نۇر-سۇلتان قالاسى ءماسليحاتى كوميسسياسىنىڭ كەزەكتى وتىرىسىندا 2020-2022 جىلدارعا ارنالعان بيۋدجەتى جوباسى قارالدى. ءماسليحات دەپۋتاتتارى قالانىڭ ءبىلىم, مادەنيەت جانە سپورت, دەنساۋلىق, جۇمىسپەن قامتۋ جانە الەۋمەتتىك قورعاۋ, تىلدەردى دامىتۋ جانە مۇراعات ءىسى باسقارمالارىنا قاراجات ءبولۋدى قاراستىردى.
تۇراقتى كوميسسيانىڭ وتىرىسىندا نۇر-سۇلتان قالاسىنىڭ ستراتەگيالىق جانە بيۋدجەتتىك جوسپارلاۋ باسقارماسى باسشىسى قايسار ماڭقاراەۆ بايانداماسىندا ايتىلعان كورسەتكىشتەرگە سۇيەنسەك, 2020-2022 جىلدارى 2,7 تريلليون تەڭگە ينۆيستيتسيا تارتۋ كوزدەلگەن. سونىڭ ناتيجەسىندە ءتورت ميلليون شارشى مەتر تۇرعىن ءۇيدى, ءبىر ميلليون شارشى مەتر كوممەرتسيالىق الاڭدى پايدالانۋعا بەرۋ جوسپارلانۋدا. «ەكونوميكانىڭ سەرۆيستىك سەكتورلارىندا 60 مىڭعا جۋىق جۇمىس ورنىن قۇرۋ جوسپارلانعان. ورتاشا جالاقى 2018 جىلعى 240 مىڭ تەڭگەدەن 2020 جىلى 250 مىڭ تەڭگەگە دەيىن, ال ي2022 جىلى 280 مىڭ تەڭگەگە ءوسۋى قامتاماسىز ەتىلەدى. وسىلايشا, ەڭبەك قورى 2018 جىلى 1 تريلليون 360 ميلليارد تەڭگەدەن 2020 جىلى 1 تريلليون 512 ميلليارد تەڭگەگە دەيىن, 2022 جىلعا دەيىن 1 تريلليون 785 ميلليارد تەڭگەگە دەيىن ارتادى» دەدى قايسار مانقاراەۆ.
ءبىلىم باسقارماسى باسشىسىنىڭ مىندەتىن اتقارۋشى گۇلجان ايتجانوۆانىڭ ايتۋىنشا, 214 جەكە مەنشىك جانە 94 مەملەكەتتىك بالاباقشا ءۇشىن, سونداي-اق مەملەكەتتىك جانە جەكە مەنشىك مەكتەپتەر ءۇشىن مەملەكەتتىك تاپسىرىستى ورنالاستىرۋعا بيۋدجەتتەن تولىق كولەمدە قولداۋ كورسەتىلگەن. جوعارى وقۋ ورىندارىنا قاراجات بولىنگەن. «كەلەسى جىلى قارجىلاندىرۋدىڭ جالپى سوماسى 114,9 ملرد تەڭگەنى قۇرادى, ونىڭ 33,7 ملرد تەڭگەسى رەسپۋبليكالىق بيۋدجەتتەن ءبولىندى» دەدى ول.
سونداي-اق باسقارماعا 5 ءبىلىم بەرۋ مەكەمەسىن كۇردەلى جوندەۋگە دە 1 ملرد تەڭگە كولەمىندە قاراجات كوزدەلگەنىن دە اتاپ ءوتتى. بۇل نىساندار بويىنشا مەملەكەتتىك ساراپتاماسى بار جوبالىق-سمەتالىق قۇجاتتاما ازىرلەنگەن. بۇدان باسقا, جۇمىس سمەتاسى جاسالعان بالاباقشالارداعى شاعىن ساۋلەت نىساندارىن اۋىستىرۋعا جانە جوندەۋگە قاراجات بولىنەدى. «بۇگىنگى كۇنى بالاباقشالارعا 10 مىڭ ورىنعا قاجەتتىلىك بار, بىراق بالالاردىڭ قاتىسۋىن تابەلدەۋدىڭ ەلەكتروندىق جۇيەسىن ەنگىزۋمەن بيىلعى جىلى 214 ملن تەڭگەگە جۋىق قاراجات ۇنەمدەلدى. وسىنىڭ ەسەبىنەن ءبىز مەملەكەتتىك تاپسىرىستى كوپ ورىنعا ورنالاستىرا الامىز» دەدى گۇلجان ايتجانوۆا.
