ۇشجاقتى كەلىسىم جاسالدى
ەڭبەك قاۋىپسىزدىگى ساقتالۋى كەرەك. بۇل تۋرالى اكىمدىكتە وتكەن جيىندا ايتىلدى. دوڭگەلەك ۇستەل باسىندا باس قوسقان جەرگىلىكتى بيلىك وكىلدەرى مەن كاسىپوداق مۇشەلەرى, كاسىپكەرلەر ەڭبەك رەسۋرستارىن دامىتۋ ماسەلەسىن تالقىلادى.
جيىن بارىسىندا قالا اكىمى ورىنباسارى ماليكا بەكتۇروۆا مەن كاسىپوداقتار ورتالىعىنىڭ ءتوراعاسى تاستانبەك ەسەنتاەۆ جانە قالالىق كاسىپكەرلەر پالاتاسىنىڭ ديرەكتورى الەن تۇلكىباەۆ 2018-2020 جىلدارعا ارنالعان قالالىق ۇشجاقتى كەلىسىمگە قول قويدى.
بۇعان دەيىن سوڭعى 18 جىل ىشىندە مۇنداي ۇشجاقتى 7 كەلىسىم جاسالعان ەكەن. مۇنداي كەلىسىمنىڭ ورتا مەرزىمدىك كەلەشەككە قويىلعان الەۋمەتتىك-ەكونوميكالىق مىندەتتەمەلەردى جۇزەگە اسىرۋ ءۇشىن جاسالىپ وتىرعانىن ايتادى تاراپتار. اتالمىش قۇجاتتا جۇمىس بەرۋشىلەر مەن جۇمىسكەرلەردىڭ ىنتىماقتاستىق جاۋاپكەرشىلىگىن كۇشەيتۋ, وندىرىستىك ەڭبەك دەڭگەيىن ارتتىرۋ, جۇمىسشىلاردىڭ دەنساۋلىعىن ساقتاۋ جانە ساۋىقتىرۋ ماسەلەلەرى قاراستىرىلعان.
ءوز كەزەگىندە ءسوز العان قالالىق ورتا ساپاسى جانە باقىلاۋ باسقارماسى باسشىسىنىڭ ورىنباسارى مىندەتىن اتقارۋشى ەرلان ىسماعۇلوۆ «بىلتىر جۇمىس كەزىندە قالا بويىنشا 57 قايعىلى وقيعا ورىن الىپ, ونىڭ 22-ءسى مەرت بولسا, 38-ءى اۋىر جارالاندى. بيىل بۇل كورسەتكىش 19 پايىزعا ازايدى. ەڭبەكتى قورعاۋ زاڭنامالارىن بۇزعانى ءۇشىن قالاداعى 16 قۇرىلىس كومپانياسىنىڭ جۇمىسى توقتاتىلىپ, ىستەرى سوتقا جىبەرىلدى» دەپ اتاپ ءوتتى. 2017-2025 جىلدارعا ارنالعان جول كارتاسىن ىسكە اسىرۋ بارىسى تۋرالى جۇمىسپەن قامتۋ, ەڭبەك جانە الەۋمەتتىك قورعاۋ باسقارماسى باسشىسىنىڭ ورىنباسارى ارتەم ابيلدينوۆ باياندادى. سونىمەن قاتار جيىن بارىسىندا ءوندىرىس ۇدەرىستەرىن تۇراقتاندىرۋ, ەڭبەك قۇقىقتارىن جانە جۇمىسشىلاردىڭ كەپىلدىكتەرىن قامتاماسىز ەتۋ بويىنشا ىنتىماقتاستىق تۋرالى كاسىپوداق ۇيىمدارى مەن كاسىپوداق باسشىلارى اراسىنداعى ءوزارا ىنتىماقتاستىق تۋرالى مەموراندۋمداردى ىسكە اسىرۋ بارىسى تۋرالى دا ءسوز بولدى. مەموراندۋمعا قول قويۋدان گورى ونى جۇزەگە اسىرۋ ماڭىزدى ەكەنىن ايتقان ماليكا بەكتۇروۆا جيىندا ايتىلعان ماسەلەلەر حاتتاماعا تىركەلىپ, الداعى ۋاقىتتا سول بويىنشا جۇيەلى جۇمىس جۇرگىزىلەتىنىن جەتكىزدى.