وسىدان بىرنەشە اي بۇرىن, پسيحولوگتاردىڭ بالانىڭ قالىپتاسۋىنا كەرى اسەرى بار مۋلتفيلمدەردىڭ ءتىزىمىن جاساعانىن جازعان ەدىك. ولاردىڭ پىكىرىنشە, رەسەيلىك ارنالاردى جاۋلاپ العان «ماشا مەن مايماق» مۋلتسەريالى بالالار ءۇشىن ەڭ قاۋىپتى بولىپ سانالادى.
ەكىنشى ورىندا – امەريكانىڭ «مونستر حاي», ءۇشىنشى ورىندا «گۋبكا بوب» مۋلتسەريالى. اتا-انالار قاۋىمىنا بالا تاربيەسىندەگى مۋلتفيلم كەيىپكەرلەرىنىڭ اسەرى تۋرالى پسيحولوگتىڭ كەڭەسىن جاريالاعان بولاتىنبىز.
اراعا كوپ ۋاقىت وتكەن جوق, «ماشا مەن مايماق» تاعى دا الدىمىزدان شىعىپ, وسى ماقالانى جازۋعا ءماجبۇر بولدىق. ەلورداعا جاز جاقىنداعان سايىن قالالىق باقتار ەسىگىن اشىپ, دەمالۋشىلار قاتارى كوبەيەدى. نەمەرەسىن جەتەكتەگەن اتا-اجەلەر, ءبىر بالاسىن بەسىك اربادا الديلەپ, ەكىنشىسىن جەتەكتەگەن جاس اتا-انالار – شاھارىمىزدىڭ ادەمى كورىنىستەرىنىڭ ءبىرى.
وسىندايدا ەرەسەكتەر ءار بالانىڭ بىرىنە بالمۇزداق, ەكىنشىسىنىڭ قولىنا ءتۇرلى-ءتۇستى شار ۇستاتىپ قويادى. كىسى جۇرگەن جەرلەردىڭ بارىندە ساتىلاتىن شارلار دا اسا قىمبات ەمەس, كولەمىنە قاراي 200-500 تەڭگە ارالىعىندا. بۇل بالانىڭ ءبىر كۇندىك كوڭىل-كۇيىن كوتەرىپ قانا قويمايدى, دەمالىستان ەستەلىك رەتىندە ءۇيىنىڭ تورىندە بىرازعا دەيىن ءىلۋلى تۇرادى.
ءبىزدىڭ ايتپاعىمىز, جاس ءسابيدىڭ تانىمى مەن تالعامىنا اسەر ەتەتىن شاردىڭ بەزەندىرىلۋى, شارعا باسىلعان سۋرەت جايىندا بولماق. ويتكەنى شارلاردىڭ بارلىعىنا, مامانداردىڭ ءوزى ءبىراۋىزدان بالانىڭ پسيحيكاسىنا كەرى اسەرى بار دەپ تاپقان – «ماشا مەن مايماق», «گۋبكا بوب», تاعى ءبىر امەريكالىق مۋلتفيلم كەيىپكەرى «ميككي ماۋستىڭ» سۋرەتتەرى باسىلعان.
ۇساق-تۇيەك دەسەك تە, دۇنيە ەسىگىن ەندى اشىپ, ءتاي-ءتاي باسا باستاعاننان ۇستاتاتىنىڭىز – وزگەنىڭ جادىگەرى. وزگە مادەنيەتكە تاۋەلدىلىكتىڭ باستاۋى وسىلاي تامىر جايعانىنا ءمان بەرمەيمىز. سۇراساڭ, «ەگەر بار بولسا ساتار ەدىك» دەگەن ساتۋشىلار تومەن قارايدى. ولار دا جۇرگىزىپ وتىرعان بيزنەسىنىڭ بالانىڭ دۇنيەتانىمىڭ قالىپتاسۋىندا زيانى بارىن تۇسىنەدى. بىراق… بالا جاسىنان ۇلتتىق مادەنيەتتىڭ نىشانىنا كوزى ۇيرەنىپ, «جالتىراۋىققا» اۋەستىگى بولسا, كىمگە وكپەلەيمىز؟!
مۇنداي شارلار الماتىدان تاسىمالدانادى ەكەن. وندا شار شىعاراتىن زاۋىت اشىلدى دەپ ەستىمەدىك. دەمەك, شار تيەلگەن كەرۋەن وزگە جەرلەردەن كەلىپ جاتىر. الايدا قاي ەلدە, قاي جەردە شىعارىلسا دا, ەكى ورتادا جۇرگەن دەلدالدار ۇلتتىق مۇقتاجىمىزدى ەسكەرۋى كەرەك ەدى. ياعني, شار شىعاراتىن مەكەمەنىڭ ساۋداسىن دوڭگەلەتىپ جۇرگەن ءىرى بيزنەس يەلەرى الىپ كەلگەن تاۋارىنىڭ مازمۇنىنا دا ءمان بەرسە, «مايماق» ورمانىنا, «قارا تىشقان» مۇحيت اسىپ, «گۋبكا» تەڭىز تۇبىنە تۇسەر مە ەدى؟!
ايگۇل ۋايسوۆا
