1 قاراشادان باستاپ ەلىمىزدەگى ءۇش اۆتوكولىك جولى: استانا–تەمىرتاۋ, الماتى–قاپشاعاي, الماتى–قورعاس جولى اقىلى بولادى. بۇل جاڭالىقتى كەشە ماجىلىستەگى ۇكىمەت ساعاتىندا ينۆەستيتسيالار جانە دامۋ ءمينيسترى جەڭىس قاسىمبەك جاريا ەتتى.
مينيستر ءۇش ۋچاسكەنىڭ ەكسپەريمەنت رەتىندە اقىلى تارتىپكە كوشىرىلگەنىن ايتتى. «اتالعان ءۇش ۋچاسكە 1 قاراشادان باستاپ اقىلى بولادى. الداعى ۋاقىتتا رەسپۋبليكالىق ماڭىزى بار 11 مىڭ شاقىرىمعا جۋىق تاسجولدار دا وسى تارتىپكە اۋىسادى. سونىڭ ەسەبىنەن 23 مىڭ شاقىرىمعا سوزىلاتىن رەسپۋبليكالىق جولداردى كۇتىپ ۇستايمىز. ياعني بيۋدجەتتەن وعان ەشقانداي اقشا بولىنبەيدى» دەپ ءتۇسىندىردى ج.قاسىمبەك.
ايتپاقشى, تاسجولدارعا جاقىن ورنالاسقان ەلدى مەكەندەردىڭ تۇرعىندارى اقىلى جولمەن جۇرگەنى ءۇشىن جىلىنا 1000 تەڭگە تولەيدى. بيىل استانا–پاۆلودار باعىتىنداعى ۇلكەن تاسجول دا پايدالانۋعا بەرىلەدى. وسى جولدىڭ 100 شاقىرىمى ەكى جولاقتى بولادى. ونىڭ قۇرىلىسى 2019 جىلى اياقتالادى, ال اقىلى ءتارتىپ 2020 جىلى ەنگىزىلەدى. دەپۋتاتتاردىڭ الدىندا جەڭىس قاسىمبەك دوللار باعامىنىڭ سەكىرۋى جولداردىڭ قۇرىلىسىنا ايتارلىقتاي اسەر ەتپەيتىنىن جەتكىزدى. «ويتكەنى ءبىز قازىر قۇرىلىسقا پايدالاناتىن ماتەريالداردىڭ 95 پايىزى وزىمىزدە شىعارىلادى. وسىدان 2-3 جىل بۇرىن تەڭگە باعامىنىڭ وزگەرۋى قۇرىلىس پەن جوندەۋ جۇمىستارىنا ايتارلىقتاي اسەر ەتكەن جوق. بۇل جولى دا سولاي بولادى» دەدى مينيستر.
