وسىدان تۋرا سەگىز جىل بۇرىن ەلوردالىق ەرلى-زايىپتى بەكجان وڭتاەۆ پەن ايگۇل سىرمانوۆانىڭ وتباسىندا ۇشەمدەر دۇنيەگە كەلدى. «استانا اقشامى» گازەتى اقجولتاي اقپاراتتى العاشقىلاردىڭ ءبىرى بولىپ سۇيىنشىلەگەنى سول, ارتىنشا ۇشەمدەرگە قالا اكىمدىگى تاراپىنان ءۇش بولمەلى پاتەر سىيعا بەرىلدى.
استانا تويى قارساڭىندا استانالىق ۇشەمدەرمەن جۇزدەسۋدىڭ ءساتى ءتۇستى. بۇگىندە ايات, سايات جانە جانات №4 جامبىل جاباەۆ اتىنداعى مەكتەپتىڭ 3-سىنىبىنا كوشكەن. «ەكسپو-2017» كورمەسىن تاماشالاپ جۇرگەن بۇلدىرشىندەر ءبىزدى كورگەن بويدا استانا تۋرالى اندەرىن ايتىپ, جىردان شۋماق وقىپ بەردى.
«استانا – ءبىز ءۇشىن ەرەكشە قالا. ويتكەنى ەلوردا ومىرىمىزگە ۇلكەن وزگەرىستەر اكەلدى. بالالاردىڭ ارقاسىندا سىيعا العان پاتەرىمىزدە باقىتتى عۇمىر كەشىپ كەلەمىز. شۇكىر, ايات پەن سايات بۇگىندە سپورتپەن شۇعىلدانسا, قىزىمىز جانات سۋرەت سالۋمەن اينالىسادى. جانەركە ەسىمدى ۇلكەن قىزىمىز باۋىرلارىنىڭ قامقورشىسى. ول ۇشەمدەردىڭ ساباقتى جاقسى وقۋىن قاداعالاپ, ۇلگىلى وقۋشى بولۋعا باۋلىپ كەلەدى» دەيدى اكەلەرى بەكجان وڭتاەۆ.
شىنىندا, ءاربىر استانالىق ءۇشىن باس قالانىڭ ورنى بولەك. ءبىرى وسىندا باقىتىن تاپسا, ەكىنشىسى قالاعان مامانداعىنىڭ يەسى اتانۋدا. جاڭادان وتباسىن قۇرىپ, ۇلكەن ومىرگە جولداما الىپ جاتقاندار قانشاما؟! ارماندار ورىندالاتىن قالادا ءالى تالاي-تالاي جاقسىلىقتار بولاتىنى ءسوزسىز.
گۇلميرا ايماعانبەت
