بىرەر كۇن بۇرىن استانا قالاسى جۇمىسپەن قامتۋ, ەڭبەك جانە الەۋمەتتىك قورعاۋ باسقارماسىنىڭ باسشىسى ەرمەك وسپانوۆ اكىمدىكتە كوپبالالى انالارمەن كەزدەسۋ وتكىزىپ, ولاردىڭ تالاپ-ارىزدارىن تىڭدادى.
بۇعان قوسا, جيىن بارىسىندا مەملەكەت باسشىسىنىڭ تاپسىرماسى بويىنشا ۇكىمەت جانىنان قۇرىلعان ازاماتتاردىڭ ءومىر ءسۇرۋ ساپاسىن ارتتىرۋمەن, سونداي-اق كوپبالالى وتباسىلاردى قولداۋ شارالارىن پىسىقتاۋمەن اينالىساتىن ارنايى جۇمىس توبىنىڭ وتىرىسى تىكەلەي ەفيردە كورسەتىلدى.
– پرەمەر-ءمينيستردىڭ ورىنباسارى ەربولات دوساەۆتىڭ جەتەكشىلىگىمەن وتكەن جۇمىس توبىنىڭ وتىرىسىن تىكەلەي ەفيردە كورىپ شىقتىم. جاۋاپتى ورگاندارعا ءتيىستى تاپسىرمالار بەرىلدى. ناتيجەسى بۇگىن-ەرتەڭ بولا سالادى دەمەيمىن. بىراق كوپ ۇزاماي ءبارى شەشىلەدى دەگەن ۇمىتتەمىن. ال وتىرىس بارىسىندا از قامتىلعان وتباسى ەكەنىن راستايتىن قۇجاتتاردى قازىرگىدەي ءۇش اي سايىن جيناماي, جىلىنا ءبىر رەت جيناۋ تۋرالى ۇسىنىس ايتىلدى. بۇل بىزگە ىڭعايلى بولار ەدى. وسى ۇسىنىس قولداۋ تابادى دەگەن ويدامىن, – دەپ باستادى ءسوزىن ءتورت بالانىڭ اناسى اسەمگۇل احمەتوۆا.
ول ءسوز اراسىندا ەلىمىزدەگى ءبىراز انا ەل بيلىگىنىڭ كوپبالالى وتباسىلارعا جاسالىپ وتىرعان جاعدايدان بەيحابار ەكەنىن جەتكىزدى.
– ماسەلەن, مەن قانداي دا ءبىر جەڭىلدىك تۋرالى ەستىسەم, قالالىق اكىمدىكتىڭ كومەگىنە جۇگىنەمىن. ال قالا باسشىلىعى ءوتىنىشىمدى اياقاستى ەتكەن ەمەس. ءتورت بالامنىڭ ەكەۋى – مۇگەدەك. بىراق الەۋمەتتىك كومەك ارقىلى ولاردىڭ جاعدايى قازىر جاقسارىپ قالدى. سوندىقتان كوپبالالى انالارعا ۇيدە وتىرا بەرمەي, ىلگەرى ۇمتىلىپ, كوبىرەك اقپارات الۋعا, سونداي-اق قانداي دا ءبىر كومەك كورسەتىلىپ جاتسا, شەت قالماۋعا شاقىرامىن. ەندى ءبىر ايتارىم, ءبىراز انانىڭ مەكتەپتەن بەرىلەتىن الەۋمەتتىك كومەكتى الۋعا ۇيالاتىنىن كوردىم. ول دا دۇرىس ەمەس, – دەدى ول.
بۇعان قوسا, مەكتەپتەگى الەۋمەتتىك پەداگوگ كابينەتىندە قوسىمشا كورسەتىلەتىن كومەك تۋرالى مالىمەتتەردى بىلۋگە بولاتىنىن ايتتى. سونداي-اق, ول الەۋمەتتىك قىزمەتكەر كابينەتى بارىن ايتىپ, وندا پسيحولوگيالىق كومەك كورسەتىلەتىنىن جەتكىزدى.
– قوعامدىق كولىكتە تەگىن جۇرۋدەن بولەك, قارجىلاي كومەك كورسەتىلەدى. سول سياقتى تۇڭعىشىمنىڭ دەنساۋلىعى جاقسى, ال مەكتەبى ونى كۇزدە دە, قىستا دا باستان-اياق كيىندىرىپ, تەگىن تاماعىن بەرەدى. ۇيىمىزگە ازىق-تۇلىك, شارۋاشىلىققا قاجەت زاتتاردى (سابىن, ءتىس پاستاسى, ت.ب.), ودان بولەك جىلىنا ءۇش مارتە داپتەر-كىتابىن جەتكىزەدى. مەرەكە كۇندەرى وتەتىن كەشتەرگە تەگىن بيلەت تە بەرەدى. ال ەكى كىشكەنتايىمنىڭ جەكەمەنشىك بالاباقشاعا بارۋى ءۇشىن جاردەماقى ءبولىپ بەردى. مۇنىڭ ءبارى ءۇشىن اقشا تولەگەن ەمەسپىز. اكىمدىك ماعان بارىنشا قولداۋ كورسەتىپ وتىرعانىن ەرەكشە ايتقىم كەلەدى. مۇنداي كومەك بولماسا, مۇگەدەك بالالارىمدى اياعىنان تۇرعىزۋىم ەكىتالاي بولار ەدى, – دەيدى اسەمگۇل احمەتوۆا.
مۇنداي كومەك الۋ ءۇشىن جينايتىن قۇجاتتار ايتارلىقتاي كوپ ەمەس. نەگىزىنەن, ءوزى تۋرالى جانە تابىسىن راستايتىن قۇجات – ەڭ باستى تالاپ.
كۇنسۇلۋ يسكاكوۆا ءسوز اراسىندا 12 اقپان كۇنى قالا اكىمىنىڭ ورىنباسارلارىمەن كەزدەسۋ وتكەنىن ءمالىم ەتتى. «ال بۇگىن ۇكىمەتتە ەربولات دوساەۆتىڭ باسشىلىعىمەن, بىرنەشە مينيسترلىكتىڭ قاتىسۋىمەن وتكەن وتىرىستى كورىپ شىقتىق. كوپبالالى انالار كوتەرگەن ماسەلەلەر تالقىلانىپ جاتىر. بۇل پروبلەمالار شالا ورىندالماس ءۇشىن ازداپ ۋاقىت قاجەت. سوندىقتان سابىر ساقتاعانىمىز ءجون» دەدى ول.
سونىمەن قاتار ول جۇرت اراسىندا تاراعان قۇرىلتاي تۋرالى دۇربەلەڭنىڭ سوڭى جاقسىلىققا اپارمايتىنىن ايتا كەلە, بيلىك پەن حالىق اراسىندا اشىق بايلانىستىڭ بارىن, اۋدان اكىمدەرى وتكىزەتىن «اشىق ەسىك» اپتالىعى كۇندەرى تۇيتكىلدى ماسەلەلەرىن جەتكىزۋدى تىلگە تيەك ەتتى. سونىمەن قاتار, ول كوپبالالى انالاردىڭ جايىن تەرىس باعىتتا كوتەرىپ جۇرگەن الاياقتاردىڭ پايدا بولعانىن, سولاردىڭ ارباۋىنا ءتۇسىپ قالماۋدى ەرەكشە اتاپ ءوتتى.