مادەنيەت جانە سپورت باسقارماسىنىڭ باسشىسى نۇرلان سىدىقوۆ قوسىمشا قارجىلاندىرۋدى قاجەت ەتەتىن ماسەلەلەرگە ەرەكشە نازار اۋداردى. ايتالىق, كەلەر جىلى جەڭىستىڭ 75 جىلدىعىن مەرەكەلەۋ اياسىندا وتان قورعاۋشىلار مونۋمەنتىن جوندەۋ, بۇدان باسقا, تريۋمفالدى اركانىڭ جەراستى وتكەلىن, قالالىق كىتاپحانالاردى جانە «جاستار» تەاترى عيماراتىن قايتا جاڭارتۋ جۇمىستارىن جۇرگىزۋگە قاراجات جوسپارلانعانىن حابارلادى. «تاعى ءبىر قارالاتىن ماسەلە كەلەسى جىلى ق.قۋانىشباەۆ تەاترىنىڭ جاڭا عيماراتى اشىلۋىنا بايلانىستى جاڭا قويىلىمدار كەرەك. سول قويىلىمدارعا قوسىمشا قاراجات ءبولۋ قاجەت» دەدى ول.
حالىق قالاۋلىلارى مادەنيەت جانە سپورت باسقارماسىنا تۇرعىن ءۇي لاپتارىندا بۇقارالىق سپورتتى دامىتۋعا كوڭىل ءبولۋدى, سونداي-اق مۇمكىندىگى شەكتەۋلى ادامداردىڭ باسسەيندەرگە بارۋىنا قولايلى جاعدايلار جاساۋ ءۇشىن نۇسقالاردى ازىرلەۋدى ۇسىندى. سونداي-اق مادەنيەت جانە سپورت باسقارماسىنا جۇمىس جوسپارىن, بيۋدجەتتىك ءوتىنىمدى دايىنداپ ستراتەگيالىق جانە بيۋدجەتتىك جوسپارلاۋ باسقارماسىنا ۇسىنۋدى تاپسىردى.
نۇر-سۇلتان قالاسى قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا ەلوردالىق مەديتسينالىق مەكەمەلەردە بارلىق سانى 1 139 564 ادام تىركەلگەنىن, بيىل مەديتسينا سالاسىنىڭ 2087 قىزمەتكەرى بىلىكتىلىكتى ارتتىرۋ كۋرستارىنان وتكەنىن, بۇل ماقساتتا 208 ملن تەڭگە قارجى جۇمسالعانىن اتاپ ءوتتى. جىل سوڭىنا دەيىن باسقارما بيۋدجەتىندە 18 ملن تەڭگە قارجى بار. دەنساۋلىق ساقتاۋ باسقارماسىنىڭ 3 جىلعا ارنالعان بيۋدجەتتىك جوسپارى بويىنشا 20 ملرد 986 ملن تەڭگە كولەمىندە قاراجات قاراستىرىلعان. ونىڭ ىشىندە 2020 جىلعا 5 ملرد 586 ملن تەڭگە جوسپارلانۋدا.
«تۇرعىندارىنىڭ ينسۋلت جاعدايىندا مەديتسينالىق كومەك كورسەتۋ جانە قولجەتىمدىلىكتى جاقسارتۋ ءۇشىن قوسىمشا 4 ينسۋلت ورتالىعىن اشۋ قاجەت. قالانىڭ اۋرۋحانالارىندا اقپاراتتىق-قابىلداۋ بولىمدەرى ءۇشىن شامامەن 132 ملن تەڭگە جوسپارلانعان» دەدى ساۋلە قيسىقوۆا.
جۇمىسپەن قامتۋ جانە الەۋمەتتىك قورعاۋ باسقارماسىنا ءۇش جىلدىق كەزەڭگە 34,9 ملرد تەڭگە, ونىڭ ىشىندە 2020 جىلعا 13,2 ملرد تەڭگە قاراستىرىلعان. ال تىلدەردى دامىتۋ جانە مۇراعات ءىسى باسقارماسىنا 3 جىلعا – 2,8 ملرد تەڭگە. ونىڭ ىشىندە 2020 جىلعا 1,8 ملرد تەڭگە ءبولىندى.
جادىرا مۇراتبەكوۆا
