كەشە قر ۇلتتىق مۋزەيىندە پرەمەر-ءمينيستردىڭ ورىنباسارى بەردىبەك ساپارباەۆتىڭ قاتىسۋىمەن «ماڭگىلىك ەل» تريپتيحىنىڭ تانىستىرىلىمى ءوتتى. ءبىرتۇتاس كومپوزيتسيانى قۇرايتىن ءۇش سۋرەتتە قازاق حاندىعىنىڭ نەگىزىن سالۋشى كەرەي مەن جانىبەك حاندار, تاۋكە حاننىڭ «جەتى جارعى» زاڭدار جيناعىن قابىلداۋ ءساتى جانە قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆ بەينەلەنگەن.
– بيىل ءبىز قازاق حاندىعىنىڭ 550 جىلدىعىن اتاپ وتەمىز. وسى ايتۋلى داتاعا بايلانىستى جىل سوڭىنا دەيىن ەلىمىزدىڭ تۇكپىر-تۇكپىرىندە 200-دەن استام ءىس-شارا وتەدى. مەرەكە استانادا 11 قىركۇيەكتە تويلانىپ, 9 قازاندا تاراز قالاسىندا جالعاساتىن بولادى», – دەپ اتاپ وتكەن بەردىبەك ساپارباەۆ مەملەكەتتىلىگىمىزدىڭ نەگىزدەرىنە, ەلباسىنىڭ تاۋەلسىز ەلىمىزدىڭ دامۋىنا ءسىڭىرىپ كەلە جاتقان ەڭبەگىنە توقتالدى.
بەلگىلى سۋرەتشى, قر ەڭبەك سىڭىرگەن قايراتكەرى ەربولات تولەپباي باستاعان شىعارماشىلىق ۇجىم قازاق حاندىعىنىڭ قۇرىلۋ جىلدارىنان باستاپ, تاۋكە حاننىڭ تۇسىنداعى ەلدىگىمىزدىڭ كۇشەيگەن كەزەڭىن قامتىعان. كەشەگى كۇندەردى بۇگىنمەن ۇندەستىرىپ, ۇلت كوشباسشىسى نۇرسۇلتان نازارباەۆ بەينەسى ارقىلى بولاشاققا قارىشتى قادام باسقان قازىرگى قازاقستاندى كەسكىندەگەن.
جالپى, تريپتيحتى بەس سۋرەتشى بىرىگىپ سالعان. سولاردىڭ ءبىرى قازاقباي اجىبەكۇلى بۇل جۇمىس وڭايعا تۇسپەگەنىن ايتادى. «ەربولات تولەپبايۇلىنىڭ جەتەكشىلىگىمەن اعىمسالى دۇزەلحانوۆ, ايدار جامحانۇلى جانە ايدوس شاحماردانۇلى بارلىعىمىز وسى سۋرەتتەردى سالۋعا ون بەس جىلدى جۇمسادىق. بۇل ءبىر كۇندە جاسالاتىن دۇنيە ەمەس. الدىمەن تاريحىمىزدى جاساعان تۇلعالارىمىزدى انىقتاپ, سولاردىڭ ەتكەن ەڭبەگىن زەرتتەدىك. جاسىراتىنى جوق, قارجىلىق جاعىنان دا قيىندىقتار بولدى. الايدا, سونشاما جىلعى ەڭبەگىمىز زايا كەتكەن جوق دەپ ويلايمىز. ونىڭ ناتيجەسىن بۇگىن كورىپ وتىرسىزدار. ەلباسىعا دا سۋرەتتەردى كورسەتىپ, ونىڭ وڭ باعاسىن العان ەدىك» دەيدى ول.
P.S. اتالمىش تۋىندى مارقۇم بەكسەيىت تۇلكيەۆتىڭ «ۇلى كوش» كارتيناسىن ەرىكسىز ەسكە سالادى. وندا نۇرسۇلتان نازارباەۆ باستاعان 89 تۇلعامىز بەينەلەنگەن. بىزگە سول سۋرەت اسەرلىرەك كورىنەدى…
امانعالي قالجانوۆ
