ەلورداداعى ۇلتتىق اكادەميالىق كىتاپحانادا اسا كورنەكتى مەملەكەت جانە قوعام قايراتكەرى تەمىربەك جۇرگەنوۆكە ارنالعان «ۇلت رۋحىن قايتا تۇلەتكەن قايراتكەر» اتتى ەسكە الۋ كەشى ءوتتى.
تەمىربەك جۇرگەنوۆ وتكەن عاسىردىڭ وتىزىنشى جىلدارى قازاقستان ۇكىمەتىنىڭ حالىق اعارتۋ كوميسسارى قىزمەتىنە تاعايىندالىپ, اينالاسى ءۇش-ءتورت جىلدىڭ ىشىندە ەلىمىزدەگى مادەنيەت, ادەبيەت, ونەر سالالارىنىڭ بيىككە كوتەرىلۋىنە ولشەۋسىز ۇلەس قوستى. اباي اتىنداعى قازاق مەملەكەتتىك اكدەميالىق وپەرا جانە بالەت تەاترى, ءال-فارابي اتىنداعى قازاق ۇلتتىق ۋنيۆەرسيتەتى, ق.ساتباەۆ اتىنداعى قازاق ۇلتتىق تەحنيكالىق ۋنيۆەرسيتەتى, اباي اتىنداعى قازاق مەملەكەتتىك پەداگوگيكالىق ۋنيۆەرسيتەتى, قازاق ۇلتتىق اگرارلىق ۋنيۆەرسيتەت سىندى قازىرگى بەلدى, بەلگىلى جوعارى وقۋ ورىندارى تەمىربەك جۇرگەنوۆتىڭ تىكەلەي ارالاسۋىمەن سول كەزدە بوي كوتەردى. ول قازاقستاندا 400 ورتا مەكتەپ سالدىرسا, الماتىنىڭ وزىندە 18 مەكتەپتىڭ سالىنۋىنا مۇرىندىق بولدى.
1936 جىلى ماسكەۋدە تابىستى وتكەن قازاق ادەبيەتى مەن ونەرىنىڭ ونكۇندىگىنە باسشىلىق ەتتى. تەمىربەك جۇرگەنوۆتىڭ ءبىر عاجاپ قاسيەتى, ول ءۇش مەملەكەتتە حالىق كوميسسارى بولدى. تاجىكستاندا – قارجى كوميسسارى, وزبەكستاندا جانە قازاقستاندا – حالىق اعارتۋ كوميسسارى. ونىڭ ۇستىنە, ەلىمىزدىڭ ۇكىمەتى جانىنداعى مادەني ىستەر جونىندەگى كوميتەتتى باسقاردى. بۇل كوميتەت دەپ اتالعانىمەن, شىن مانىندە قازىرگى مادەنيەت مينيسترلىگى ەدى. سوندا تەمىربەك جۇرگەنوۆ قازاقستاندا ەكى ءمينيستردىڭ فۋنكتسياسىن اتقارعان» دەدى ءماجىلىس دەپۋتاتى ساۋىتبەك ابدراحمانوۆ.
شارادا سەنات دەپۋتاتى مۇرات باقتيارۇلى, تەمىربەك جۇرگەنوۆ اتىنداعى قوعامدىق قور توراعاسى ساپەن اڭسات, عالىم, قوعام قايراتكەرى ابدىجالەل باكىر, بەلگىلى پۋبليتسيست نۇرتورە ءجۇسىپ تەمىربەك جۇرگەنوۆ تۋرالى وي ءوربىتتى.
