تاعدىر ءبىزدى جۇرگەندە تارىقتىرىپ,
جىبەرىپ ەد وزىڭمەنەن قارىق قىلىپ.
ۋا, ابەكە! اينالدىڭ اۋليەگە,
دانىشپاندىق قۇرساعىن جارىپ شىعىپ.
ءومىر ءسۇردىڭ ۇلگىلى, ماعىنالى,
تۋعان ولكەڭ سارعايا ساعىنادى.
ۇلگى بولدىڭ ۇرپاققا, زامانىڭا,
مارجان ويدان ەل القا تاعىنادى.
ۇمتىلدىردىڭ قامشىلاپ شابانداردى,
قاقپايلادىڭ قاقالماس قابانداردى.
شەشەن ءسوزدى, كەمەڭگەر تۇلعالىسىڭ,
ىڭعايىڭا كوندىردىڭ زاماندى دا.
بۇل ماڭعىستاۋ تۋعىزدى ەلدىڭ ءپىرىن
ءوزىڭ بولساڭ تانىتتىڭ ەردىڭ ءدۇرىن.
ءار ءسوزىڭدى حاديستەي ارداقتايدى,
ءىس-قيمىلدان كورمەدىك جالعان ءبىرىن.
سەن ەرەكشە سىر ساندىق قازىنالى,
جۇرەككە بال ءار ءسوزىڭ تامىزادى.
ەل قامى دەپ وتكىزگەن ءار تۇنىڭە,
جەتپىس كۇننىڭ ساۋابى جازىلادى.
ابەكە دەپ ۇل-قىزىڭ ۇرانداتىپ,
تاڭداي قاعىپ بۇلبۇل دا تۇر اندەتىپ!
جىرلاي بەرگىم كەلەدى ءبىر ءوزىڭدى,
جۇرەگىمدە بارادى ءبىر ءان كەتىپ!
دوس-دۇشپاندى, ابەكە, باعىندىردىڭ,
شۋاعىنا شومىلدىڭ ساعىم-نۇردىڭ!
ءابىش اعا ۇلى دەپ ۇرپاق ءوستى,
سەن تىرىلەي سەزىندىڭ باعىن ءپىردىڭ!
كەلمەيدى عوي قوشتاسقىم وزىڭمەنەن,
بارا جاتىر جان قيناپ سەزىم دەگەن.
كەتسەم بە ەكەن جان دوسىم سەنى ىزدەپ,
بولە الارلىق يماندى سەزىممەنەن.
سويلەمەۋشى ەڭ شىعىنداپ ءسوزدى بەكەر…
بۇ تىرلىكتەن ەرتە-كەش ءبارى دە وتەر…
سەكسەن دەگەن نەمەنە, ۇلىلارعا,
ەندى ساعان مىڭ جىلدار ازدىق ەتەر…
سايىن نازاربەكۇلى
قازان, 2019 ج.
